حکومت فٹ بال سودھا سارے کھیڈاں اچ نینگراں کوں ہکو ڄھیں مواقع ݙیوݨ چاہندی اے، وزیر اعظم دی فیفا دے سینئر نائب صدر شیخ سلمان ابراہیم حماد الخلیفہ نال ڳالھ مہاڑ

اسلام آباد۔6نومبر(اے پی پی) وزیر اعظم محمد شہباز شریف ایشیاء اچ فٹ بال دی ترقی کیتے شیخ سلمان ابراہیم حماد الخلیفہ دی قیادت اچ ایشین فٹ بال کنفیڈریشن (اے ایف سی) دے کردار دی تعریف کریندے آکھیے جو حکومت فٹ بال سودھا سارے کھیڈاں اچ نینگراں کوں ہکو ڄھیں موقعے ݙیوݨ کیتے ردھی ہوئی اے۔ اے ڳالھ انہاں ایشین فٹ بال کنفیڈریشن دے صدر اتے فیفا دے سینئر نائب صدر شیخ سلمان ابراہیم حماد الخلیفہ نال الیندے آکھی جیڑھے وزیر اعظم کوں اسلام آباد اچ ملین۔ وزیر اعظم شہبازشریف صدر اے ایف سی دا خیر مقدم کریندے ایشیاء اچ فٹ بال دی ترقی کیتے شیخ سلمان ابراہیم حماد الخلیفہ دی قیادت اچ اے ایف سی دے کردار دی تعریف کیتی۔ وزیر اعظم حکومت دے ملک اچ کھیڈاں دے ودھارے کیتے کماں دا ݙسیندے آکھیا جو حکومت فٹ بال سودھا سارے کھیڈاں اچ نینگراں کوں ہکو ڄھیں ترقی دے موقعے ݙیوݨ اچ لڳی ہؤعی اے۔ وزیر اعظم پاکستان اچ فٹ بال دی ترقی، ایکوں خطے اچ فٹ بال دے کھیڈ دے حوالے نال ہک اہم مرکز اتے ہک خود مختار و میرٹ تے مبنی فٹ بال فیڈریشن ٻݨاوݨ دا عزم دوہرایا۔ وزیر اعظم پاکستان بشمول آزاد جموں و کشمیر و گلگت بلتستان اچ فٹ بال دی ترقی، کوچز اتے ریفریز دی فراہمی، اسٹیڈیمز، قومی تربیتی مراکز اتے ٹیلنٹ پاتھ ویز ٻݨاوݨ سانڳے پاکستان اتے اے ایف سی دے تعاون اچ دلچسپی ݙکھائی۔ وزیر اعظم پاکستان اچ اے ایف سی دے میچز دی میزبانی دی وی خواہش کیتی۔ شیخ سلمان ابراہیم حماد الخلیفہ آپݨی بے مثال میزبانی تے وزیر اعظم دا شکریہ ادا کیتا اتے پاکستان اچ فٹ بال دی ترقی کیتے اے ایف سی دے تعاون کوں دُہرایا۔