وزیر اعظم شہباز شریف نال ایرانی پارلیمنٹ دے سپیکر ڈاکٹر محمد باقر قالیباف دی وفد دے نال ملاقات، ڈوہیں مسلم ملک دنیا اچ امن اتے مسلم امہ دے اتحاد کیتے پرعزم ہن، وزیر اعظم

اسلام آباد۔ 7 نومبر (اے پی پی) وزیر اعظم محمد شہباز شریف ایران دے نال ڈو پاسہ تجارت سمیت مختلف شعبیاں اچ تعاون ودھاوݨ دی خواہش کریندیں ہوئیں آکھیا جو ڈوہیں ملک عالمی امن، خوشحالی اتے علاقائی تعاون اُتے یقین رکھیندن اتے مسلم امہ دے اتحاد تے یگانگت کیتے گنڈھے ہوئن۔ وزیراعظم محمد شہباز شریف نال ایرانی پارلیمنٹ دے سپیکر ڈاکٹر محمد باقر قالیباف وفد دے نال جمعے کوں ملاقات کیتی۔ وزیر اعظم آفس دے میڈیا ونگ ولوں جاری کیتے گئے بیان موجب وزیر اعظم شہباز شریف ایران نال برادرانہ آپسی تعلقات دا ذکر کریندیں ہوئیں ایرانی پارلیمنٹ دے سپیکر اتے وفد دا استقبال کیتا۔ وزیر اعظم مسئلے حل کرݨ کیتے گالھ مہاڑ اتے سفارتکاری سویں پرامن طریقیاں اُتے ڈوہیں ملکاں دے پکے عزم کوں دہرایا۔ وزیر اعظم ایران دے سپریم لیڈر آیت اللہ علی خامنہ ای اتے صدر مسعود پزشکیان کیتے عزت اتے خیر سگالی دا سنیھا ݙتا۔ وزیر اعظم آکھیا جو ڈوہیں ملک ریاستی دہشت گردی اتے خودمختار ملکاں دے خلاف بغیر وجہ حملیاں دی سخت مذمت کریندن۔ پاکستان اتے ایران بدقسمتی نال دہشت گردی دا شکار رہین، ڈوہیں ملک پوری دنیا کیتے امن و خوشحالی اتے علاقائی تعاون دے علمبردار ہن۔ وزیر اعظم آکھیا جو پاکستان اتے ایران مسلم امہ دے اتحاد تے یگانگت کیتے سانجھے عزم رکھیندن۔ وزیر اعظم آکھیا جو پاکستان ایران دے نال آپسی فائدے دے مختلف شعبیاں بالخصوص معاشی تعاون اتے ݙو پاسہ تجارت کوں ودھاوݨ چاہندے۔ سپیکر ایرانی پارلیمنٹ وزیر اعظم، حکومت اتے پاکستان دے عوام دا اڄوکی ایران اسرائیل جنگ اچ بھرپور تعاون اتے حمایت اُتے دلوں شکریہ ادا کیتا۔ انہاں آکھیا جو ایرانی عوام ایران اسرائیل جنگ اچ پاکستان دی حمایت دی ڈھیر تعریف کریندن۔ پاکستان اتے ایران دنیا دے امن اتے مسلم امہ دے اتحاد اُتے یقین رکھیندے ہن۔ ایرانی سپیکر پاکستانی پارلیمنٹ دے نال مثبت تعاون دی تعریف کریندے ہوئیں سپیکر قومی اسمبلی ایاز صادق دا خاص شکریہ ادا کیتا۔ انہاں پاکستان دے نال مختلف شعبیاں بشمول معیشت اتے تجارت اچ تعاون کوں ودھاوݨ دے ایرانی عزم دا اظہار کیتا۔ ایرانی سپیکر ایران دے صدر مسعود پزشکیان ولوں وزیر اعظم اتے پاکستانی عوام کیتے نیک خواہشات دا وی اظہار کیتا۔ انہاں پاکستان دے دورے دے دوران چنگی میزبانی تے وی خاص شکریہ ادا کیتا۔ سپیکر قومی اسمبلی سردار ایاز صادق اتے وزیر اعظم دے خصوصی معاون برائے خارجہ امور سید طارق فاطمی وی ملاقات اچ موجود ہن۔