وفاقی کابینہ دا اجلاس، 27 ویں آئینی ترمیم دا مسودہ منظور، کابینہ ارکان اتے اتحادی جماعتاں دے تعاون تے مشکور ہیں، وزیر اعظم محمد شہباز شریف

اسلام آباد۔ 8 نومبر(اے پی پی) وزیر اعظم محمد شہباز شریف دی صدارت اِچ وفاقی کابینہ دا اجلاس تھیا جِیںدے اِچ 27 ویں آئینی ترمیم دے مسودے دی منظوری ݙتی ڳئی۔ وزیرِ اعظم محمد شہباز شریف باکو توں ویڈیو لنک تے کابینہ اجلاس دی صدارت کیتی جِیںدے اِچ وفاقی کابینہ 27 ویں آئینی ترمیم دے مسودے دی منظوری ݙِتی اتے اُوندا بھرپور خیر مقدم کیتا۔ وزیر اعظم محمد شہباز شریف اجلاس اچ کابینہ ارکان دا خیر مقدم کیتا اتے اتحادی جماعتاں دا وی شکریہ ادا کیتا۔ کابینہ دی منظوری دے بعد وزیرِ اعظم دی ہدایت تے وزیرِ قانون و انصاف میڈیا کوں ترمیم بارے بریفنگ ݙِتی، کابینہ دی منظوری دے بعد ترمیم دے مسودے کوں پارلیمنٹ اچ پیش کیتا ویسی۔ وزیر اعظم محمد شہباز شریف آکھیا جو وفاق دے صوبیاں نال رشتے دی مضبوطی اتے ملک دے وݙّے مفاد اچ 27 ویں آئینی ترمیم کیتے رَل تے کوشش کیتی جِین٘دے کیتے وزارت قانون و انصاف، اٹارنی جنرل اتے اُنہاں دی ٹیم تعریف دے قابل اے۔ اُنہاں دا آکھݨ ہا جو 27 ویں آئینی ترمیم تے اپݨے قائد میاں محمد نواز شریف کوں اعتماد اِچ گھِدا اتے اُنہاں توں ایں تے رہنمائی گھِدی جِین٘دے تے اُنہاں دا مشکور ہاں۔ وزیرِ اعظم محمد شہباز شریف آکھیا جو صدر مملکت آصف علی زرداری کوں وی ترمیم دے حوالے نال اعتماد وِچ گھِدا اتے اُنہاں دی رضامندی تے اُنہاں دا شکریہ ادا کرینداں، سارے اتحادی جماعتاں دے سربراہان خاص کر بلاول بھٹو زرداری، ڈاکٹر خالد مقبول صدیقی، عبدالعلیم خان، خالد حسین مگسی اتے چوہدری سالک حسین دا شکر گزار ہِیں، جنہاں نال انہاں دے جماعتاں دے وفود نال خُود مشاورت کیتی اتے اُنہاں ایں مسودے دی بھرپور تائید کیتی۔ وزیرِ اعظم محمد شہباز شریف آکھیا جو ایمل ولی خان، اعجاز الحق اتے ٻئے سیاسی رہنماواں نال وی مشاورت کیتی اتے اُنہاں کوں آئینی ترمیم دے حوالے نال اعتماد وِچ گھِدا، اللہ دے فضل و کرم نال ملک اچ سیاسی و معاشی استحکام پاروں ملک دی سَمَت درست تھئی اے، ملکی ترقی و خوشحالی کیتے سَبّ کوں رَل تے کَم کرݨے۔