وزیراعظم شہباز شریف ولوں کیش لیس معیشت دے اقدامات تے اطمینان دا اظہار، مقررہ ویلھے اچ اہداف حاصل کرݨ دی ہدایت

اسلام آباد۔10نومبر (اے پی پی) وزیراعظم محمد شہباز شریف کیش لیس معیشت دے حوالے نال اقدامات تے اطمینان کریندیں ہوئیں ہدایت کیتی اے جو مقررہ ویلھے اچ طے شدہ اہداف کوں حاصل کیتا ونجے۔ سنوار کوں وزیراعظم آفس دے میڈیا ونگ ولوں جاری تھیوݨ آلے بیان موجب، وزیراعظم محمد شہباز شریف دی سربراہی اچ کیش لیس معیشت دے جاری اقدامات تے جائزہ اجلاس تھیا۔ اجلاس اچ وفاقی وزراء احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، وزیر مملکت بلال اظہر کیانی، گورنر سٹیٹ بنک جمیل احمد، چیئرمین نادرا لیفٹینینٹ جنرل محمد منیر افسر، چیئرمین ایف بی آر راشد محمود لنگڑیال اتے متعلقہ وݙے حکام شرکت کیتی۔ وزیراعظم اجلاس توں خطاب کریندیں ہوئیں آکھیا جو معیشت کوں کیش لیس کرݨ کیتے جاری اقدامات دا مُلکی معیشت دی پائیدار ترقی اچ بہوں وݙا کردار ہوسی۔ انہاں ہدایت کیتی جو مکمل طور تے کیش لیس معیشت اتے غیر رسمی معیشت دے خاتمے کیتے دیہی علاقیاں اچ آگاہی ودھائی ونجے، پوری دنیا ڈیجیٹل معیشت آلے پاسے تکھے ویندی پئی اے، پاکستان کوں وی دنیا دے نال قدم رلا تے ٹُرݨا پوسی، پہلے ݙینہہ توں پاکستان کوں ڈیجیٹل نیشن بݨاوݨ کیتے اقدامات کوں ترجیح ݙتی گئی جئیں دے چنگے نتیجے سامݨے آندے پئن۔ وزیراعظم آکھیا جو رمضان المبارک اچ مُلکی تاریخ اچ پہلی واری مستحقین کوں بینظیر انکم سپورٹ پروگرام دی رقم ڈیجیٹل والٹس دے ذریعے بھیجی گئی، کیش لیس معیشت دے ذریعے گورننس اچ بہتری اتے کرپشن اچ بہوں ودھ گھٹکی آسی۔ وزیراعظم ہدایت کیتی جو کیش لیس معیشت دے مقرر کردہ اہداف کوں مقررہ ویلھے اچ پورا کرݨ یقینی بݨایا ونجے۔ انہاں موجودہ پیش رفت کوں اطمینان بخش آکھیا اتے وزارت خزانہ، وزارت انفارمیشن ٹیکنالوجی، ایف بی آر، سٹیٹ بنک اتے متعلقہ اداریاں دے کم دی تعریف کیتی۔ اجلاس کوں وزیراعظم دے کیش لیس معیشت دے وژن دے تحت حکومتی اقدامات تے پیش رفت توں آگاہ کریندیں ہوئیں ݙسایا گیا جو بجلی اتے گیس دے بِلّاں تے راست کیو آر کوڈز دے ذریعے ادائیگی کوں کیش لیس کیتا ویندا پئے جئیں دی وجہ توں ارباں روپے دے بِلّاں دی ادائیگی ہݨ ڈیجیٹل نظام دے ذریعے ممکن تھئی اے۔ وزیراعظم کوں بینظیر انکم سپورٹ پروگرام دے تحت ہک کروڑ ڈیجیٹل والٹس تے تھیوݨ آلی پیش رفت توں وی آگاہ کیتا گیا۔ اجلاس کوں ݙسایا گیا جو والٹس ایں مہینے دے چھیکڑ تئیں مکمل طور تے فعال تھی ویسن اتے مستحقین کوں رقم دی اڳوں آلی قسط ایں دے ذریعے بھیجی ویسی۔ ایں دے علاوہ، اسلام آباد اچ سرکاری سروسز گھنݨ کیتے بݨائی گئی موبائل ایپلی کیشن کوں ‘راست’ نال جوڑ ݙتا گئے اتے ادائگیاں ایں نال کیتی ویندی پئن۔ اسلام آباد اچ نویں کاروبار کھوݪݨ کیتے لائسنس کوں ڈیجیٹل ادائگیاں دے نظام نال مشروط کیتا گئے اتے موجودہ ساریاں دکاناں تے راست کیو آر کوڈز دے ذریعے ادائگیاں دی سہولت ݙے ݙتی گئی اے، مُلک اچ ڈیجیٹل بنکس بݨاوݨ کیتے لائسنس جاری کیتے ویندے پئن۔ اجلاس کوں ݙسایا گیا جو ایں اقدامات نال ہݨ تئیں مُلک دی 68 فیصد آبادی دی مالی شمولیت (فنانشل انکلوژن) کر ڳھدی گئی اے جڈاں جو اڳوں آلے سال ایں اچ ٻیا ودھارا کیتا ویسی۔ وزیراعظم ہدایت کیتی جو مالی شمولیت دا دائرہ کار ٻیا ودھایا ونجے۔ اجلاس کوں اڳوں آلے سال دے اہداف دے بارے اچ وی بریفنگ ݙتی گئی۔ وزیراعظم کیش لیس معیشت دے حوالے نال اقدامات دی پیش رفت تے اطمینان ظاہر کریندیں ہوئیں طے شدہ اہداف کوں مقررہ ویلھے اچ پورا کرݨ دی ہدایت کیتی۔