آذربائیجان دا یوم فتح، پاکستان ترکیہ اتے آزر باعیجان دے دل کٹھے دھڑکدن، وزیراعظم محمد شہباز شریف دی شرکت اتے تقریب نال خطاب

باکو۔ 8 نومبر(اے پی پی) وزیراعظم محمد شہباز شریف آکھیے جو بھارت دی جارحیت دے خلاف ترکیہ اَتے آذربائیجان دی یکجہتی تے شکریہ ادا کریندaں، دشمن دے 7 بہترین جنگی جہاز ݙھوائن۔ آذربائیجان دے یوم فتح دی تقریب نال خطاب کریندے ہوئیں وزیراعظم شہباز شریف آکھیا جو صدر آذربائیجان دا تقریب اچ شرکت دی دعوت ݙیوݨ تے شکر گزار ہاں، یوم فتح دی تقریب اچ شامل تھیوݨ میݙ کیتے وݙے ماݨ دی ڳالھ اے۔ انہاں آکھیا جو پاکستان دے لوکاں ولوں آذربائیجان دی حکومت اَتے عوام کوں یوم فتح دی مبارکباد پیش کرینداں، پاکستان، ترکیہ، آذربائیجان تریئے ٻھرا ملک ہن، اساڈے دل کٹھے دھڑکدن، تریئے برادر ملکاں کئی واری اپݨی دوستی اَتے یکجہتی دا ثبوت ݙتے۔ وزیراعظم آکھیا جو حق دے معرکے دی کامیابی دے جشن اچ آذربائیجان دے دستے دی شرکت وݙی اہمیت رکھیندی ہئی، آزادی کیتے جدوجہد، پکا ارادہ اَتے حوصلہ ضروری اے، پاکستان ہمیشہ آذربائیجان دے منصفانہ موقف دا ساتھ ݙتا۔ انہاں آکھیا جو بھارت دی جارحیت دے خلاف ترکیہ اَتے آذربائیجان دی بھرپور یکجہتی تے اساں شکر گزار ہیسے، پاک فوج دشمن دے ݙند کھٹے کیتے، پاکستان دشمن دے 7 بہترین جنگی طیارے مار ݙھوائن۔ وزیراعظم آکھیا جو گزریل کامیابیاں دا جشن منیندے ہوئیں ساکوں مستقبل تے وی اکھ رکھݨی اے، حق دے ایں معرکے اچ دنیا پاکستان دیاں صلاحیتاں ݙٹھیاں، پاکستان، آذربائیجان اَتے ترکیہ ہمیشہ اپݨی دوستی اَتے یکجہتی دا ثبوت ݙتے، ایں سلسلے کوں اڳو وی جاری رکھیا ویسی۔ وزیراعظم شہباز شریف تقریب دے چھیکڑ تے علامہ اقبال دا ہک شعر وی پڑھیا۔