سپیکر قومی اسمبلی دی خصوصی دعوت تے پارلیمانی وفد 5 توں 7 نومبر تئیں پاکستان دا ترائے ݙینھ دا سرکاری دورہ کریسی

اسلام آباد (4 نومبر) اسپیکر قومی اسمبلی سردار ایاز صادق دی خصوصی دعوت تے اسلامی جمہوریہ ایران دی مجلس شوریٰ دے اسپیکر محمد باقر قالیباف دی قیادت وچ ہک پارلیمانی وفد 5 نومبر توں 7 نومبر 2025ء تئیں پاکستان دا سرکاری دورہ کریسی۔قومی اسمبلی سیکریٹریٹ موجب ایرانی پارلیمانی وفد دے دورے نال پاکستان تے ایران وچال پارلیمانی تعلقات کوں مزید ودھارا ملسی تے ڈوہیں بھرا ہمسایہ ملکاں وچال خطے وچ امن، ترقی تے اقتصادی تعاون دے ودھارے دے حوالے نال مشترکہ حکمت عملی تے تبادلہ خیال دا موقع میسر تھیسی۔دورے دے دوران ایرانی پارلیمانی وفد وزیراعظم پاکستان، چیئرمین سینٹ، اسپیکر قومی اسمبلی تے قومی اسمبلی وچ قائم پاکستان-ایران پارلیمانی فرینڈشپ گروپ دے ارکان ، فیڈریشن آف پاکستان چیمبرز آف کامرس اینڈ انڈسٹری دے نمائندیں نال وی ملاقاتاں کریسی۔ایرانی وفد پاکستان-ایران پارلیمانی فرینڈشپ گروپ دے اجلاس وچ شرکت کریسی جتھاں ݙوہیں ملکاں وچال تجارت، توانائی، سرحدی تعاون، ثقافتی رابطے تے عوامی سطح تے تبادلیں دے ودھارے متعلق امورتے تفصیلی ڳالھ مہاڑ کیتی ویسی ۔ایرانی اسپیکر دا اے دورہ نہ صرف پاکستان تے ایران دے تاریخی تے برادرانہ تعلقات کوں مزید مضبوط بݨاوݨ دا سبب بݨسی بلکہ ڈوہیں ملکاں وچال خطے دے استحکام، سانجھے اعتماد تے مشترکہ ترقی دے نویں امکانات دے حوالے نال ہک مثبت پیش رفت وی ثابت تھیسی۔ ایں دورے نال ݙوہیں ملکاں دیاں پارلیماناں وچال مؤثر رابطیں تے سانجھی مشاورت دے وھارے دے ہک نویں دور دا آغاز تھیسی۔ایرانی پارلیمانی وفد پاکستان وچ آپݨے قیام دے دوران لاہور تے کراچی دا وی دورہ کریسی۔ لاہور وچ وفد علامہ محمد اقبال دے مزار تے حاضری ݙیسی تے صوبائی اسمبلی پنجاب دے اسپیکر نال ملاقات کریسی۔ بعد وچ ایرانی پارلیمانی وفد کراچی دا دورہ کریسی۔ کراچی دے دورے دے دوران ایرانی پارلیمانی وفد قائد اعظم محمد علی جناح دے مزار تے حاضری ݙیسی، اسپیکر صوبائی اسمبلی سندھ تے کراچی دی بزنس کمیونٹی نال ملاقاتاں کریسی۔