دوحہ۔ 5 نومبر(اے پی پی) صدر مملکت آصف علی زرداری دوحہ وچ قطر دے امیر شیخ تمیم بن حمد الثانی نال ملاقات کیتی۔ ایوان صدر دے پریس ونگ توں جاری بیان موجب امیر قطر صدر مملکت دا خیر مقدم کریندے انہاں دے دوحہ آوݨ تے شکریہ ادا کیتا۔ انہاں آکھیا جو قطر کوں پاکستان اتے ایں دی کامیابیاں تے ماݨ اے۔ امیرِ قطر پاکستانی کمیونٹی دے کردار دی تعریف کیتی …
صدر مملکت آصف علی زرداری دی دوحہ وچ قطر دے امیر شیخ تمیم بن حمد الثانی نال ملاقات
مزید خبراں
دوحہ۔ 5 نومبر(اے پی پی) صدر مملکت آصف علی زرداری دوحہ وچ قطر دے امیر شیخ تمیم بن حمد الثانی نال ملاقات کیتی۔ ایوان صدر دے پریس ونگ توں جاری بیان موجب امیر قطر صدر مملکت دا خیر مقدم کریندے انہاں دے دوحہ آوݨ تے شکریہ ادا کیتا۔ انہاں آکھیا جو قطر کوں پاکستان اتے ایں دی کامیابیاں تے ماݨ اے۔ امیرِ قطر پاکستانی کمیونٹی دے کردار دی تعریف کیتی اتے انہاں دی تعداد وچ خاطر خواہ ودھارا کرݨ دی خواہش دا اظہار کیتا۔ صدر مملکت امیرِ قطر کوں حکومت پاکستان اتے عوام دی طرفوں نیک تمناواں دا پیغام پُڄیندے قطر دی شاندار ترقی اتے امیر دی دور اندیش قیادت دی تعریف کیتی۔ ݙوہیں رہنماواں پاکستان اتے قطر وچال تاریخی اتے برادرانہ تعلقات دا اعادہ کیتا جنہاں دیاں پاڑاں ایمان، آپت دے اعتماد اتے امن، خوشحالی اتے امت مسلمہ دی ترقی کیتے سانجھیاں خواہشات تے مبنی ہن۔ صدر مملکت مکالمے اتے انسانی سفارت کاری دے ہک مرکز دے طور تے قطر دے ودھدے عالمی کردار دی تعریف کیتی اتے غزہ دے لوکاں کیتے جنگ بندی اتے انسانی امداد دی وکالت کرݨ وچ امیر قطر دی قیادت کوں خراج تحسین پیش کیتا۔ صدر آصف علی زرداری پاکستان دی غیر متزلزل یکجہتی دا اعادہ کریندے قطر دے خلاف اسرائیل دی جارحیت دی پاکستان دی طرفوں شدید مذمت اتے عالمی فورمز تے قطر دی خودمختاری کیتے ایں دی مسلسل سفارتی حمایت دا ذِکر کیتا۔ امیر قطر پاکستان اتے سعودی عرب دے اڄوکے دفاعی معاہدے تے اطمینان دا اظہار کریندے آکھیا جو اے ہک خوش آئند اتے وقتی اقدام اے جیڑھا پہلے تھیوݨا چاہیدا ہئی۔ انہاں آکھیا جو پاکستان چین، مغربی اتے خلیجی ریاستاں نال ہک ویلھے اسٹریٹیجک تعلقات برقرار رکھݨ آلے ملک دے طور تے ہک منفرد مقام رکھیندے۔ ݙوہیں رہنماواں سیاسی، اقتصادی اتے ثقافتی شعبیں وچ تعاون کوں مضبوط بݨاوݨ دے طریقیں تے ڳالھ مہاڑ کیتی۔ صدر مملکت دفاعی اتے دفاعی پیداوار وچ تعاون ودھاوݨ دی پیشکش کیتی جیں دا امیر قطر مثبت جواب ݙیندے آکھیا جو او متعلقہ حکام کوں پاکستان نال وقتی ڳالھ شروع کرݨ دی ہدایت کریسن۔ صدر مملکت زراعت اتے غذائی تحفظ وچ تعاون ودھاوݨ دی تجویز وی ݙتی۔ صدر مملکت پاکستان وچ ودھدی قطری سرمایہ کاری دا خیرمقدم کریندے ایں اعتماد دا اظہار کیتا جو امیر قطر دی قیادت وچ ݙوطرفہ تعاون ودھدا رہیے۔ انہاں قطر فنڈ فار ڈویلپمنٹ، ایجوکیشن ابوو آل فاؤنڈیشن اتے ٻئے قطری انسانی ہمدردی دے اقدامات دی وی تعریف کریندے تعلیم اتے ثقافتی تبادلے کوں اڳوں ودھاوݨ تے شیخہ موزہ بنت ناصر اتے شیخہ المیاسہ بنت حمد الثانی کوں خصوصی طور تے خراج تحسین پیش کیتا۔ صدر آصف علی زرداری افغانستان تے اقوام متحدہ دی زیر قیادت دوحہ عمل دے اجلاساں دی میزبانی اتے سہولت وچ قطر دے کردار دی تعریف کیتی جیں وچ مئی 2023 اتے فروری 2024 وچ تھیوݨ آلے پہلے اتے ݙوجھے دور دے اجلاس وی شامل ہن جیں انسانی ہمدردی، ترقی اتے سلامتی دے معاملیں تے بین الاقوامی رابطہ کاری دی حمایت کیتی اے۔ امیر قطر ایں امید دا وی اظہار کیتا جو پاکستان اتے افغانستان آپݨے موجودہ مسئلے حل کرگھنسن اتے اڄوکے چیلنجز توں اڳوں ودھسن۔ صدر مملکت امیر قطر کوں پاکستان دے دورے دی دعوت ݙیندے علاقائی امن، ترقی اتے سانجھی خوشحالی کیتے قطر نال آپݨی شراکت داری کوں مزید مستحکم کرݨ دے پاکستان دے عزم دا اعادہ کیتا۔ امیر قطر دعوت قبول کریندے صدر مملکت کوں ݙسایا جو او آوݨ آلے سال دے شروع وچ پاکستان دا دورہ کریسن۔ ملاقات وچ پاکستان پیپلز پارٹی دے چیئرمین بلاول بھٹو زرداری اتے قطر وچ پاکستان دے سفیر وی موجود ہن۔
