چیف جسٹس آف پاکستان نال سپریم کورٹ بار ایسوسی ایشن دے نویں چُݨیے ڳئے صدر ہارون الرشید، ٻئے عہدیداراں دی ملاقات

اسلام آباد۔ 7 نومبر (اے پی پی) سپریم کورٹ بار ایسوسی ایشن آف پاکستان دے نویں چُݨیے ڳئے صدر ہارون الرشید، سیکرٹری ملک زاہد اسلم اعوان اتے ایسوسی ایشن دی 28ویں کابینہ چیف جسٹس آف پاکستان جسٹس یحییٰ آفریدی نال ملاقات کیتی جیں اچ عدالتی نظام اچ بہتری اتے وکلاء دی چنڳائی متعلق ٻہوں سارے اہم معاملیں تے ڳالھ مہاڑ کیتی ڳئی۔سپریم کورٹ بار ایسوسی ایشن آف پاکستان (ایس سی بی اے پی) ولوں جاری کیتے ڳئے اعلامیہ موجب، بار دے صدر تجویز ݙتی جو ایڈووکیٹس آن سپیشل کاز (ASCs) کوں وی ایویں مقدمے دائر کرݨ دی اجازت ݙتی ونڄے جیویں ایڈووکیٹس آن ریکارڈ (AORs) کوں حاصل اے۔ مزید، عوامی سہولت مرکز اچ خدمتاں کوں بہتر بݨاوݨ کیتے صدر بار تجویز ݙتی جو ہک ڈپٹی رجسٹرار کوں ضمانتی مچلکیاں اتے ٻئے عدالتی معاملیں دے حل کیتے مقرر کیتا ونڄے۔ صدر بار نویں ضمانت دے مقدمیں دی وقتی سݨوائی اتے پراݨے مقدمیں دی فہرست بݨاوݨ متعلق معاملے وی چاتے۔اعلامیے موجب، چیف جسٹس کوں ݙسیا ڳیا جو نویں ضمانت دے مقدمے ݙو ہفتے دے اندر فہرست اچ شامل کیتے ویسن جݙاں جو پراݨے مقدمے موجودہ ترجیحی پالیسی موجب نبڑیندے رہسن۔ اعلامیے اچ آکھیا ڳیا جو بار روم اچ جاہ دی گھٹکی اتے تزئین و آرائش متعلق مسئلے وی زیر بحث آئے۔ صدر بار مزید تجویز ݙتی جو او وکلاء جیڑھے لمبے عرصے توں سپریم کورٹ اچ مستقل طور تے پیش تھیندے آندن، انہاں کوں سینئر ایڈووکیٹ آف سپریم کورٹ (Senior ASC) دا درجہ ݙیوݨ تے غور کیتا ونڄے۔اعلامیے موجب، ملاقات اچ اے عزم ظاہر کیتا ڳیا جو عدالت اتے بار وچال تعاون کوں ٻیا تکڑا بݨایا ویسی تاں جو عدالتی کارکردگی اچ بہتری آوے اتے عوام کوں ویلھے تے انصاف ݙیوݨ ممکن تھیوے۔