سکیورٹی فورسز دیاں صوبہ خیبرپختونخوا وچ ݙو انڄ انڄ کاروائیاں، بھارتی پراکسی فتنہ الخوارج نال تعلق رکھݨ آلے 20 خوارج جہنم واصل

راولپنڈی۔10نومبر (اے پی پی) سکیورٹی فورسز صوبہ خیبرپختونخوا وچ ݙو انڄ انڄ کاروائیاں وچ بھارتی پراکسی فتنہ الخوارج نال تعلق رکھݨ آلے 20 خوارج مار ݙتن۔ پاک فوج دے شعبہ تعلقات عامہ (آئی ایس پی آر) توں جاری بیان موجب، سکیورٹی فورسز دیاں 8 اتے 9 نومبر کوں صوبہ خیبرپختونخوا وچ ݙو انڄ انڄ کاروائیاں وچ بھارتی حمایت یافتہ فتنہ الخوارج نال تعلق رکھݨ آلے 20 خوارج ماریے ڳئن۔خوارج دی موجودگی دی اطلاع تے سکیورٹی فورسز ولوں ضلع شمالی وزیرستان دے علاقے شوال وچ انٹیلی جنس تے آپریشن کیتا ڳیا۔ آپریشن دے دوران سکیورٹی فورسز خوارج دے ٹھکاݨے دا چنڳے طریقے نال گھیراؤ کیتا اتے 8 بھارتی حمایت یافتہ خوارج کوں جہنم واصل کر ݙِتا۔انٹیلی جنس تے ہک ٻیا آپریشن ضلع درہ آدم خیل وچ کیتا ڳیا اتے فائرنگ دے تبادلے دے بعد مزید 12 خوارج کوں چنڳے طریقے نال بے اثر کر ݙتا ڳیا۔آئی ایس پی آر آکھیے جو سکیورٹی فورسز اتے قانون نافذ کرݨ آلے اداریں ولوں وژن “عزم استحکام” دے تحت دہشت گردی دے خلاف مہم دے طور تے علاقے وچ پاتے ونجݨ آلے کہیں وی ٻئے ہندوستانی حمایت یافتہ خارجی کوں ختم کرݨ کیتے صفائی دیاں کاروائیاں کیتیاں ویندیاں پئیاں ہن جیڑھی دہشت گردی دے مُلکی اتے غیر مُلکی حامیاں کوں ختم کرݨ کیتے پوری رفتارنال جاری رہسن