تعلیم اچ ترقی ہی ملک اَتے معاشرے دے روشن مستقبل دی ضمانت اے، وفاقی وزیر اطلاعات عطاء اللہ تارڑ دا لاہور لیڈز یونیورسٹی دے کانووکیشن نال خطاب

لاھور۔ 9 نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو تعلیم اچ ترقی ہی مُلک اَتے معاشرے دے روشن مستقبل دی ضمانت اے، پاکستان دے نینگراں دے ہُنر اَتے تخلیقی صلاحیتاں دی دنیا معترف اے، وزیر اعظم شہباز شریف نینگراں کُوں بااختیار بݨاوݨ دیاں پالیسیاں بݨائن، سارے مُلک دے نینگراں کُوں برابر دے موقع مِلدے پئن۔ آݙت کوں لیڈز یونیورسٹی لاھور دے کانووکیشن نال وِڈیو لِنک تے خطاب کریندے وفاقی وزیر اطلاعات یونیورسٹی دے فارغ التحصیل طالبِ علماں کیتے نیک خواہِشات پچیندے آکھیا جو طالبِ علم جیڑھے خواب گھِن تے اپݨی فِیلڈ اچ آئے اَتے اَڄ اِیں مقام تے پُڄین، مَیں اُنہاں دی محنت کُوں سلام کرینداں، اڄ تہاکوں اپݨے والدین دیاں دُعاواں اَتے وݙی محنت نال اے مقام ملیے۔ اُنہاں لیڈز یونیورسٹی، فیکلٹی، وائس چانسلر، چیئرمین بورڈ آف گورنرز کُوں مُبارکباد ڈیندے ہوئیں آکھیا جو لیڈز یونیورسٹی دا تعلیم کُوں وَدھاوݨ اچ اہم کِردار اے جِتھاں جدید ٹیکنالوجی اَتے نویں علُوم نال طالبِ علِماں کُوں ہمکنار کیتا ویدا پئے، تعلیم دا شعبہ ٻئے سارے شعبیاں اچوں معزز سمجھیا ویندے، علم حاصِل کرݨ اَتے اِیکُوں اَڳُوں لوکاں تئیں پچاوݨ ٻہُوں اہم فریضہ اے۔ وفاقی وزیر عطاء اللہ تارڑ آکھیا جو ملک دی ترقی کیتے تعلیمی اداریاں، استاداں اَتے طالبِ علِماں دا وݙا کِردار اے، تعلیم اچ ترقی ای مُلک اَتے معاشرے دے روشن مستقبل دی ضمانت اے، ساݙی آبادی دا 68 فیصد حِصہ نینگراں تے مُشتمل اے، نینگر ساݙے روشن مستقبل دی ضمانت ہِن، نینگراں کُوں ہُنر نال تربیت ݙیوݨ ویلھے دی اہم لوڑھ اے جیکوں لیڈز یونیورسٹی چنڳے طریقے نال کریندی پئی اے۔ اُنہاں آکھیا جو پاکستان دے نینگراں دیاں صلاحیتاں اَتے ہُنر دی ساری دنیا معترف اے، اُنہاں دیاں تخلیقی صلاحیتاں کُوں عالمی سطح تے منیا ویندا پئے۔ اُنہاں آکھیا جو وزیر اعظم شہباز شریف نینگراں کُوں بااختیار بݨاوݨ دیاں پالیسیاں بݨائن، حال ہی وِچ لیپ ٹاپ ون٘ڈݨ دی تقریب تھئی، ایں سال ہک لکھ لیپ ٹاپ میرٹ تے طالب علماں کوں ݙتے ونڄݨن جݙاں جو ساݙے مُختلف دوراں اچ یارھاں لکھ توں ودھ لیپ ٹاپ ݙتے ڳن۔ عطاء اللہ تارڑ آکھیا جو پورے مُلک بلوچستان، خبیر پختونخواہ، سندھ، پنجاب، آزاد کشمیر اَتے گلگت بلتستان توں ٹیلنٹ اُبھر تے سامݨے آندا پئے۔ وزیر اعظم دا خاص فوکس اے ہے جو نینگراں کوں مہارتاں نال بااختیار بݨایا ونڄے تاں جو او نہ صِرف زندگی اچ اڳوں ودھن ٻھل ہر فیلڈ وچ پاکستان دا ناں روشن کرن۔ اُنہاں آکھیا جو ساݙی ترجیح ایہو اے جو پاکستان دے نینگر کہیں توں پِچھوں نہ رہون۔ اُنہاں آکھیا جو وزیر اعظم ٻہوں پہلے آکھیا ہئی جو نینگراں تے کیتی ونڄݨ والی سرمایہ کاری ساݙے مُلک دے مستقبل دی سرمایہ کاری اے۔ اُنہاں آکھیا جو تعلیم، مہارتاں اَتے آئی ٹی دے حَوالے نال وزیر اعظم دی ہمیشاں خاص توجّہ رہی اے۔ اُنہاں آکھیا جو میکوں ماݨ اے جو میں اوں ٹیم دا حِصہ ہاں جیندا فوکس نینگراں دی تعلیم، جدید علُوم اَتے جدید ٹیکنالوجی نال آراستگی اے۔ وفاقی وزیر اطلاعات ہِک واری ول طالب علماں کیتے نیک خواہشات پچیندے آکھیا جو اللہ تعالیٰ تہاکوں ٻیاں کامیابیاں ݙیوے، تساں جیڑھے شعبے اچ وی ونڄو، اپݨے والدین، خاندان اَتے ملک اَتے قوم دا ناں اُچا کرو۔