ایران دے میڈیا وفد دا اے پی پی ہیڈ کوارٹرز دا دورہ، آپس دی دلچسپی دے معاملیاں تے ڳالھ مہاڑ

اسلام آباد۔ 5 نومبر(اے پی پی) اسلامی جمہوریہ ایران براڈکاسٹنگ (آئی آر آئی بی) دے اعلیٰ سطح دے وفد ٻدھ دے ݙینہہ ایسوسی ایٹڈ پریس آف پاکستان (اے پی پی) دے صدر دفتر دا دورہ کیتا اتے خبراں دے تبادلے بارط آپس دی دلچسپی دے معاملیاں تے ڳالھ مہاڑ کیتی۔ وفد اچ اسلامی جمہوریہ ایران براڈکاسٹنگ دے نائب صدر و عالمی سروس دے سربراہ احمد نوروزی، ڈائریکٹر جنرل عالمی امور، آئی آر آئی بی، عباس محمد نژاد، ڈائریکٹر، سحر یونیورسل نیٹ ورک، مرتضیٰ شمسی اتے آئی آر آئی بی، بلوچستان دے سربراہ علی محمدی نافچی شامل ہن۔ منیجنگ ڈائریکٹر، اے پی پی، محمد عاصم کھچی وفد کوں سرکاری خبر رساں ایجنسی دے کماں، پورے ملک اچ موجود بیوروز، سٹیشنز، ضلعی نامہ نگاراں اتے خبراں دی ترسیل بارے بریفنگ ݙتی اتے ݙسایا جو اے پی پی انگریزی، اردو، عربی، چینی، سندھی، بلوچی، پشتو، اتے سرائیکی سآدہا مختلف زباناں اچ سروسز ݙیندی پئی اے۔ انہاں سوشل میڈیا، رپورٹنگ، فیچر سروس، سفارتی و عالمی خبراں اتے ویڈیو نیوز سروس سآدہا مختلف خدمتاں دی وی تفصیل ݙسائی جو45  توں ودھ بین الاقوامی خبر رساں ایجنسیاں نال اے پی پی دے خبراں دے تبادلے دے معاہدے ہن۔ ایم ڈی اے پی پی وفد کوں ایرانی نیوز ایجنسی (ارنا) دے نال خبراں دے آپس دے تبادلے داں وی ݙسایا۔ انہاں آئی آر آئی بی نال معاہدے کیتے تفصیلی تجویز دی فراہمی تے زور ݙیتا۔ انہاں آکھیا جو پاکستان اتے ایران وچال تاریخی، مذہبی اتے ثقافتی تعلقات ہن۔ اساں میڈیا دے شعبے اچ ہک ݙوجھے دے تجربات توں ودھ فائدہ چا سڳدے ہیں۔ نائب صدر احمد نوروزی آکھیا جو آئی آر آئی بی، ایران دا اہم ستون اتے میڈیا تنظیم اے۔ انہاں ݙسایا جو آئی آر آئی بی دے تحت 100 توں ودھ چینلز، ݙو نیوز ایجنسیاں اتے ٻئے میڈیا ادارے کم کریندے پئن۔ خبراں دے تبادلے نال ݙوہیں ہمسایہ ملکاں وچال موجودہ ݙوطرفہ تعلقات کوں مزید وسعت ݙتی ونڄ سڳدی اے۔ انہاں آکھیا جو صحافیاں دے تربیتی پروگراماں نال آپس دے رابطے مضبوط بݨاوݨ اچ مدد مِلسی۔ علی محمدی نافچی آکھیا جو آئی آر آئی بی اتے اے پی پی وچال خبراں دا تبادلہ ݙوہیں ملکاں دے لوکاں کوں جڑیسی۔ عباس محمد نژاد آکھیا جو ایرانی عوام اعلیٰ معیار دی خبراں دی کوریج، تصویراں اتے سماجی اتے سیاسی مسئلیاں دی براہ راست نشریات اچ دلچسپی رکھدن۔

بعد اچ وفد اے پی پی دے مختلف سیکشنز بشمول اسٹوڈیوز اتے ڈیٹا سینٹر دا دورہ کیتا۔