قائم مقام صدر سید یوسف رضا گیلانی نال ایشین فٹ بال کنفیڈریشن دے وفد دی شیخ سلمان ابراہیم حامد الخلیفہ دی قیادت وچ ملاقات

اسلام آباد۔ 5 نومبر (اے پی پی) قائم مقام صدر سید یوسف رضا گیلانی نال ایشین فٹ بال کنفیڈریشن اے ایف سی دے ہک وفد ٻدھ کوں اتھاں ایوان صدر وچ اے ایف سی دے صدر، فیفا دے سینئر نائب صدر اتے بحرین دے شاہی خاندان دے سینئر رُکن شیخ سلمان ابراہیم حامد الخلیفہ دی قیادت وچ ملاقات کیتی۔ ایوان صدر دے پریس ونگ توں جاری بیان دے موجب وفد وچ اے ایف سی دے جنرل سیکرٹری داتوک سری وِنڈسر پال جان اتے پاکستان فٹ بال فیڈریشن دے صدر سید محسن گیلانی شامل ہن۔ قائم مقام صدر فٹ بال گورننس کوں مضبوط بݨاوݨ اتے اے ایف سی اتے فیفا دے معیار موجب پاکستان فٹ بال فیڈریشن دے موثر کم کوں یقینی بݨاوݨ دے پاکستان دے عزم دا اعادہ کیتا۔ قائم مقام صدر نینگراں دی مصروفیت کوں ودھاوݨ دی اہمیت تے زور ݙیندے آکھیا جو نینگر پاکستان دی آبادی دی اکثریت تے مشتمل ہن ایں کیتے کھیݙاں دیاں سرگرمیاں دی منصوبہ بندی اتے ودھاوݨ ٻہوں ضروری اے۔ انہاں آکھیا جو فٹ بال دے بنیادی ڈھانچے کوں اپ گریڈ کرݨ اتے پورے پاکستان وچ یوتھ اکیڈمیاں دا قیام ایجھے شعبے ہن جتھاں اے ایف سی دی طرفوں تعاون اہمیت دا حامل ہوسی ۔ انہاں پاکستان وچ فٹ بال دی بحالی کیتے اے ایف سی دی مسلسل حمایت دی تعریف کریندے ڈومیسٹک مقابلیں دی بحالی اتے پاکستانی کھݙاریاں کیتے علاقائی اتے بین الاقوامی سطح تے مقابلے کیتے زیادہ موقع پیدا کرݨ دی لوڑھ تے زور ݙتا۔ سید یوسف رضا گیلانی شیخ سلمان ابراہیم حامد الخلیفہ اتے اے ایف سی دے وفد دا شکریہ ادا کریندے فٹ بال کوں ودھاوݨ اتے کھیݙاں دے ذریعے عوام وچال تعلقات کوں مضبوط بݨاوݨ کیتے اے ایف سی نال رَل تے کم کرݨ دے پاکستان دے عزم دا اعادہ کیتا۔