چھل پاروں فصلاں دا ضیان تھئے، صوبہ خیبر پختونخوا کوں جتنی کݨک دی لوڑھ اے وقتی ݙیسوں، رانا تنویر حسین

اسلام آباد۔10نومبر(اے پی پی) وفاقی وزیر قومی غذائی تحفظ اتے تحقیق رانا تنویر حسین آکھیا جو چھل پاروں فصلاں دا ضیان تھئے ، چاول 12 فیصد، ڳنّا 3 فیصد گھٹ تھئے تے باقی جیڑھی اجناس ملی ہن او مکمل طور تے استعمال دے قابل ہن، صوبہ خیبر پختونخوا کوں جِتنی کݨک دی لوڑھ ہوسی، اساں وقتی ݙیسوں ۔انہاں قومی اسمبلی وچ خطاب کریندے ہماء اختر چغتائی دے سوال دے جواب وچ ݙسیا جو اجناس دی کمی دے حوالے نال سروے کرایا ڳئے۔ چاول دی فصل وچ 11 فیصد تئیں کمی تھئی اے۔ ربیع وچ کسان دا ضیان پورا کرݨ کیتے انہاں کوں بج، کھاد مفت ݙیندے پیوں اتے 100 ارب روپے بلاسود قرض وی کاشتکاراں کوں ݙتا ویندا پئے۔انہاں ݙسایا جو چھل توں غذائی اجناس دی پیداوار وچ کمی تھئی اے۔ انہاں ݙسیا جو صوبیں کنے آپݨی لوڑھ دی کݨک پئی اے، وفاق کنے سٹوریج ایں کیتے ہوندی اے جو جیں صوبے کنے کمی ہووے، انھاں کوں ݙیوے۔ کے پی 8 لکھ ٹن کݨک دی کمی دی ڳالھ کیتی جئیں تے اساں انہاں کوں پیشکش کیتی جو او اپݨی ڈیمانڈ ݙساون اتے کݨک گھن ونڄن جئیں تے انہاں پہلے ہک لکھ ٹن دی ڳالھ کیتی پرحالی تئیں صوبے ولوں کوئی ڈیمانڈ وصول نئیں تھئی۔ وفاق توں صوبے کوں جِتنی کݨک چاہیدی اے او وقتی ݙیوݨ کیتے تیار اے