بینچ تے بار انصاف دے ہک ہی نظام دے ݙو بنیادی ستون ہن،چیف جسٹس آف پاکستان یحییٰ آفریدی

اسلام آباد (4 نومبر) چیف جسٹس آف پاکستان یحییٰ آفریدی آکھیے جو بینچ تے بار انصاف دے ہک ہی نظام دے ݙو بنیادی ستون ہن تے عدالتی نظام دی مؤثر تے بروقت عملداری کیتے انہاں وچال مستقل رابطہ ناگزیر اے۔ عدلیہ تے وکلا وچال تعاون نال ہی انصاف ݙیوݨ دے عمل کوں مزید شفاف، منصفانہ تے عوام دوست بݨایا ونڄ سڳدے۔ اے ڳالھ انہاں سپریم کورٹ اسلام آباد وچ سپریم کورٹ بار ایسوسی ایشن (ایس سی بی اے) دی سبکدوش تے نویں منتخب کابینہ نال ملاقات دے دوران آکھی۔ ترجمان سپریم کورٹ موجب سبکدوش کابینہ دی قیادت رؤف عطا کیتی جݙاں جو نویں منتخب کابینہ دی سربراہی ہارون الرشید کیتی۔ چیف جسٹس آف پاکستان نویں منتخب عہدیداراں کوں مبارخ ݙیندے سبکدوش کابینہ دے تعاون تے خدمات دی تعریف کیتی۔ انہاں آکھیا جو سپریم کورٹ وچ جاری ادارہ جاتی اصلاحات دا مقصد شفافیت، عوامی رسائی تے کارکردگی وچ بہتری گھن آوݨ اے۔ چیف جسٹس ݙسایا جو پبلک فیسلیٹیشن سینٹرز مرکزی عدالت (پرنسپل سیٹ) تے ساری برانچ رجسٹریاں وچ قائم کیتے ڳئن، جتھاں وکلا تے سائلین کوں ہکی جاہ تے معلومات تے سہولتاں ݙتیاں ویندیاں پئن۔ انہاں آکھیا جو اے نظام مسلسل بہتری دے عمل وچ اے تے سارے اسٹیک ہولڈرز دی تعمیری تجویزاں دا خیرمقدم کیتا ویسی۔ چیف جسٹس آکھیا جو مقدمیں دی سماعت واضح پالیسی موجب مقرر کیتی ویندی پئی اے جیڑھی سپریم کورٹ دی ویب سائٹ تے دستیاب اے جݙاں جو وقتی سماعت دی درخواستاں تے میرٹ دی بنیاد تے فیصلہ کیتا ویندے۔ انہاں آکھیا جو عدالت دے امور کوں جدید ٹیکنالوجی دے ذریعے ڈیجیٹل کیتا ویندا پئے تاں جو اخراجات وچ کمی، شفافیت وچ ودھارا تے وکلا تے سائلین کوں سہولت ݙتی ونڄ سڳے۔ چیف جسٹس ایں عزم دا اعادہ کیتا جو سپریم کورٹ آئینی حدود وچ رہندے ہائی کورٹس دی انتظامی تے عدالتی خودمختاری دا مکمل احترام کریندی اے۔ چیف جسٹس یقین ݙیوایا جو سپریم کورٹ بار نال تعمیری تے کھلے رابطے کوں برقرار رکھیا ویسی تے وکلا برادری دے مسئلے کوں ترجیحی بنیاداں تے حل کیتا ویسی۔ سبکدوش کابینہ چیف جسٹس دے تعاون تے رہنمائی تے اظہار تشکر کیتا تے ایں ڳالھ دی تعریف کیتی جو انہاں ملک دے مختلف ضلعیں وچ وکلا نال ملاقاتاں دے ذریعے بار دے مسئلیں کوں نیڑے توں سمجھیا۔ نویں منتخب کابینہ یقین ݙیوایا جو او عدلیہ نال رل تے انصاف ݙیوݨ دے نظام کوں مزید مؤثر تے قابل رسائی بݨاوݨ کیتے بھرپور تعاون کریسی۔ ملاقات دے اختتام تے چیف جسٹس آف پاکستان سبکدوش کابینہ دے ارکان کوں شیلڈز پیش کیتے جݙاں جو سبکدوش کابینہ وی چیف جسٹس کوں یادگاری مومنٹو پیش کیتے۔