افغان عبوری حکومت نال مذاکرات جاری ہن، 27 ویں ترمیم تیکھے ایوان اچ پیش کریسوں، نائب وزیراعظم و وزیر خارجہ سینیٹر اسحاق ڈار

اسلام آباد۔ 4 نومبر(اے پی پی) نائب وزیراعظم و وزیر خارجہ سینیٹر اسحاق ڈار آکھیا جو 27ویں ترمیم سارے اتحادیاں نال مشورے دے بعد تیکھے ایوان اچ پیش کریسوں، افغان عبوری حکومت نال حالیہ کشیدہ صورتحال دے بعد مذاکرات جاری ہن، افغان قیادت کوں ݙسا ݙتا ڳئے جو افغان سرزمین پاکستان دے خلاف استعمال نئیں تھیوݨی چاہیدی، متحد تھی تے ملک توں دہشت گردی دا خاتمہ کیتا ونڄ سڳدے۔ منگل کوں ایوان بالا دے اجلاس اچ الیندے انہاں آکھیا جو ایوان بالا اچ قائد حزب اختلاف دا تقرر ضروری اے، پارلیمانی جمہوریت ہی مسئلیاں دا حل اے، اے ذمہ داری چیئرمین سینیٹ دی اے، او رولز اتے طریقہ کار دے مطابق قائد حزب اختلاف دا تقرر کریندن۔ انہاں آکھیا جو ترمیم دے حوالے نال کئی مہینیاں توں بحث جاری اے، ایوان اچ ترمیم گھن آوݨ حکومت دا حق اے، 27ویں ترمیم تیکھے ایوان اچ پیش کیتی ویسی۔ انہاں آکھیا جو آئین و قانون تے عمل کریندے ہوئے ارکان دی آراء دا احترام کیتا ویسی، کوئی فیصلہ جلدی اچ نا کیتا ویسی۔ انہاں آکھیا جو بلاول بھٹو زرداری اساݙے اتحادی ہن، اتحادیاں نال مشورے دا عمل جاری اے، سارے اتحادیاں کوں اعتماد اچ ڳھنسوں۔ انہاں 8 عرب اسلامک ملکاں دے وزرائے خارجہ دے استنبول اچ تھیوݨ آلے اجلاس اچ شرکت کیتی جیں اچ غزہ دی صورتحال تے ڳالھ کیتی ڳئی اتے پاکستان دا موقف بھرپور انداز اچ پیش کیتا ڳیا، پاکستان دی غزہ کیتے 23 امدادی کھیپاں پڄ چکی اے۔ سینیٹر عطا ء الرحمٰن دے نکتہ اعتراض تے الیندے سینیٹر اسحاق ڈار آکھیا جو پاکستان مسلم لیگ (ن) اپݨے دور حکومت اچ دہشت گردی دے خلاف جنگ اچ سارے وسائل ݙتن، آپریشن ضرب عضب، آپریشن رد الفساد شروع کیتے ڳئے، 2018 اچ ملک توں دہشت گردی ختم تھی چکی ہئی۔2021  اچ افغانستان اچ طالبان حکومت آئی، افغان قیادت نال مختلف شعبیاں اچ تعاون کیتے ڳالھ مہاڑ کیتی، ساݙا ہکو مطالبہ ہئی جو افغان سرزمین پاکستان اچ دہشت گردی کیتے استعمال نہ تھیوے۔ انہاں آکھیا جو افغانستان اساݙا برادر اسلامی اتے ہمسایہ ملک اے، ہمسائے بدلیے نئیں ونڄ سڳدے، موجودہ افغان عبوری حکومت دے دور اچ پاکستان اچ دہشت گردی دے واقعاں اتے شہادتیں اچ وادھا تھئے۔ انہاں آکھیا جو 2021 اچ پاک-افغان سرحد کُھلݨ نال پاکستان توں بھڄے ہوئے دہشت گرد ول آئے، اساکوں ماضی دیاں انہاں غلطیاں توں سبق سکھݨا چاہیدے۔ انہاں آکھیا جو ہݨ مسائل ٻہوں ودھ ڳئے ہن، دوحہ اتے ترکیہ اچ پاک-افغان مذاکرات جاری ہن، افغان قیادت کوں ہݨ وی ݙسا ݙتا ڳئے جو افغان سرزمین پاکستان دے خلاف استعمال نئیں تھیوݨی چاہیدی۔ انہاں آکھیا جو ملک اچ مدارس دی تعداد ݙیݙھ لکھ تئیں پڄ چکی اے، ملک توں دہشت گردی مکاوݨ کیتے متحد تھی تے کم کرݨا چاہیدے، بی ایل اے، فتنہ الخوارج اتے فتنہ الہندوستان افغانستان اچ موجود ہن۔