سکیورٹی فورسز دیاں خیبر پختونخوا اچ مختلف کارروائیاں، ترائے خوارجی دہشت گرد جہنم واصل

راولپنڈی۔ 3 نومبر(اے پی پی)سکیورٹی فورسز، خیبر پختونخوا اچ ݙو مختلف کارروائیاں دے دوران بھارتی پراکسی “فتنہ الخوارج” نال تعلق رکھݨ آلے ترائے خوارج ہلاک کر ݙتے۔ سوموار کوں پاک فوج دے شعبہ تعلقات عامہ (آئی ایس پی آر) توں جاری بیان دے مطابق، سکیورٹی فورسز، شمالی وزیرستان دے علاقے ایشام دے اُلٹ پاس پاکستان-افغان سرحد دے رستے اندر آوݨ دی کوشش کرݨ آلے خوارج دے ہک گروہ دی نقل و حرکت دا ویلھے سِر پتا لایا۔ سکیورٹی فورسز ایں گروہ کوں مؤثر طریقے نال نشانہ بݨایا۔ صحیح اتے مہارت نال کیتی ڳئی کارروائی دے نتیجے اچ بھارتی پراکسی “فتنہ الخوارج” نال تعلق رکھݨ آلے ݙو خوارج جہنم واصل کر ݙتے ڳئے۔ مارے ڳئے خوارج اچوں ہک دی سنڄاݨ افغان شہری “خارجی قاسم” دے ناں نال تھئی، جیڑھا جو افغان بارڈر پولیس اچ کم کریندا ہئی۔ ٹانک ضلع اچ کیتی ڳئی ہک ٻئی خفیہ اطلاع تے مبنی کارروائی اچ سکیورٹی فورسز بھارتی پراکسی “فتنہ الخوارج” نال تعلق رکھݨ آلے ہک ٻئے خارجی کوں کامیابی نال ہلاک کر ݙتا جیںدی شناخت “خارجی اکرام الدین عرف ابو دجانہ” دے طور تے تھئی، جیڑھا جو ہک افغان شہری ہئی۔ آئی ایس پی آر آکھیے جو اے واقعے ایں ڳالھ دی نشاندہی کریندن جو افغان شہری پاکستان اچ معصوم شہریاں اتے سکیورٹی فورسز دے خلاف کئی دہشت گردانہ سرگرمیاں اچ ملوث ہن۔ پاکستان کئی واری عبوری افغان حکومت توں مطالبہ کر چُکیے جو او اپݨی طرفوں مؤثر سرحدی نگرانی کوں یقینی بݨاوے، اپݨیاں ذمہ داریاں کوں پورا کرے اتے افغان سرزمین کوں خوارج دے استعمال اتے اپݨے شہریاں دی پاکستان دے اندر دہشت گردی اچ شمولیت توں باز رکھے۔ پاکستان دی سکیورٹی فورسز ملک دیاں سرحداں دے دفاع کیتے پرعزم اتے ثابت قدم ہن۔ علاقے اچ بھارتی حمایت یافتہ کہیں وی خارجی دے خاتمے کیتے سینیٹائزیشن دی کارروائی جاری اے، جݙاں جو سکیورٹی فورسز اتے قانون نافذ کرݨ آلے ادارے، وفاقی ایپکس کمیٹی وَلُّوں منظور شدہ قومی ایکشن پلان دے تحت جاری وژن “عزمِ استحکام” دے مطابق اپݨی انسدادِ دہشت گردی دی مہم پوری طاقت نال جاری رکھسن تاں جو غیر ملکی حمایت یافتہ دہشت گردی دے فتنے کوں ملک توں مکمل طور تے ختم کیتا ونڄ سڳے۔