حکومت ٹیکنالوجی مینوفیکچرنگ اتے ڈیجیٹل ترقی ودھاوݨ کیتے پرعزم اے، شزہ فاطمہ خواجہ

اسلام آباد۔ 5 نومبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے جو کروم بُک اسمبلی لائن توں مقامی روزگار اتے صنعتی سرگرمیاں وچ ودھارا تھیسی ، حکومت ٹیکنالوجی مینوفیکچرنگ اتے ڈیجیٹل ترقی ودھاوݨ کیتے پرعزم اے۔ وزارت آئی ٹی و ٹیلی کام توں جاری بیان موجب وفاقی وزیر آئی ٹی شزہ فاطمہ خواجہ این آر ٹی سی ہری پور دا دورہ کیتا، پاکستان وچ امریکی سفارتخانہ دی ناظم الامور نٹالی بیکر وی انہاں دے رَلے ہئی ۔ گوگل دے وفد وچ گوگل گلوبل منیجنگ ڈائریکٹر کیون کیلز، کنٹری ڈائریکٹر پاکستان فرحان قریشی، عمر فاروق، چیف ایگزیکٹو افسر ٹیک ویلی اتے ٻئے آفیشلز شامل ہن۔ ایم ڈی این آر ٹی سی بریگیڈیئر (ر) محمد خالد، ڈپٹی ایم ڈی اتے انہاں دیاں ٹیماں وفد دا خیرمقدم کیتا۔ شرکاء کوں این آر ٹی سی دے اقدامات اتے کروم بُک اسمبلی منصوبے تے تفصیلی بریفنگ ݙتی ڳئی۔ بریفنگ دے بعد وفد کروم بُک اسمبلی لائن دا معائنہ کیتا۔ کروم بُک اسمبلی لائن گوگل، الائیڈ آسٹریلیا، این آر ٹی سی اتے ٹیک ویلی پاکستان دے اشتراک نال قائم کیتی ڳئی۔ اے سنگِ میل پاکستان دی ڈیجیٹل اتے معاشی خود انحصاری دی پاسے اہم قدم اے۔ وفاقی وزیر آئی ٹی شزہ فاطمہ خواجہ آکھیا جو اے منصوبہ وزیراعظم دے ڈیجیٹل نیشن وژن دی عملی تعبیر اے۔ انہاں آکھیا جو مقامی سطح تے کروم بُک اسمبلی نال نینگراں کوں سستی اتے معیاری ڈیجیٹل ڈیوائسز مِل سڳسن۔ کروم بُک اسمبلی لائن توں مقامی روزگار اتے صنعتی سرگرمیاں وچ ودھارا تھیسی ۔شزہ فاطمہ خواجہ آکھیا جو پاکستان سافٹ ویئر سروسز توں ہارڈویئر مینوفیکچرنگ دی پاسے پیشرفت کریندا پئے۔ ٹیک ویلی پاکستان نظامی انضمام اتے منصوبے دی تکمیل وچ کلیدی کردار ادا کیتا۔ حکومت ٹیکنالوجی مینوفیکچرنگ اتے ڈیجیٹل ترقی دے ودھاوݨ کیتے پرعزم اے۔ ہݨ اساں علاقائی ایکسپورٹس دے پاسے مضبوط پیشرفت کریسوں۔