وجیہہ قمر دی یونیسکو جنرل کانفرنس وچ پاکستان دی نمائندگی

سمرقند۔6نومبر(اے پی پی( تعلیم تے پیشہ ورانہ تربیت دی وزیر مملکت وزیر وجیہہ قمر صاحبہ ازبکستان دے شہر سمرقند وچ تھیوݨ آلی آلی اقوام متحدہ دے تعلیمی، سائنسی و ثقافتی ادارے (یونیسکو) دی 43ویں جنرل کانفرنس وچ پاکستان دی نمائندگی کریندے غزہ وچ تعلیمی اتے ثقافتی ڈھانچے دی بحالی وچ یونیسکو دے قائدانہ کردار ادا کرݨ تے زور ڈتے۔ ایں اجلاس وچ 194 رکن ملکاں دے نمائندے شامل ہن۔اپݨے خطاب وچ وجیہہ قمر صاحبہ آکھیا جو تعلیم، سائنس، ثقافت اتے ابلاغ کوں ودھاوݨ کیتے یونیسکو دے مشن نال پاکستان دی پکّی وابستگی اے۔ انہاں آکھیا جو اڄوکے عالمی حالات وچ، جئیں ویلھے دنیا کوں جھیڑیں، غلط معلومات، برداشت دی کمی تے ودھدی ہوئی نابرابری جہیں چیلنجز دا سامݨا اے، تاں بین الاقوامی تعاون اتے رابطہ کاری دی اہمیت پہلے توں ٻہوں ودھ چکی اے۔انہاں پاکستان وچ تعلیمی اصلاحات بارے حکومت دیاں ترجیحات بیان کریندے آکھیا جو حکومت تعلیم کوں جامع، جدید ٹیکنالوجی نال ہم آہنگ اتے ہنرمندانہ بنیاداں تے قائم کریندی پئی اے تاں جو نوجوان صرف روزگار کیتے نئیں بلکہ مستقبل دے چیلنجز کیتے وی تیار تھیون۔ انہاں مزید آکھیا جو پاکستان افغانستان، فلسطین، افریقہ اتے چھوٹے جزیرہ نما ترقی پذیر ملکاں دے طالب علماں کیتے تعلیمی مدد ݙیندا پئے اتے افغانستان کیتے ساڈھے چار ہزار وظیفیں وچوں تریجھا حصہ تریمتاں کیتے مختص اے۔وجیہہ قمر صاحبہ عالمی سطح تے تعلیمی بحراناں دا ذکر کریندے یونیسکو تے زور ڈتا جو او جنگ بندی دے بعد غزہ وچ تعلیمی اتے ثقافتی ڈھانچے دی بحالی وچ موہری کردار ادا کرے اتے دنیا بھر وچ سکول توں ٻاہر رہݨ آلے 27 کروڑ توں ودھ ٻالاں دی تعلیم کوں ودھاوݨ کیتے مزید چنڳے اقدامات کرے۔