کیش لیس اکانومی دے ودھارے تے حکومت دی توجہ مرکوز، دسمبر وچ ڈیٹا ایکسچینج لیئر دا آغاز تھیسی، 2026 تئیں سرکاری ادائیگیاں ڈیجیٹل تھیسن، شنزہ فاطمہ خواجہ

اسلام آباد۔ 3 نومبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شنزہ فاطمہ خواجہ آکھیے جو حکومت ملک وچ کیش لیس اکانومی دے ودھارے تے توجہ مرکوز کیتی ہوئی اے، ڈیٹا ایکسچینج لیئر دے پائلٹ پراجیکٹ دا دسمبر وچ آغاز تھیسی، ڈیجیٹل اکانومی نال ٹیکس نیٹ وچ بہتری اتے ودھارا تھیسی، ڈیجیٹل ادائیگیاں وچ تکھے ودھارا تھیندا پئے، سرکاری سطح تے 2026 تئیں ساریاں ادائیگیاں ڈیجیٹل طریقے نال تھیسن۔اے ڳالھ انہاں وفاقی وزیر خزانہ سینیٹر محمد اورنگزیب اتے ٻئے حکام دے نال مشترکہ پریس کانفرنس وچ آکھی۔انہاں آکھیا جو وزیراعظم محمد شہباز شریف ڈیجیٹل پاکستان کیتے ذاتی دلچسپی گھندے پئن۔ ڈیجیٹلائزیشن دے ذریعے ملکی معیشت کیتے 4 سالاں وچ 10 ارب ڈالر دا ہدف مقرر کیتا ڳئے ۔اڄوکے سال جنوری وچ ڈیجیٹل پاکستان ایکٹ منظور کیتا ڳیا، جیندے تحت ڈیجیٹل پاکستان دا روڈ میپ ݙتا ڳیا جیندے ترائے پہلو ہن ڈیجیٹل سوسائٹی، ڈیجیٹل اکانومی اتے ڈیجیٹل گورننس۔وزیراعظم ملک وچ کیش لیس اکانومی کیتے ترائے کمیٹیاں بݨائن، ایں مقصد کیتے بھرپور اقدامات کیتے ویندے پئن اتے سارے اداریں کوں ہم آہنگ کیتا ویندا پئے۔راست” دے ذریعے وی ڈیجیٹل ادائیگی کیتی ویندی پئی اے۔انہاں ݙسایا جو ڈیٹا ایکسچینج لیئر دے پائلٹ پراجیکٹ دا دسمبر وچ آغاز تھیسی۔ ڈیجیٹل اکانومی نال ٹیکس نیٹ وچ بہتری اتے ودھارا تھیسی اتے عام شہریاں کیتے سوکھ تھیسی۔انہاں آکھیا جو ڈیجیٹل ادائیگیاں وچ10 فیصد ودھارا تھیوݨ نال جی ڈی پی گروتھ وچ ہک فیصد ودھارا تھیندے۔ساڈھے چار کروڑ توں ودھ بجلی دے ٻلاں تے ادائیگی کیتے کیو آر کوڈ موجود اے۔بی آئی ایس پی دی مستحق ہک لکھ توں ودھ تریمتاں دے اکاؤنٹ کھولیے ڳئن۔رمضان پیکیج ڈیجیٹل ادائیگیاں دے ذریعے ونڈیا ڳیا۔80 لکھ تریمتاں ڈیجیٹل بینکنگ وچ شامل تھیاں۔پاک آئی ڈی دے ذریعے آن لائن شناختی کارڈ بݨاوݨ وچ سوکھ اے ۔اسلام آباد دی سمارٹ ایپ کوں راست نال ہم آہنگ کیتا ڳئے، ایں ایپ دے ذریعے اسلام آباد دے شہریاں نے گاݙیاں دے ٹوکن ٹیکس دے مد وچ ہک ارب روپے ادا کیتن۔کیو آر ادائیگیاں دے سلسلے وچ کیو آر مرچنٹ کوں ادائیگی کیتے ساڈھے ترائے ارب روپے رکھیے ڳئن۔انہاں آکھیا جو ڈیجیٹلائزیشن کیتے ساریاں کیتے انٹرنیٹ ضروری اے، فائبرائزیشن نال جڑے مسئلیں کوں مُکاوݨ کیتے پورے پاکستان وچ رائٹ آف وے چارجز ختم کرݙتے ڳئن۔ڈیجیٹلائزیشن نال ڈیجیٹل ادائیگیاں وچ سوکھ اتے شفافیت آسی، سرخ فیتہ مُکاوݨ وچ مدد ملسی، کارکردگی وچ بہتری آسی، بینکاں توں قرضہ گھنݨ وچ سوکھ تھیسی اتے غیر روائتی معیشت کوں باضابطہ بݨاوݨ وچ مدد ملسی۔جون 2025ء وچ 5 لکھ مرچنٹ آن لائن ادائیگیاں کریندے پئن، 2026ء تئیں انہاں دی ڳنتری 20 لکھ تئیں گھن ونڄݨ دا ہدف اے۔ڈیجیٹل بینکنگ صارفین دی ڳنتری جون 2025 وچ 95 ملین ہئی، ستمبر 2025 تئیں ودھ تے 112 ملین تھی چکی اے، جون 202 تئیں 120 ملین تئیں گھن ونڄݨ دا ہدف اے۔صنفی امتیاز (gender discrimination) مُکاوݨ کیتے کم تھیندا پئے، “آسان خدمت” دا اجراء جلدی کیتا ویندا پئے جیندے ذریعے 150 خدمتاں ݙتیاں ویسن۔سرکاری سطح تے 2026 تئیں ساریاں ادائیگیاں ڈیجیٹل طریقے نال تھیسن۔بی آئی ایس پی دی ڈیجیٹلائزیشن کوں2026 تئیں مکمل کر ݙتا ویسی