جامعیت تے پائیدار ترقی کیتے پاکستان دا وژن دوحہ اعلامیہ دی روح نال ہم آہنگ اے، صدر مملکت آصف علی زرداری دا عالمی سربراہی کانفرنس نال خطاب

دوحہ/اسلام آباد (4 نومبر) صدر مملکت آصف علی زرداری سماجی انصاف، جامع ترقی تے عالمی یکجہتی کیتے پاکستان دے عزم دا اعادہ کریندے غربت مکاوݨ، مہذب کم کوں ودھارا ݙیوݨ تے ساریں کیتے برابری تے انسانی حقوق کوں یقینی بݨاوݨ دی لوڑھ تے زور ݙتے۔ صدر مملکت قطر دے دارالحکومت دوحہ وچ سماجی ترقی کیتے ݙوجھی عالمی سربراہی کانفرنس نال خطاب کریندے پئے ہن۔ صدر مملکت دوحہ سلسلہ اعلامیہ دی مکمل حمایت دا اظہار کریندے آکھیا جو جامعیت تے پائیدار ترقی کیتے پاکستان دا وژن دوحہ اعلامیہ دی روح نال ہم آہنگ اے۔ انہاں آکھیا جو پاکستان عوام کوں پالیسی دے مرکز وچ رکھݨ تے ثابت قدمی نال کاربند اے۔ صدر مملکت پاکستان دی ترقی کیتے “بینظیر انکم سپورٹ پروگرام” دا حوالہ ݙتا جئیں مالی معاونت، صحت دی ݙیکھ بھال تے تعلیم دے ذریعے 90 لکھ خانداناں کوں بااختیار بݨائے۔ انہاں آکھیا جو اے اقدام عالمی سطح تے سماجی تحفظ دے بہترین ماڈلز وچوں ہک دے طور تے سنڄاتا ویندے ۔ صدر آصف علی زرداری پائیدار ترقی دے ہدف کیتے پاکستان دے عزم دا اعادہ کریندے آکھیا جو اڳلے پنج سالاں وچ خواندگی کوں 90 فیصد تئیں ودھایا ویسی تے ہر ٻال دے سکول ونڄݨ کوں یقینی بݨایا ویسی۔ صدر مملکت “نیشنل یوتھ انٹرنشپ پروگرام” تے “گرین اینڈ ریزیلینٹ ہاؤسنگ پراجیکٹس” جیھے اقدامات دا ذکر وی کیتا جنہاں دا مقصد نوجواناں کوں بااختیار بݨاوݨ تے مینگروو بحالی جیھی فطرت تے مبنی حل دے ذریعے موسمیاتی لچک کوں مضبوط بݨاوݨ اے۔ صدر مملکت پاݨی کوں ہتھیار دے طور تے استعمال کرݨ تے سندھ طاس معاہدے دی خلاف ورزیاں تے وی گھاٹی تشویش کیتی تے انہاں کوں 24 کروڑ پاکستانیاں کیتے سنگین خطرہ قرارݙتا۔ انہاں آکھیا جو دوحہ اعلامیہ کوں عملی شکل ݙیوݨ کیتے عالمی مالیاتی اصلاحات، قرضیں وچ ریلیف، مساوی ٹیکس تے وسیع سماجی تحفظ دی ضرورت اے تے دنیا کوں وقار، مساوات تے یکجہتی دے ترائے ستوناں دے آسے پاسے متحد تھیوݨا چاہیدے ۔ صدر مملکت فلسطین وچ نسل کشی، نسل پرستی تے وݙے پیمانے تے خوراک دی قلت دی مذمت کریندے ہک منصفانہ تے دیرپا امن دا مطالبہ کیتا۔ انہاں کشمیری عوام کیتے پاکستان دی غیر متزلزل حمایت دا اعادہ کریندے آکھیا جو انصاف تے حق خودارادیت دے حصول وچ ݙوہیں جدوجہد ہک ہی سکے دے ݙو رخ ہن۔ صدر آصف علی زرداری آکھیا جو ترقی دا آغاز تے اختتام لوکاں دی بہتری نال تھیوݨا چاہیدے۔ انہاں آکھیا جو اساں کوں سارے اختلافات توں بالاتر تھی تے ہمدردی تے ترقی دے رستے تے ٹرݨا چاہیدے۔