پاکستان اچ ہر بال کوں 13 بیماریاں دی ویکسین لاتی ویندی اے، 3 لکھ 97 ہزار ٻالاں کوں ہک وی ویکسین نئیں لڳی، وفاقی وزیر سید مصطفی کمال

اسلام آباد۔ 7 نومبر (اے پی پی) وفاقی وزیرِ برائے قومی صحت سید مصطفی کمال آکھیا جو پاکستان اچ ہر ٻال کوں 13 بیماریاں دی ویکسین لاتی ویندی اے، 3 لکھ 97 ہزار ٻالاں کوں ہک وی ویکسین نئیں لڳی جݙاں جو 4 لکھ 63 ہزار بالاں کوں 13 اچوں کجھ ویکسیناں لگین۔ اے ڳالھیں انہاں فیڈرل ڈائیکوریٹ آف امیونائزیشن اچ 118 موبائل وین کوں ویکسی نیشن مہم کیتے صوبیاں کوں بھیجݨ دی تقریب توں خطاب کریندیں ہوئیں کیت۔ انہاں آکھیا جو ملک اچ 3 لکھ 97 ہزار ٻالاں کوں ویکسین نئیں لگی۔ جنہاں ٻالاں دی ویکسی نیشن تھی ویندی اے او 13 بیماریاں توں محفوظ تھی ویندن۔ 4 لکھ 63 ہزار بالاں کوں کجھ بیماریاں توں بچاؤ دے ٹیکے ای لاتے ونڄ سڳین۔ انہاں آکھیا جو سارے ٻالاں کوں 13 مختلف بیماریاں توں بچاوݨ کیتے ویکسی نیشن پوری کراوݨی پوسی۔ اگر لکھاں بالاں دی ویکسی نیشن نئیں تھیسی تاں ہسپتال بھر ویسن۔ انہاں آکھیا جو 118 گاݙیاں صوبیاں کوں بھیجیندے پئیوں تاںجو ہر ٻال دی ویکسی نیشن ممکن بݨائی ونج سڳے۔ 8 لکھ بالاں دی حالت توجہ طلب اے انہاں کوں 13 اچوں کوئی بیماری وی لگ سڳدی اے۔ انہاں آکھیا جو اساں ہسپتال بݨا تے مریضاں دا انتظار کرݨ دے بجائے لوکاں کوں بیماریاں توں بچاوݨے۔ 24 کروڑ لوک ہن، ہر سال 65 لکھ بال پیدا تھیندے پئن، ہر گلی دے کُونے اچ ہسپتال بݨا گھنوں، علاج دی ضرورت ولا وی پوری نہ تھیسی۔ حفاظتی ٹیکہ جات موبائل وینز دا مقصد ایجھیں ٻالاں دے گھراں تئیں ونڄݨ اے جیڑھے ویکسین توں محروم ہن۔ انہاں آکھیا جو ملک اچ 1 کروڑ 30 لکھ لوک بیماریاں پاروں غربت دی لکیر دے ہیٹھ لڳیے ڳئن، 1 کروڑ 30 لکھ خاندان غریب کائنا ہن، بیماری دی وجہ توں او غریب تھی ڳئے، لوکاں دے گھر وِک ڳئے، سامان وِک ڳیا۔ انہاں آکھیا جو ویکسین کیتے 1166 نمبر ڈائل کر تے ٹیم کوں گھر سݙوا تے حفاظتی ٹیکے لواؤ۔ انہاں آکھیا جو کہیں جاہ 53 اتے کہیں جاہ 40 گاݙیاں ہن جݙاں جو آزاد کشمیر اتے گلگت بلتستان اچ صرف ہک ہک گاݙی کافی نئیں ۔ طے کریسوں جو کئیں کوں ٻئی گاݙیاں ݙیوݨی ہن۔ تقریب اچ پنجاب، خیبر پختونخوا، سندھ اتے بلوچستان دے نمائندیاں کوں گاݙیاں دی چابیاں ݙتی ڳئی جݙاں جو آزاد کشمیر، گلگت بلتستان اتے اسلام آباد کوں وی گاݙی دی چابیاں ݙتی ڳئی۔