وزیر اعظم شہباز شریف “وکٹری ڈے” دی تقریبات اچ شرکت کیتے آذربائیجان دا دورہ کریسن، دفتر خارجہ

اسلام آباد۔ 7 نومبر (اے پی پی) وزیر اعظم محمد شہباز شریف جمہوریہ آذربائیجان دے صدر الہام علیوف دی دعوت اُتے باکو اچ “وکٹری ڈے” دی پنجویں سالگرہ اُتے تھیوݨ آلے جشن اچ شرکت کرݨ کیتے آذربائیجان دا سرکاری دورہ کریسن۔ دفتر خارجہ دے ترجمان ولوں جمعے کوں جاری کیتے گئے بیان موجب، دورے دے دوران وزیر اعظم شہباز شریف “وکٹری ڈے” دی سرکاری تقریبات اچ شریک تھیسن اتے صدر الہام علیوف نال ملاقات کریسن۔ گالھ مہاڑ اچ ݙو پاسہ تعلقات دے سارے پہلوواں دا جائزہ گھنݨ دے نال نال تجارت تے سرمایہ کاری، توانائی، دفاع، تعلیم اتے علاقائی رابطیاں سودھے مختلف شعبیاں اچ تعاون کوں ودھاوݨ کیتے نویں راہ ڳولݨ تے توجہ ݙتی ویسی۔ پاکستان اتے آذربائیجان وچال تریخ، ثقافت اتے آپسی اعتماد اُتے مبنی دیرینہ بھائی چارے دے تعلقات ہن۔ ڈوہیں ملک علاقائی اتے بین الاقوامی فورمز جیویں اسلامی تعاون تنظیم، اقتصادی تعاون تنظیم اتے اقوام متحدہ اچ وی تعاون برقرار رکھیندن۔ بیان دے مطابق، وزیر اعظم دا دورہ آذربائیجان دی خودمختاری اتے علاقائی سالمیت کیتے پاکستان دی پکی حمایت اتے ڈوہیں برادر ملکاں وچال سٹریٹجک شراکت داری کوں اگوں ودھاوݨ دے عزم دی نشاندہی کریسی۔