بین الپارلیمانی سپیکرز کانفرنس دے انتظامات مکمل، دنیا دے 40 توں ودھ ملکاں دے پارلیمانی رہنما شریک تھیسن

اسلام آباد۔ 7 نومبر(اے پی پی) اسلام آباد اچ بین الپارلیمانی سپیکرز کانفرنس دے انتظامات مکمل کر ڳھدے ڳئن، دنیا دے40 توں ودھ ملکاں دے پارلیمانی رہنما شریک تھیسن۔ سینیٹ سیکرٹریٹ توں جاری بیان موجب، مشیر چیئرمین سینیٹ میاں خرم رسول آکھیا جو چیئرمین سینیٹ اتے بانی چیئرمین انٹر پارلیمنٹری سپیکرز کانفرنس (آئی ایس سی) سید یوسف رضا گیلانی دے وژن اتے رہنمائی موجب کانفرنس دے سارے انتظامات کوں حتمی شکل ݙے ݙتی ڳئی اے، چیئرمین سینیٹ خود روزانہ دی بنیاد تے کانفرنس متعلق تیاریاں اتے انتظامی معاملیں دا جائزہ گھندے پئن۔ انہاں آکھیا جو انٹر پارلیمنٹری سپیکرز کانفرنس پاکستان کیتے ہک تریخی اتے سفارتی سنگِ میل دی حیثیت رکھیندی اے جیں اچ دنیا دے 40 توں ودھ ملکاں دے سپیکرز، ڈپٹی سپیکرز اتے پارلیمانی نمائندے شریک تھیسن۔ انہاں آکھیا جو کانفرنس امن، سکیورٹی اتے ترقی کوں ودھاوݨ دے موضوع اُتے اسلام آباد اچ11 توں 12 نومبر 2025 کوں تھیندی پئی اے۔میاں خرم رسول آکھیا جو چیئرمین سینیٹ سید یوسف رضا گیلانی کوں اپریل 2025 اچ سیول، جنوبی کوریا اچ تھیوݨ آلے اجلاس دے دوران انٹر پارلیمنٹری سپیکرز کانفرنس (آئی ایس سی) دا بانی چیئرمین متفقہ طور تے چُݨیا ڳیا ہئی، دنیا دے پارلیمانی رہنماواں متفقہ طور تے سید یوسف رضا گیلانی کوں ایں عہدے کیتے چُݨیا، اے انتخاب عالمی پارلیمانی برادری دے پاکستان اُتے اعتماد اتے عزت دا اظہاراے۔ انہاں آکھیا جوکانفرنس دے دوران مختلف سیشنز اچ پارلیمانی سفارتکاری سودھے اہم معاملیں تے ڳالھ مہاڑ کیتی ویسی۔ مزید، اجلاس اچ ماحولیاتی اقدام، پائیدار ترقی اتے وسیلے برابری تے ونݙݨ متعلق عملی تجویزاں وی زیر غور آسن، آپت دے تعاون دے نویں فریم ورکز تے وی مشورہ کیتا ویسی۔انہاں آکھیا جو چیئرمین سینیٹ سید یوسف رضا گیلانی دا وژن ہک پرامن، آپت اچ جُڑئے اتے ترقی یافتہ عالمی معاشرے دی تشکیل اُتے مبنی اے، پارلیماناں دا کردار صرف قانون بݨاوݨ تئیں محدود کائنی بلکہ امن، استحکام اتے پائیدار ترقی کوں ودھاوݨ اچ سرگرم شراکت داری اُتے مشتمل اے۔ اسلام آباد اچ تھیوݨ آلی اے عالمی کانفرنس پاکستان دے پارلیمانی تشخص، بین الاقوامی وقار، اتے سفارتی کردار کوں ٻیا روشن کریسی۔