پاکستان دی ڈیجیٹل تے صنعتی ترقی دے پاسے ہک وݙی کامیابی، ملک دی پہلی کروم بک اسمبلی لائن دا آغاز، حکومت تے گوگل دی مشترکہ کامیابی

اسلام آباد (4 نومبر) پاکستان ڈیجیٹل تے صنعتی ترقی دے پاسے ہک وݙی کامیابی حاصل کرڳھدی اے۔ حکومت پاکستان تے گوگل مشترکہ طور تے ڈیجیٹل تبدیلی دا سنگ میل عبور کر ڳھدے جیندے وچ ملک دی پہلی کروم بک اسمبلی لائن دا آغاز تے پاکستان وچ مضبوط مقامی موجودگی کیتے انہاں دے منصوبے شامل ہن۔نائب وزیراعظم تے وزیر خارجہ سٹیٹ محمد اسحاق ڈار وزارت انفارمیشن ٹیکنالوجی اینڈ ٹیلی کام، وزارت دفاعی پیداوار تے خصوصی سرمایہ کاری سہولت کونسل (ایس آئی ایف سی) دے گوگل تے انہاں دے پارٹنر ٹیک ویل دے تعاون نال وزیراعظم سیکریٹریٹ دے آڈیٹوریم وچ پاکستان دی پہلی کروم بک اسمبلی لائن دا افتتاح کیتا۔تقریب توں خطاب کریندے نائب وزیراعظم تے وزیر خارجہ سٹیٹ اسحاق ڈار آکھیا جو وزیراعظم دے وژن تے قیادت دی رہنمائی وچ حکومت ڈیجیٹل شمولیت تے AI کیتے تیار پاکستان دی تعمیر کیتے پرعزم اے جیڑھا اساں ماݨ نال ڈیجیٹل نیشن پاکستان آہدوں۔ اے وژن اساݙے نوجواناں کوں ڈیجیٹل مہارتاں نال بااختیار بݨاوݨ تے انہاں کوں جدید آلات نال آراستہ کرݨ دے اساݙے عزم دی عکاسی کریندے تے گوگل دی پاکستان وچ مقامی سطح تے مواقع تئیں رسائی یقینی بݨاوݨ وچ مدد کریندے۔ اے قومی فخر دا لمحہ اے تے اساݙے ملک دی ڈیجیٹل صلاحیت دی ہک طاقتور تصدیق اے۔آئی ٹی اینڈ ٹیلی کام دی وزیر شازیہ فاطمہ خواجہ آکھیا جو اڄ دا ݙینھ پاکستان دی ڈیجیٹل تبدیلی دا ہک اہم لمحہ اے۔ وزیراعظم دے ڈیجیٹل پاکستان وژن موجب اساں آپݨے نوجواناں کوں مہارتاں تے آلات نال بااختیار بݨیندے پیوں تے گھریلو ہارڈویئر دی پیداوار کوں وی مضبوط کریندے پیوں۔ تعلیم، ٹیکنالوجی تے مقامی طور تے اسمبل شدہ سستے کروم بکس کوں ہک جاہ کٹھا کرݨ نال مستقبل کیتے AIفعال ڈیجیٹل نیشن دے اساݙے ہدف کوں تقویت ملدی اے۔وزیر دفاعی پیداوار رضا حیات آکھیا جو ایس آئی ایف سی ہک محرک دے طور تے کلیدی کردار ادا کیتے۔ NRTC پاکستان وچ پہلی کروم بک اسمبلی لائن قائم کرݨ کیتے بھرپور کم کیتے۔ اے مشترکہ منصوبہ روزگار دے موقع پیدا کرݨ، مقامی معیشت کوں متحرک کرݨ تے پاکستان وچ ڈیجیٹل تقسیم ختم کرݨ دی صلاحیت رکھیندے۔گوگل پاکستان دے کنٹری ڈائریکٹر فرحان قریشی آکھیا جو اساں لوکاں، مہارتاں تے اختراع وچ آپݨی سرمایہ کاری کوں گہرا کرݨ کیتے پرجوش ہیسے۔ جیویں جیویں اساݙا پاکستان وچ کم ودھدا پئے، اساں اتھاں مضبوط مقامی موجودگی کیتے کم کریسوں۔ایں تقریب وچ نائب وزیراعظم، وفاقی وزرا، صوبائی وزرا، سینئر سرکاری اہلکاراں تے صنعتی رہنماواں شرکت کیتی۔ اے منصوبہ 2026 تئیں سالانہ 5 لکھ کروم بکس دی پیداوار دا ہدف رکھیندے، خاص طور تے تعلیمی تے سرکاری شعبے کیتے۔ اے اقدام پاکستان دی وݙی نوجوان آبادی کوں ڈیجیٹل مہارتاں نال آراستہ کرݨ، روزگار پیدا کرݨ تے معاشی ترقی وچ مدد ݙیسی۔اے سنگ میل پاکستان دی ٹیکنالوجی دی صلاحیت تے حکومت پاکستان دے فعال ڈیجیٹل تبدیلی دے ایجنڈے تے گوگل دے اعتماد دی عکاسی کریندے۔ پاکستان ہک اہم موڑ تے کھڑے جیڑھا خود کوں ہک وݙے برآمدی مرکز دے طور تے پیش کریندا پئے۔ ماہرین موجب ، موبائل ایپس، ڈیجیٹل خدمات تے ای کامرس وچ وسعت نال 2030 تئیں برآمدی حجم وچ 6.6 ارب ڈالر دا ودھارا تھی سڳدے۔ کروم بک اسمبلی لائن اتے گوگل دے مقامی دفتر جیھے اقدامات نوجوان پاکستانیاں دی صلاحیتاں اتے مستقبل دے موقع وچال فرق کوں ختم کرݨ اچ مدد کریسن ۔این آر ٹی سی  ہری پور اچ کروم بک اسمبلی لائن مقامی مینوفیکچرنگ ، سپلائی چین دی ترقی اتے صنعتی صلاحیت کوں ودھارا ݙیسی جیڑھا براہ راست وزیراعظم دے ڈیجیٹل نیشن پاکستان ویژن اتے نیشنل اے آئی پالیسی دے مقاصد دی حمایت کریسی ۔ اے شراکت داری پاکستان دے اختراعی ماحولیاتی نظام تے عالمی اعتماد دی عکاسی کریندی اے تے ایں ڳالھ دی تصدیق کریندی اے جو ملک ٹیکنالوجی، سرمایہ کاری اتے بین الاقوامی تعاون سانڳے کھلیا اے۔