استنبول: افغان طالبان مذاکرات، پاکستان شواہد نال جائز اتے منطقی مطالبات ثالثاں کوں پیش کر ݙتن، ترجمان دفتر خارجہ دی پریس بریفنگ

اسلام آباد۔ 7 نومبر(اے پی پی)دفتر خارجہ دے ترجمان طاہر حسین اندرابی آکھیے جو استنبول اچ افغان طالبان نال مذاکرات اچ مصروف پاکستانی وفد شواہد اُتے مبنی جائز اتے منطقی مطالبات ثالثاں دے حوالے کیتن جیںدا ہکو مقصد سرحد پار دہشت گردی مکاوݨ اے۔ اپݨی پریس بریفنگ اچ انہاں آکھیا جو افغان طالبان حکومت نال پاکستانی وفد دے مذاکرات استنبول اچ ثالثاں دی موجودگی اتے شرکت نال شروع تھئے۔ انہاں آکھیا جو ثالثاں ساݙے ݙتے ڳئے شواہد دے نال نال بین الاقوامی قانون اتے اصولاں دی بنیاد اُتے پاکستان دے موقف دی پوری حمایت کیتی اے، ثالث افغان طالبان دے وفد نال پاکستان دے مطالبات اُتے الیندے پئن، سوشل میڈیا اُتے کوئی وی ݙوجھی معلومات بالخصوص افغان ہینڈلرز اتے افغان اکاؤنٹس ولوں کھنݙݨ آلیاں معلومات بالکل افواہیں اتے ڄاݨ ٻڄھ تے غلط کھنݙایاں ویندیاں پین، ساݙی درخواست اے جو اینجھیاں غلط معلومات کوں نظر انداز کیتا ونڄے۔ صدر مملکت آصف علی زرداری دے 3 توں 6 نومبر تئیں دوحہ دے دورے بارے انہاں آکھیا جو صدر مملکت قطر دی میزبانی اچ سماجی ترقی دے عالمی سربراہی اجلاس اچ شریک تھئے۔ انہاں آکھیا جو صدر مملکت سربراہی اجلاس نال اپݨے اہم خطاب اچ تنازعہ جموں و کشمیر اتے کشمیری لوکاں دے حق خودارادیت دے حصول دی لازمی ضرورت کوں اڳونہا کیتے اتے زور ݙتے جو بھارت دے غیر قانونی طور تے زیر تسلط جموں و کشمیر دے لوک کئی ݙاہاکیاں توں بھارت دی ریاستی سرپرستی اچ دہشت گردی ٻھوڳیندے پئن۔ ترجمان آکھیا جو صدر مملکت بھارت ولوں سندھ طاس معاہدے دی خلاف ورزی دے معاملے اُتے وی گالھ کیتی، بھارت ڄاݨ بُڄھ تے بین الاقوامی قوانین دی خلاف ورزی کریندا پئے جیڑھا علاقائی استحکام کیتے براہ راست خطرہ اے اتے ایںدے نال لکھاں پاکستانیاں کوں انہاں دے پاݨی دے حق توں محروم کیتا ڳئے جیندے نال پاکستان دی خودمختاری کوں نقصان پُجیے اتے ایندے لوکاں دی معیشت کوں خطرہ لاحق تھئے، صدر مملکت فلسطین اُتے اسرائیلی جارحیت دی وی مذمت کیتی۔ ترجمان آکھیا جو نائب وزیر اعظم سینیٹر محمد اسحاق ڈار استنبول اچ ہک اجلاس دے دوران اپݨے عرب اتے اسلامی ہم منصباں نال غزہ اچ پائیدار امن قائم کرݨ کیتے امن منصوبے کوں اگو تے ودھاوݨ اُتے غور کیتا۔ ترجمان آکھیا جو پاکستان غزہ امن منصوبے دا حصہ بݨݨ آلے اٹھ عرب اسلامی ملکاں وچوں ہک اے اتے او ایں قدم نال جُڑیا رہے جیںدے پاروں شرم الشیخ اچ غزہ امن معاہدے اُتے دستخط تھئے۔ انہاں آکھیا جو انہاں رہنماواں فلسطینیاں کیتے فوری انسانی امداد دا مطالبہ اتے اسرائیل ولوں جنگ بندی دی خلاف ورزیاں دی مذمت کیتی۔ ترجمان آکھیا جو پاکستان اقوام متحدہ اتے او آئی سی دیاں قرارداداں دے مطابق 1967ء توں پہلے دیاں سرحداں اتے القدس شریف کوں دارالحکومت دے طور تے ہک آزاد، قابل عمل اتے جُڑی ہوئی ریاست فلسطین دے قیام کیتے اپݨے اصولی موقف دی تائید کیتی۔