تعلیم وچ جدت تے نویں سوچ ہی ترقی یافتہ معاشریں دی بنیاد اے، سید عمران احمد شاہ

اسلام آباد (4 نومبر) وفاقی وزیرتخفیف غربت و سماجی تحفظ سید عمران احمد شاہ آکھیے جو تعلیم وچ جدت تے نویں سوچ ہی ترقی یافتہ معاشریں دی بنیاد اے تے ایجھے تعلیمی ادارے جیڑھے علم، تخلیق تے تنقیدی سوچ کوں ودھارا ݙیندن، او قوم دے روشن مستقبل دی ضمانت ہن۔ او اتھاں بیکن ہاؤس سکول سسٹم دے زیراہتمام منعقدہ تقریب “سکول آف ٹومارو XVIII: ری تھنکنگ ایجوکیشن ـ 50ویں سالگنڈھ ایڈیشن” وچ مہمان خصوصی دے طور تے خطاب کریندے پئے ہن۔ ایں موقع تے وفاقی وزیر بیکن ہاؤس دے 50 سال پورے تھیوݨ تے “سکول آف ٹومارو” سرویز دے 25 سال پورے تھیوݨ تے ادارے دی شاندار تعلیمی خدمات دی تعریف کیتی ۔ تقریب وچ ماہرین تعلیم، طلبہ، والدین، سماجی رہنماواں تے سیاسی و سماجی شخصیات دی وݙی تعداد شرکت کیتی۔ سید عمران احمد شاہ آکھیا جو بیکن ہاؤس سکول سسٹم پاکستان وچ معیاری تعلیم، تخلیقی صلاحیتاں دے ودھارے تے تعلیمی جدت دے میدان وچ نمایاں کردار ادا کیتے۔ انہاں آکھیا جو تعلیم دے شعبے وچ ایجھے اقدامات ملک دے نوجواناں کوں جدید عالمی تقاضیں موجب اڳوں ٹُرݨ دا حوصلہ ݙیندن۔ وفاقی وزیر امید ظاہر کیتی جو بیکن ہاؤس سکول سسٹم آپݨی نصف صدی پرمحیط خدمات کوں ایں جذبے نال جاری رکھیسی تے تعلیم دے ذریعے ہک مضبوط، باشعور تے ترقی یافتہ پاکستان دی تشکیل وچ آپݨا فعال کردار ادا کریسی۔