بین الپارلیمانی سپیکرز کانفرنس اچ شرکت کیتے بہوں سارے مُلکاں دے پارلیمانی وفد اسلام آباد پڄ گئے

اسلام آباد۔10نومبر (اے پی پی) بین الپارلیمانی سپیکرز کانفرنس اچ شرکت کیتے بہوں سارے مُلکاں دے پارلیمانی وفد، جنہاں اچ سعودی عرب، کینیا، فلسطین، مراکش، روانڈا، مالدیپ، ملائشیا، فلپائن، الجیریا، بارباڈوس اتے سربیا دے وفد وی شامل ہن، او کانفرنس اچ شرکت کیتے پڄ گئِن۔ سنوار کوں سینیٹ سیکرٹریٹ ولوں جاری تھیوݨ آلے بیان موجب، سعودی عرب دے وفد دی اڳواݨی نائب چیئرمین شوریٰ کونسل عبداللہ بن عدم فلاتعہ کریندے پئن جڈاں جو وفد اچ ڈاکٹر عثمان ہاکامانی، عبداللہ اطلاس اتے ڈاکٹر معین المدنی شامل ہن۔ کینیا دے وفد دی قیادت ڈپٹی سپیکر فراح مالم محمد، فلسطین دے وفد دی سربراہی سپیکر قومی کونسل روحی احمد محمد فتوح، مراکش دے وفد دی قیادت سپیکر ہاؤس آف کونسلرز محمد ولد الرشید کریندے پئن۔ روانڈا دے وفد دی سربراہی صدر سینیٹ فرانکیوس ژیویر، مالدیپ دے وفد دی قیادت سپیکر پارلیمان عبد الرحیم عبداللہ، اتے ملائیشیا دے وفد دی سربراہی ایوان بالا دے نائب صدر نور جزلان بن محمد کریندے پئے ہن۔ الجیریا دے وفد دی قیادت رکن پارلیمنٹ سعد اروس، بارباڈوس دے وفد دی قیادت اسپیکر آرتھر یوجین ہولڈر جڈاں جو سربیا دے وفد دی قیادت ڈپٹی سپیکر ایڈن ڈرلیک کریندے پئن۔ ایئرپورٹ تے وفداں دا بہوں چنگا استقبال سینیٹر ندیم احمد بھٹو، سینیٹر سرمد علی اتے سینیٹ سیکرٹریٹ دے سینیئر افسراں کیتا۔ وفداں دے معاون عملہ اتے وݙے حکام وی انہاں دے نال موجود ہن۔ اے کانفرنس چیئرمین سینیٹ سید یوسف رضا گیلانی دی دور اندیش اڳواݨی اتے بین الاقوامی پارلیمانی تعاون کوں ودھاوݨ دی علامت اے۔ بین الپارلیمانی سپیکرز کانفرنس 11 توں 12 نومبر 2025ء تئیں اسلام آباد اچ جاری رہسی۔ اے عالمی ایونٹ امن، آپس دے تعاون اتے پارلیمانی سفارتکاری کوں ودھاوݨ اچ اہم سنگِ میل ثابت تھیسی، اتے مختلف مُلکاں دے پارلیمانی اداریاں وچال تعلقات کوں ٻیا مضبوط بݨیسی۔