بانی پی ٹی آئی نے وزیراعظم محمد شہباز شریف تے کوڑے تے آپوں گھڑیے الزام لاتے ،اڄ اوہو بندہ کرپشن دے مقدمیں اچ اڈیالہ جیل وچ قید اے تے دہشت گرداں دی حمایت کرݨ تے قوم دے سامݨے بے نقاب تھی چکیے ،عطا اللہ تارڑ

لاہور (4 نومبر) وفاقی وزیر اطلاعات و نشریات عطاء اللہ تارڑ آکھیے جو بانی پی ٹی آئی نے وزیراعظم محمد شہباز شریف تے کوڑے تے آپوں گھڑیے الزام لاتے ، اڄ اوہو بندہ کرپشن دے مقدمیں وچ اڈیالہ جیل وچ قید اے تے دہشت گرداں دی حمایت کرݨ تے قوم دے سامݨے بے نقاب تھی چکے۔ وزیراعظم شہباز شریف دے خلاف عزت دے مقدمے وچ حقیقی پیشرفت تھی چکی اے تے سارے ثبوت عدالت وچ پیش کر ݙتے ڳئن۔ امید اے انصاف ملسی۔ سیشن کورٹ لاہور وچ وزیراعظم محمد شہباز شریف دی طرفوں بانی پی ٹی آئی دے خلاف 10 ارب روپے ہرجانے دے دعوے دے مقدمے دی سماعت دے بعد میڈیا نال ڳالھ مہاڑ کریندے وفاقی وزیر اطلاعات و نشریات عطاء اللہ تارڑ آکھیا جو او اڄ عدالت وچ گواہ دے طور تے پیش تھئے۔ وزیراعظم شہباز شریف بانی پی ٹی آئی دے خلاف عزت دا مقدمہ جولائی 2017 وچ داخل کیتا ہئی، پر بانی پی ٹی آئی دے وکیلاں ہݨ تئیں 120 واری التوا منگ چکی اے۔ اڄ وی انہاں دے وکیل موجود کائنی ، انہاں کنے نہ ٻولݨ کیتے کجھ اے نہ ثبوت۔انہاں آکھیا جو شہباز شریف دی سیاسی خدمات پوری قوم دے سامݨے ہن۔ او 1988 توں قومی تے صوبائی اسمبلی دے رکن رہین، ترے واری وزیراعلیٰ پنجاب تے ݙو واری وزیراعظم رہین۔ محمد شہباز شریف ہمیشہ عوامی خدمت کیتی اے، ترقی تے یقین رکھیندن تے پوری زندگی قوم دی خدمت وچ گزاری۔وفاقی وزیر آکھیا جو ٻاہرلے ملک وی کوڑے بیان بازی دی ہار تھئی، ہک غیر ملکی عدالت وی عمران نیازی کوں کوڑا قرار ݙتا تے جرمانہ لا ݙتا۔ اے شخص اداریں دے خلاف وی پروپیگنڈا کریندا ریہا تے دہشت گرد احسان اللہ احسان کوں انٹرویو ݙتا، کہیں مہذب ملک وچ ایجھا عمل قابل قبول کائنی۔بلدیاتی انتخابات دے حوالے نال وفاقی وزیر آکھیا جو بلدیاتی نظام تے مکمل یقین اے تے انتخابات ویلھے تے تھیوݨے چاہیدن۔ ماضی وچ وائس چیئرمینز ایں شہر وچ احتجاج کیتا ہئی، اساں ترمیم کرتے انہاں کوں حقوق ݙیوائے۔ ممکنہ 27ویں آئینی ترمیم دے ذکر تے انہاں ݙسایا جو ترمیم دے ذریعے عدلیہ دے ادارہ جاتی ڈھانچے کوں مضبوط بݨاوݨ تے مشاورت جاری اے۔ اساں آئینی بینچ توں آئینی کورٹ دی طرف ٹردے پیوں تاں جو نظام انصاف بہتر تھیوے۔انہاں آکھیا جو اڄ عدالت آوݨ کیتے میں اوہو رستہ ورتیا جیڑھا عام سائلین کیتے اے۔ عطاء اللہ تارڑ آکھیا جو حکومت قانون دی حکمرانی، معاشی بحالی تے سیاسی استحکام دے ایجنڈے تے کم کریندی پئی اے۔ اساں عدالت وچ سچ رکھیے۔ انہاں آکھیا جو معیشت مستحکم تھئی اے، پاکستان اڳوں ٹردا پئے۔وفاقی وزیر اطلاعات و نشریات ، وزیراعلیٰ خیبر پختونخوا سہیل آفریدی دے اڄوکے بیان تے سوشل میڈیا تے گردش کرݨ آلیاں ویڈیوز تے ردعمل وچ آکھیا جو حقائق مسخ کرݨ دی کوشش کیتی ویندی پئی اے۔ وزیراعلیٰ خیبر پختونخوا خود کور کمانڈر ہاؤس ونڄݨ آلی ویڈیو آپݨے سوشل میڈیا اکاؤنٹ تے جاری کیتی جݙاں جو زمان پارک دی انڄ ویڈیو وی ریکارڈ تے موجود اے۔ ݙوہائیں ویڈیوز کوں جاݨ ٻجھ تے خلط ملط کر تے عوام کوں گمراہ کرݨ دی کوشش کیتی ڳئی۔ انہاں آکھیا جو قانون ساریں کیتے برابر اے تے کہیں وی ملزم دا ٹرائل ایں بنیاد تے کائنی رک سڳدا جو او کہیں منصب تے فائز اے۔ وزیراعلیٰ ہووے یا عام شہری، قانونی کارروائی ہر حال وچ تھیندی اے۔انہاں توں پہلے لاہور سیشن عدالت وزیراعظم محمد شہباز شریف دی طرفوں بانی پی ٹی آئی دے خلاف 10 ارب روپے ہرجانے دے دعوے دے مقدمے وچ وفاقی وزیر اطلاعات و نشریات عطاء اللہ تارڑ دی شہادت قلمبند کرݨ دے بعد مزید سماعت 15 نومبر تئیں ملتوی کر ݙتی۔ ایڈیشنل سیشن جج یلماز غنی مقدمے دی سماعت کیتی۔ سماعت تے وفاقی وزیر اطلاعات و نشریات عطاء اللہ تارڑ گواہ دے طور تے پیش تھئے تے آپݨا بیان قلمبند کرایا۔ سماعت دے آغاز تے بانی پی ٹی آئی دے معاون وکیل سینئر وکیل محمد حسین چوٹیا دی عدم دستیابی دی بنیاد تے گواہی ملتوی کرݨ دی استدعا کیتی، جیندے تے عدالت ریمارکس ݙتے جو جرح بعد وچ کرگھنسو، اڄ اساں بیان قلمبند کر گھندوں۔ عدالت استدعا مسترد کریندے کارروائی جاری رکھݨ دا حکم ݙتا۔عطاء اللہ تارڑ حلف چا تے شہادت قلمبند کریندے عدالت وچ بیان ݙتا جو مدعی وزیراعظم محمد شہباز شریف ہک معزز تے باوقار سیاسی گھراݨے نال تعلق رکھیندن تے انہاں دی سیاسی خدمات توں پوری دنیا واقف اے۔ انہاں شہباز شریف دے مختلف انتخابات وچ کامیابیاں تے سرکاری عہدیں تے فائز رہݨ دی تفصیلات عدالت وچ پیش کیتیاں، جیندے تے بانی پی ٹی آئی دے وکیل اعتراض چاتا جو اے دستاویزات گواہ متعلق کائنی، تاں جو عدالت اعتراضات بعد وچ ݙیکھݨ دا آکھ تے دستاویزات ریکارڈ تے گھن ڳھدیاں۔عطاء اللہ تارڑ ٻیا ݙسایا جو بانی پی ٹی آئی 8 اپریل 2017 کوں ہک نجی ٹی وی پروگرام وچ شہباز شریف تے پانامہ کیس واپس گھنݨ کیتے 10 ارب روپے دی پیشکش دا کوڑا الزام لاتا جیڑھا بعد وچ مختلف ٹی وی پروگرامز، جلسیں تے پشاور سودھے ٻہوں سارے شہراں وچ عوامی اجتماعات دے دوران دوہرایا ڳیا۔ انہاں ویڈیو کلپس تے اخباری تراشے وی عدالت وچ پیش کیتے جیندے تے بانی پی ٹی آئی دے وکیل اعتراض کیتا جو اے مواد گواہ دا ذاتی کائنی، تاں جو عدالت اعتراضات مسترد کریندے ریکارڈ کرݨ دی اجازت ݙے ݙتی۔عطاء اللہ تارڑ بیان قلمبند کریندے آکھیا جو کوڑے الزامات نال شہباز شریف دی ذاتی ساکھ تے قومی تے بین الاقوامی سطح تے انہاں دی عزت کوں نقصان پُڄاوݨ دی کوشش کیتی ڳئی۔ انہاں ٻئے دستاویزات جمع کراوݨ دی اجازت منگی، جیندے تے عدالت آکھیا جو باقی کاغذات ٻئے گواہیں دے نال جمع کرائے ونڄن۔ عدالت شہادت قلمبند کرݨ دے بعد عطاء اللہ تارڑ کوں اڳلی سماعت تے جرح کیتے طلب کریندے مقدمے دی مزید سماعت 15 نومبر تئیں ملتوی کر ݙتی۔