ستاویویں آئینی ترمیمی ٻل دی منظوری نال میثاق جمہوریت دا ادھورا ایجنڈا پورا تھی ڳئے، نائب وزیراعظم اسحاق ڈار

اسلام آباد۔10نومبر(اے پی پی) نائب وزیراعظم / وزیرخارجہ سینیٹر اسحاق ڈار آکھیے جو 27ویں آئینی ترمیمی ٻل دی منظوری نال میثاق جمہوریت دا ادھورا ایجنڈا پورا تھی ڳئے، ایں ٻل دی منظوری تے سارے شراکت داراں دا شکریہ ادا کرینداں۔سینیٹ اجلاس وچ 27ویں آئینی ترمیمی ٻل دی منظوری دے بعد ڳالھ کریندے قائد ایوان سینیٹر اسحاق ڈار آکھیا جو اے ہک تاریخی ٻل ہئی، اے میثاق جمہوریت دا ادھورا ایجنڈا ہئی، ایں دی منظوری تے مبارخ ݙٰینداں ، ماضی وچ بانی پی ٹی آئی سودھے ٻئے سیاسی اڳواݨاں وفاقی آئینی عدالت دے قیام تے دستخط کیتن، ایں دا مقصد دنیا دے ٻئے ملکاں وانڳوں عدلیہ وچ توازن قائم کرݨ ہئی، ایں نال عدالتی کارکردگی وچ چنڳی بہتری آسی۔انہاں آکھیا جو قوم آرمی چیف جنرل سید عاصم منیر کوں ہیرو منیا، حکومت فیلڈ مارشل دا عہدہ ݙتا۔ انہاں آکھیا جو موجودہ ججاں دی سنیارٹی برقرار رکھی ویسی، ایں آئینی ترمیم نال ججاں دے تبادلیں دا معاملہ وی حل تھی ڳئے، اے آئینی ترمیم خوش آئند اے، پاکستان پیپلز پارٹی، آزاد ارکان سودھے ساریاں سیاسی جماعتاں دی حمایت تے شکر گزار ہیسے، ایں دی منظوری وچ جلدی نئیں کیتی ڳئی، ٻل پہلے سینیٹ وچ گھن آوݨ دا وعدہ پورا کرݙتا، سارے ارکان کوں اظہار رائے دی مکمل آزادی ݙتی ڳئی، 18ویں ترمیم وچ اے این پی دی تجویز تے صوبہ خیبرپختونخوا ناں رکھیا ڳیا۔چیئرمین سینیٹ سید یوسف رضا گیلانی آکھیا جو ایں آئینی ترمیمی ٻل وچ 64 ووٹ پئن، مسلم لیگ (ن) دے پارلیمانی لیڈر وینٹی لیٹر تے ہن ایں کیتے ووٹ سٹݨ نئیں آئے اتے میݙا ذاتی ووٹ وی اے۔ اپوزیشن دا ایوان وچ اہم کردار ہوندے، اپوزیشن سودھے سارے ارکان ایں تے اپݨی رائے ݙتی اے، 18ویں ترمیم تے 57 تقریراں تھیاں، 1973ء دا آئین متفقہ طور تے بݨیا، 27ویں آئینی ترمیمی ٻل تے ساریاں سیاسی جماعتاں رَل تے اتفاق رائے پیدا کیتا، میثاق جمہوریت تے اساں ساریں اتفاق کیتا، ایں آئینی ترمیم تے زیادہ توں زیادہ اتفاق رائے پیدا کرݨ دی کوشش کیتی ڳئی، قومی اسمبلی اتے سینیٹ دیاں قائمہ کمیٹیاں بھرپور محنت کیتی، آبادی وچ تکھے ودھارے اتے تعلیم دے معاملے تے مشترکہ مفادات کونسل وچ اتفاق رائے پیدا کرݨا چاہیدے۔ سینیٹر نسیمہ احسان آکھیا جو ایں آئینی ترمیم دی منظوری تے پوری قوم کوں مبارخ ݙیندی ہاں۔