مقامی انٹیلی جنس ایجنسیاں پاکستانی مچھیرے اعجاز ملاح کوں بھارتی خفیہ ایجنسی نال مشتبہ تعلقات تے گرفتار کر ڳھدے، عطاء اللہ تارڑ

اسلام آباد، 1 نومبر (اے پی پی) وفاقی وزیر اطلاعات و نشریات عطاء اللہ تارڑ ہفتے کوں اے گالھ ظاہر کیتی جو پاکستانی مچھیرے اعجاز ملاح کوں جاسوسی دے الزامات تے مقامی انٹیلی جنس ایجنسیاں گرفتار کر ڳھدے، جیندے تے الزام اے جو اُوکوں بھارتی کوسٹ گارڈ حراست اچ ڳھدا اَتے ولا بھارت دی خفیہ سروس کیتے کم کرݨ تے مجبور کیتا ڳیا۔ وزیر مملکت برائے داخلہ طلال چوہدری نال سانجھی پریس کانفرنس اچ وفاقی وزیر بھارت تے الزام لاتا جو او آپݨے ناکام آپریشن سندور دے بعد پاکستان دے خلاف غلط معلومات دی مہم چلیندا پئے۔ عطاء اللہ تارڑ آکھیا جو پاکستانی انٹیلی جنس ایجنسیاں مشکوک سرگرمیاں پاروں اعجاز ملاح کوں نگرانی اچ رکھیا ہا اَتے بعد اچ اُونکوں گرفتار کر ڳھدا ڳیا۔ اُنہاں دعویٰ کیتا جو ایں گرفتاری نال بھارت دی خفیہ اَتے دھوکہ ݙیوݨ آلے حربیاں دے ذریعے پاکستان کوں بدنام کرݨ دی مبینہ کوششاں دا پُورا ثبوت مِلیے۔ انہاں پکے لفظاں اچ آکھیاجو ”آپݨے شرمناک ناکامی توں بعد آپریشن سندور اچ، بھارت پاکستان دی ساکھ کوں نقصان ݙیوݨ کیتے اوچھے ہتھکنڈے کریندا پئے، اُنہاں بیرونی پروپیگنڈے دی کوششاں دے خلاف ہوشیار رہݨ دی لوڑھ تے زور ݙتا۔ انہاں آکھیا جو اے بھارت دی ہِک ٻئی بھیڑی کوشش اے، جیڑھی کلبھوشن یادیو دے کیس نال رَلدی ملدی اے۔ اُنہاں زور ݙتا جو پاکستان دی سیکیورٹی ایجنسیاں ہائی الرٹ تے ہِن اَتے ہر سازش کوں ناکام بݨاوݨ کیتے پُوری طرح تیار ہِن۔ عطاء اللہ تارڑ آکھیا جو دنیا بھارت دے بھیڑے ارادیاں اَتے کوڑے بیانیے توں چنڳی طرح واقف ہے، اُنہاں ٻیا آکھیا جو پاکستان کامیابی نال بھارت دی سازش کوں ناکام بݨائے اَتے اوندے منصوبیاں کوں دنیا دے سامݨے ظاہر کر ݙتے۔ انہاں آکھیا جو مودی حکومت ہر الیکشن توں پہلے ایجھے ناٹک کریندی اے۔ بھارت ہِک ٻیا ایجھا ہتھکنڈا تیار کریندا پیا ہا، پر اعجاز ملاح کوں ہِک منظم آپریشن اچ رَنگے ہتھاں پکڑ ڳھدا ڳیا۔ وزیر اطلاعات آکھیا جو بھارت ہِک مچھیرے اعجاز ملاح کوں گرفتار کیتا ہا، جیڑھا روز دے معمول مطابق کھلے سمندر اچ مچھی مریندا ہا۔ اُنہاں الزام لاتا جو ملاح کوں بھارتی کوسٹ گارڈ حراست اچ ڳھدا اَتے بعد اچ بھارتی حکام ولوں خاص کم ݙے تے پاکستان واپس بھیجیا ڳیا۔ بھارتی خفیہ ایجنسیاں ملاح کوں مجبور کیتا اَتے اُونکوں پاکستان دے خلاف سرگرمیاں کیتے استعمال کیتا۔ انہاں آکھیا جو ملاح کوں ایں توں پہلے وی بھارتی حکام حراست وچ ڳھدا ہا اَتے جاسوسی دی سرگرمیاں کیتے لاوݨ توں پہلے ہِک نامعلوم جاہ تے منتقل کیتا ڳیا ہا۔ اُنہاں بھارت تے الزام لاتا جو او پاکستان دی نویں سفارتی کامیابیاں اَتے قومی ترقی توں خوفزدہ اے، جیڑھی آپریشن سندور دی ناکامی پاروں وی اے۔ ملاح کوں بھارتی حکام ہدایت ݙتی ہئی جو او پاکستان آرمی، نیوی اَتے رینجرز دی وردیاں حاصل کرے۔ پاکستانی انٹیلی جنس ایجنسیاں ملاح دے فوجی لباس ڳھنݨ دی کوشش ویلھے اُوندی چنڳی طرح نگرانی شروع کر ݙتی ہئی۔ وفاقی وزیر آکھیا جو اعجاز ملاح گرفتاری دے بعد سارے الزامات کوں قبول کر ڳھدے۔ تارڑ ملاح دا ریکارڈ شدہ اعترافی بیان وی چلایا، جیندے اچ ملاح ݙسیا جو او اَتے بئے لوک مچھی مریندے پئے ہَن جݙاں انہاں کوں بھارتی حکام حراست اچ ڳھدا۔ ملاح دے مطابق، بھارت ولوں اُونکوں فوجی وردیاں، زونگ (Zong) دی سِم کارڈز، پاکستانی سگریٹاں، رسیداں اتے کرنسی ڳھن آوݨ دی ہدایت ݙتی ڳئی۔ انہاں دعویٰ کیتا جو ایں حکم تے عمل کرݨ دے بعد بھارتی خفیہ ایجنسی اُونکوں چھوڑ ݙتا۔ ملاح ٻیا ظاہر کیتا جو اُوں خفیہ افسر دی تصویراں ٻھیجی ہن، اَتے سمندر توں واپس آوݨ تے ہِک پاکستانی ایجنسی اُونکوں گرفتار کر ڳھدا۔