پاکستان اتے ترکیہ دے وزراء تجارت دی ملاقات، ݙو پاسہ تجارت کوں ودھاوݨ تے اتفاق

استنبول۔ 3 نومبر (اے پی پی) وفاقی وزیر تجارت جام کمال خان آرگنائزیشن آف دی اسلامک کواپریشن (COMCEC) دی سٹینڈنگ کمیٹی فار اکنامک اینڈ کمرشل کواپریشن دے 41 ویں اجلاس دے موقع تے استنبول اچ ترکیہ دے وزیر تجارت پروفیسر ڈاکٹر عمر بولات نال ملاقات کیتی۔ سنوار کوں جاری تھیوݨ آلی پریس ریلیز موجب ملاقات اچ ݙوہیں وزیراں بھرا ملکاں وچال تجارتی اتے اقتصادی تعاون کوں ٻیا مضبوط کرݨ دے طریقیاں تے ڳالھ مہاڑ کیتی۔ ترکیہ دے وزیر تجارت پروفیسر ڈاکٹر عمر بولات پاکستان نال تجارتی تعلقات کوں ودھاوݨ اتے ݙو پاسہ اقتصادی رابطے ودھاوݨ دی آپݨی حکومت دی تکڑی خواہش دا اظہار کیتا۔ انہاں یقین ݙوایا جو ترکیہ آندے تجارتی مذاکرات ویلھے پاکستان دی تجویزاں دا چنڳے طریقے نال جائزہ گھنسی۔ وفاقی وزیر جام کمال خان آپݨے تُرک ہم منصب کوں وزیر اعظم محمد شہباز شریف دی قیادت اچ حکومت پاکستان ولوں کارکردگی اتے شفافیت یقینی بݨاوݨ اتے نظام اچ سرمایہ کاراں دا اعتماد ودھاوݨ سانڳے کیتی ڳئی اصلاحات اتے اقدامات بارے ݙسایا۔ انہاں زور ݙتا جو پاکستان کئی شعبیاں اچ تُرک سرمایہ کاری کیتے ہک چنڳا موقع بݨ تے ابھردا پئے۔ پروفیسر ڈاکٹر بولات حلال تجارت اتے متعلقہ صنعتاں اچ تعاون کوں تکڑا کرݨ دی اہمیت تے زور ݙیندیں ہوئیں وزیر جام کمال خان کوں 25 نومبر توں استنبول اچ تھیوݨ آلی آندے حلال ایکسپو اچ شرکت دی دعوت وی ݙتی۔ ݙوہیں پاسوں اڄوکی سانجھے داری کوں مضبوط کرݨ اتے تجارت، سرمایہ کاری اتے صنعتی ترقی اچ تعاون کیتے نویں راہ لبھݨ دے عزم دا اعادہ کیتا ڳیا جیڑھا جو پاکستان اتے ترکیہ وچال نیڑے اتے بھراواں آلے تعلقات دی عکاسی کریندے۔