اسلام آباد۔ 7 نومبر(اے پی پی)وزیراعظم محمد شہباز شریف باکو اچ آذربائیجان دے صدر الہام علییوو نال صدارتی محل اچ ملاقات کیتی اتے ݙوطرفہ تعلقات سودھا آپسی دے تعاون دے معاملیاں تے ڳالھ مہاڑ کیتی۔ ݙوہاں رہنمواں توانائی اتے دفاع سودھا مختلف شعبیاں اچ کثیر الجہتی تعاون کوں ٻیا ڳاکھاٹا کرݨ تے اتفاق کیتے۔ وزیر اعظم شہباز شریف آذربائیجان دے صدر دی خصوصی دعوت تے ہک ݙینھ دے دورے تے …
وزیراعظم شہباز شریف دی آذربائیجان دے صدر الہام علییوو نال ملاقات
مزید خبراں
اسلام آباد۔ 7 نومبر(اے پی پی)وزیراعظم محمد شہباز شریف باکو اچ آذربائیجان دے صدر الہام علییوو نال صدارتی محل اچ ملاقات کیتی اتے ݙوطرفہ تعلقات سودھا آپسی دے تعاون دے معاملیاں تے ڳالھ مہاڑ کیتی۔ ݙوہاں رہنمواں توانائی اتے دفاع سودھا مختلف شعبیاں اچ کثیر الجہتی تعاون کوں ٻیا ڳاکھاٹا کرݨ تے اتفاق کیتے۔ وزیر اعظم شہباز شریف آذربائیجان دے صدر دی خصوصی دعوت تے ہک ݙینھ دے دورے تے باکو اچ ہین جتھاں آرمی چیف فیلڈ مارشل سید عاصم منیر وی آذربائیجان دے صدر الہام علییوو نال ملاقات اچ وزیر اعظم دے نال ہن۔ الہام علییوو پاکستان دے وزیر اعظم اتے انہاں دے وفد کوں خوش آمدید اکھیا۔ وزیر اعظم شہبازشریف آذربائیجان دے یوم فتح دی تقریب اچ شرکت کیتے خصوصی دعوت ݙیوݨ تے الہام علییوو دا شکریہ ادا کیتا اتے آذر بائیجان دی حکومت اتے عوام کوں “یوم فتح “دی مبارک ݙتی۔ وزیراعظم آکھیا جو آذربائیجان دی فتح کشمیری اتے فلسطینی عوام کیتے امید دی لاٹ اے۔ وزیر اعظم آکھیا جو پاکستان دی حکومت اتے عوام آذربائیجان نال اپݨے تکڑے تعلقات دی نوعیت کوں ودھ اہمیت ݙیندن، ساݙی مذہبی اتے ثقافتی جڑت آپسی تعلقات دا ڳوڑھا دھاگہ اے، اساں ٻھرا ملک آذربآئیجان نال آپݨی ساڄھے داری کوں ٻیا ودھاوݨ چاہندے ہیں۔ ݙوہاں رہنماواں باہمی تجارت و سرمایہ کاری ودھاوݨ، تاریخی ثقافتی و باہمی تعلقات کوں ٻیا تکڑا کرݨ کیتے رابطہ کاری سانڳے ودھ اقدامات تے اتفاق کیتے۔ وزیر اعظم شہباز شریف آذربائیجان دے صدر الہام علیوف کوں اپݨی سہولت دے مطابق دورہ پاکستان دی دعوت ݙتی جیڑھی انہاں قبول کر ڳھدی۔ ایں توں پہلے باکو دے حیدر علییوو بین الاقوامی ہوائی اڈے تے پڄݨ تے آذزربائیجان دے اول نائب وزیراعظم یعقوب ایوبوو، آذربائیجان دے اول نائب وزیر خارجہ فریز رضایوو، آذر بائیجان اچ تعینات پاکستان دے سفیر قاسم محی الدین اتے سفارتی عملے وزیراعظم دا استقبال کیتا۔ وزیر اطلاعات و نشریات عطاء اللہ تارڑ وی وزیر اعظم دے نال ہین۔ اپݨے دورے اچ وزیر اعظم شہباز شریف آذربائیجان دے یومِ فتح دی تقریبات اچ شرکت کریسن۔ انہاں تقریبات اچ ترکیہ دے صدر رجب طیب اردوان وی باکو اچ موجود ہوسن۔ آزربائیجان اچ یوم فتح دی تقریبات مقبوضہ نگورنو کاراباخ دی آزادی اتے آرمینیا دے خلاف فتح سانڳے منایاں ویندن، جنگ اچ پاکستان اتے ترکیہ ودھ تے آذربائیجان دی حمایت کیتی ہئی۔
