پاکستان آرمی تریجھی انٹر سروسز کومبیٹ شوٹنگ چیمپئن شپ 2025 جت ڳھدی، فیلڈ مارشل سید عاصم منیر دی تقریب اچ خصوصی شرکت

راولپنڈی۔11نومبر (اے پی پی) پاکستان آرمی ساری چار انٹر سروسز میچز اچ کامیابی حاصل کریندیں ہوئیں تریجھی انٹر سروسز کومبیٹ شوٹنگ چیمپئن شپ 2025 جت ڳھدی۔ پنجاب رجمنٹ یونٹ فائرنگ پروفیشینسی میچ گروپ-I دا اعزاز جِتیّا، سپاہی محمد عرفان (پنجاب رجمنٹ)  ماسٹر ایٹ آرمز دا خطاب حاصل کیتا، نائب صوبیدار عمر فاروق (آرمی مارک مین شپ یونٹ) نے آرمی ہنڈرڈ رائفل میچ ٹرافی جِت ڳھدی۔ منگل کوں پاک فوج دے شعبہ تعلقات عامہ (آئی ایس پی آر) ولّوں جاری بیان موجب، 45ویں پاکستان آرمی رائفل ایسوسی ایشن (پی اے آر اے) سینٹرل میٹ دی اختتامی تقریب آرمی مارک مین شپ یونٹ، جہلم اچ تھئی۔ چیف آف آرمی سٹاف فیلڈ مارشل سید عاصم منیر، نشان امتیاز (ملٹری)، ہلالِ جرات تقریب اچ مہمانِ خصوصی دے طور تے شرکت کیتی۔ 45ویں پی اے آر اے سینٹرل میٹ 2025 دا انعقاد ہک اکتوبر توں 10 نومبر تئیں تھیا۔ ایں اچ ݙو ہزار توں ودھ شرکاء پاکستان آرمی، پاک فضائیہ، پاک بحریہ، سول آرمڈ فورسز، پنجاب، سندھ، کے پی کے، بلوچستان اتے فیڈرل رائفل ایسوسی ایشنز دی نمائندگی کریندیں ہوئیں بھرپور جذبے اتے جوش تے خروش نال نشانہ بازی دی بہترین مہارت دا مظاہرہ کیتا۔ چیف آف آرمی اسٹاف فیلڈ مارشل عاصم منیر شرکاء نال گالھ مہاڑ کریندیں ہوئیں انہاں دی بہترین نشانہ بازی کوں سراہیا اتے ایں گالھ تے زور ݙِتّا جو نشانہ بازی اچ مہارت فوجی تربیت دا بنیادی مقصد ہووݨا چاہیدے۔ ایں دے بعد چیف آف آرمی اسٹاف فیلڈ مارشل عاصم منیر ملٹری کالج جہلم دی صد سالہ تقریب اچ بطور مہمانِ خصوصی شرکت کیتی۔ آرمی چیف صدی یادگار اتے کالج میوزیم دا افتتاح کیتا، جیڑھا ادارے دی ہک صدی تے محیط شاندار خدمات اتے ورثے دی علامت اے۔ انہاں ادارے دے کردار کوں سراہیا جیڑھا قیادت، نظم و ضبط اتے حب الوطنی کوں ودھاوݨ اچ معاون رہیے اتے عالمگیریاں دی پاکستان اتے افواجِ پاکستان کیتے خدمات کوں خراجِ تحسین پیش کیتا۔ چیف آف آرمی سٹاف فیلڈ مارشل عاصم منیر یادگارِ شہدا تے پھُلاں دی چادر وی چڑھائی۔ آرمی چیف دی آوݨ تے کمانڈر راولپنڈی کور اتے انسپکٹر جنرل ٹریننگ اینڈ ایویلیوایشن انہاں دا استقبال کیتا۔