آئینی ترمیمی بل دا معاملہ: ججز دے تبادلے اتے ایگزیکٹو دے اختیارات گھٹ، فیلڈ مارشل دا اعزاز حیاتی تئیں رہسی: وزیر قانون

اسلام آباد۔ 8 نومبر(اے پی پی) فاقی وزیر قانون اعظم نذیر تارڑ آکھیے جو 27 ویں آئینی ترمیم دے تحت ججز دے تبادلے دے معاملے تے ایگزیکٹو (حکومت) دے اختیارات وچ کمی کیتی ڳئی اے، جݙاں جو فیلڈ مارشل دا اعزاز تاحیات برقرار رہسی۔ وفاقی کابینہ دے اجلاس توں بعد میڈیا نال ڳالھ مہاڑ کریندیں ہوئیں وفاقی وزیر قانون اعظم نذیر تارڑ ݙسایا جو وزیراعظم بَاکو توں ویڈیو لنک دے ذریعے کابینہ اجلاس دی صدارت کیتی، اجلاس اچ مختلف آئینی ترامیم تے غور کیتا ڳیا جیکوں سینٹ دے اجلاس اچ پیش کیتا ویسی۔ اعظم نذیر تارڑ آکھیے جو آئینی ترمیم دا بل سینٹ اچ پیش تھیوݨ توں بعد مشترکہ کمیٹی دے سپرد کیتا ویسی، حکومت ایں سلسلے اچ پیپلز پارٹی، ایم کیو ایم اَتے ٻیاں اتحادی جماعتاں نال مشورہ مکمل کر ڳھدے، چارٹر آف ڈیموکریسی اچ آئینی عدالت دے بارے ڄیڑھا پراݨاں وعدہ ہئی اوندے تے اتفاق رائے تھی ڳیا۔ وزیر قانون آکھیا جو ججز دے تبادلے دے معاملے تے ایگزیکٹو دے اختیارات گھٹ کرݨ اَتے ایں اختیار کوں جوڈیشل کمیشن دے سپرد کرݨ دی تجویز ݙتی ڳئی اے۔ انہاں ݙسیا جو خیبر پختونخواہ دے سینٹ انتخابات تاخیر دا شکار تھیئن، ایں قانونی مسئلے کوں حل کرݨ کیتے وی ترمیمی تجویزاں شامل کیتیاں ڳئن تاں جو انتخابات ہکے ویلھے تے یقینی بݨائے ونڄ سڳݨ، ایںدے نال بلوچستان اسمبلی دے حلقیاں اچ اضافے بارے ترمیم وی زیرِ غور اے۔ انہاں آکھیا جو مجوزہ ترمیم اچ ابہام (وہم) دور کیتے ڳئے ہن، ایں توں علاوہ ایڈوائزرز دی تعداد ودھا تے 7 کرݨ دی تجویز ݙتی ڳئی اے جݙاں جو آرٹیکل 243 وچ وی ترمیم پیش کیتی ڳئی اے جیندے تحت تقرری دے طریقے کار اچ تبدیلی کیتی ڳئی اے، 1973 دے آئین توں پہلے فیلڈ مارشل دا عہدہ موجود ہئی جیکوں ختم کیتا ڳیا ہئی، فیلڈ مارشل دا اعزاز حیاتی تئیں برقرار رہسی۔ وزیر قانون ݙسیا جو آئین دے آرٹیکل 140 اے اچ وی ترمیم دی تجویز شامل اے، ایم کیو ایم دے ایں آرٹیکل دے بارے بل کوں وی کمیٹی دے سامݨے ڳھن آیا ویسی، حکومت اتحادی جماعتاں تے زور ݙیسی جو او ایں ترمیم دی منظوری وچ تعاون کرن۔