پارلیمان دنیا اچ اعتماد دے معمار، اتفاق رائے دے فروغ ݙیوݨ آلے اتے عوام دی آواز ہِن، چیئرمین سینیٹ تے بانی چیئرمین انٹرپارلیمانی اسپیکرز کانفرنس سید یوسف رضا گیلانی دا بین الپارلیمانی اسپیکرز کانفرنس دی افتتاحی تقریب توں خطاب

اسلام آباد۔11نومبر (اے پی پی) چیئرمین سینیٹ تے بانی چیئرمین انٹرپارلیمانی اسپیکرز کانفرنس (ISC) سید یوسف رضا گیلانی آکھیا جو پارلیمان دنیا اچ امن تے ترقی دے صرف ڈیکھݨ آلے نئیں بلکہ اعتماد دے معمار، اتفاقِ رائے دے فروغ ݙیوݨ آلے اتے عوام دی آواز ہِن، پاکستان عالمی سطح تے امن، سلامتی اتے ترقی کوں ودھاوݨ کیتے پکے ارادے نال اے۔ پاکستان دا اے عزم صرف بیاناں تئیں محدود نئیں بلکہ ایںدا عملی ثبوت پاکستان دا دہشت گردی دے خلاف عالمی جنگ اچ ساریاں توں اڳوں دا کردار اتے اقوامِ متحدہ دے امن مشنّاں اچ اہم شرکت اے۔ منگل کوں اسلام آباد اچ تھیوݨ آلی بین الاقوامی اسپیکرز کانفرنس دے افتتاحی اجلاس توں خطاب کریندیں ہوئیں چیئرمین سینیٹ آپݨے خطاب دے شروع اچ مہمانِ خصوصی وزیراعظم محمد شہباز شریف سمیت قومی تے صوبائی قیادت، غیر ملکی وݙے مہماناں، اسپیکرز، ارکان پارلیمان، گورنراں، وزیراعلیٰ اتے عالمی مندوبین کوں خوش آمدید آکھیا۔ انہاں آکھیا جو وزیراعظم پاکستان دی بطور مہمانِ خصوصی شرکت نہ صرف پارلیمان دے ادارے دے احترام دی علامت اے بلکہ اے پاکستان دے ایں عزم دی وی سِدھی عکاسی اے جیڑھا گالھ مہاڑ، تعاون اتے کئی جہتی میل جول کوں ودھاوݨ بارے اے۔ چیئرمین سینیٹ آکھیا جو اج دنیا دے شمالی اتے جنوبی حصیاں توں تعلق رکھݨ آلے پارلیمانی رہنما ہک چھت تلوں رَلے ہن، جیڑھا ہک نویں عہد دی پارلیمانی ہک دلّی دی بنیاد اے، اے تاریخی اجتماع دنیا بھر دے پارلیمانی رہنماواں دی ہک دلّی، عزم اتے تعاون دی علامت اے۔ انہاں آکھیا جو کانفرنس دا عنوان امن، سلامتی اتے ترقی سرحداں اتے نظریات توں اُوچا ہک ایجھا سنیھا اے جیڑھا پوری انسانیت کیتے رہنمائی فراہم کریندے۔ انہاں آکھیا جو موجودہ دور غیر یقینی، تنازعیاں، ماحولیاتی تبدیلیاں، معاشی جھٹکیاں اتے تکھے تکنیکی تغیرات نال تعبیر اے۔ چیئرمین سینیٹ آکھیا جو اساں غزہ، سوڈان اتے مقبوضہ کشمیر اچ ظلم و بربریت دی شکل اچ ڈِٹھا۔ انہاں زور ݙِتّا جو ایجھے ویلھے اچ پارلیمان کوں رہنمائی دا کردار ادا کرݨا پوسی۔ پارلیمان کوں دنیا دے ٹکڑیاں اچ ونّݙے ہوئے نظام کوں جوڑݨ آلا دیوا بݨݨا چاہیدے۔ اساں کوں سوچݨا، وعدہ کرݨا اتے رَل تے عمل کرݨا پوسی۔ گالھ مہاڑ اساڈا پُل اتے تعاون اساݙا راہ ہووݨا چاہیدے۔ چیئرمین سینیٹ آکھیا جو صدرِ پاکستان آصف علی زرداری اتے وزیراعظم محمد شہباز شریف دی قیادت اچ پاکستان عالمی سطح تے امن، سلامتی اتے ترقی کوں ودھاوݨ کیتے پکے ارادے نال اے۔ سید یوسف رضا گیلانی آکھیا جو کئی ݙہاکیاں تے محیط پارلیمانی تجربے انہاں کوں اے یقین ݙوایا جو پائیدار ترقی تنہائی اچ حاصل نئیں کیتی ونڄ سڳدی۔ ترقی ہک رَلواں تے مربوط عمل اے۔ ایہو احساس ایں عالمی کانفرنس دے تھیوݨ دی اصل وجہ بݨیا۔ انہاں آکھیا جو شمالی تے جنوبی دنیا وچال بین البراعظم پارلیمانی اشتراک ویلھے دی اہم لوڑھ اے تاںجو رَلویں مفادات اتے ترقی دے اہداف کوں اڳوں ودھایا ونڄ سڳے۔ چیئرمین سینیٹ آکھیا جو آؤ اساں وعدیاں توں اڳوں ودھوں، حل ڳوݪوں جیڑھے بہادرانہ، عملی اتے رَلوی سمجھداری تے مبنی ہووے۔ انہاں آکھیا جو آؤ ایں اجتماع کوں یادگار بݨاؤں، ہک ایجھے عزم دے طور تے جیڑھا دنیا اچ امید، اتحاد اتے قیادت دا نواں باب لکھے۔ چیئرمین سینیٹ سارے مندوبین کیتے اسلام آباد اچ خوشگوار رہݨ اتے کانفرنس دے کامیاب تھیوݨ دی نیک خواہشات دا اظہار کیتا۔