پاکستان علاقائی میل جول کوں ودھاوݨ اتے سماجی اقتصادی ترقی کیتے سانجھے داری کوں مضبوط کرݨ کیتے پکے ارادے نال اے، نائب وزیر اعظم محمد اسحاق ڈار

اسلام آباد۔11نومبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار کثیرالجہتی تعاون کیتے عالمی عزم دی نویں سروں توثیق اتے بین الاقوامی مالیاتی اتے گورننس دے نظام اچ اصلاحات تے زور ݙیندیں ہوئیں آکھیا جو پاکستان علاقائی میل جول کوں ودھاوݨ اتے سماجی اقتصادی ترقی کیتے شراکت داری کوں مضبوط کرݨ کیتے پکے ارادے نال اے۔ اے ڳالھیں انہاں منگل کوں اتھاں اسلام آباد پالیسی ریسرچ انسٹی ٹیوٹ دے ولوں چھین٘ویں مارگلہ ڈائیلاگ 2025 توں خطاب کریندیں ہوئیں ظاہر کیتے۔ انہاں آکھیا جو میں اقوام متحدہ دی سلامتی کونسل سمیت کثیرالجہتی فورمز تے آپݨے اڄوکے خطاباں اچ ولا ولا خبردار کیتا جو انسانیت کوں بے مثال چیلنجز دا سامݨا اے جیڑھے عالمی امن، خوشحالی اتے سلامتی کیتے خطرہ ہِن۔ نائب وزیر اعظم خبردار کیتا جو کثریالجہتی اداریاں اتے بین الاقوامی تعاون دی بنیاد خاص طور تے جنہاں دی نمائندگی اقوام متحدہ کریندی اے، تناؤ دا شکار ہِن کیونجو شکوک و شبہات اتے جاری تنازعے انہاں تے سوالیہ نشان لیندن۔ انہاں آکھیا جو کثیرالجہتی ادارے کمزور تھیندے ویندن، اقوام متحدہ دی سلامتی کونسل سیاسی ونّݙ دی وجہ توں رُکّی پئی اے جڈاں جو بہوں ساریاں معاملیاں اچ ایں دی قرارداداں دی خلاف ورزی کرݨ آلیاں دے خلاف کارروائی دا کوئی بامعنی طریقہ کار نئیں۔ فلسطین اتے جموں تے کشمیر دے تنازعیاں دا حوالہ ݙیندیں ہوئیں نائب وزیر اعظم آکھیا جو اے تاثر ودھدا پئے جو سلامتی کونسل عالمی امن اتے سلامتی کوں برقرار رکھݨ دی اپݨی بنیادی ذمہ داری کوں پورا کرݨ اچ ناکام تھیندی پئی اے۔ انہاں عالمی غیر مساوات اتے قرضیاں دے بحران ول وی توجہ ݙیوائی جیڑھا ہݨ 100 توں ودھ ملکاں کوں متاثر کریندا پئے جئیں نال پائیدار ترقی دے اہداف دے حصول کوں ضیان تھیے۔ انہاں آکھیا جو پاکستان سویں ترقی پذیر ملک عالمی اخراج اچ نہ تھیوݨ آلے برابر حصہ پاوݨ دے باوجود موسمیاتی تبدیلیاں دا خمیازہ بھوڳتیندے پئن، ایں دے باوجود پاکستان ساریاں توں ودھ موسمیاتی خطرات دا سامݨا کرݨ آلے ملکاں اچ شامل اے۔ سینیٹر محمد اسحاق ڈار آکھیا جو سانجھے چیلنجاں نال نبڑݨ کیتے اقوام متحدہ دنیا دا ساریاں توں ودھ نمائندہ پلیٹ فارم اے۔ انہاں اقوام متحدہ دے چارٹر دے اصولاں کیتے پاکستان دی مسلسل حمایت دا ذکر کیتا جئیں اچ خود ارادیت، طاقت دا غیر استعمال اتے تنازعیاں دے پُرامن حل شامل ہن۔ انہاں ایں سال دے ادھ اچ اقوام متحدہ دی سلامتی کونسل اچ پاکستان دی صدارت دا حوالہ ݙِتّا اتے قرارداد 2788 دی متفقہ منظوری کوں اُجاگر کیتا۔ نائب وزیر اعظم آکھیا جو انہاں دی صدارت اچ اجلاس موثر تعاون اتے اقوام متحدہ دے چارٹر کیتے پاکستان دے عزم دا ثبوت ہِن۔ انہاں اقوام متحدہ اتے اسلامی تعاون دی تنظیم (او آئی سی) وچال ادارہ جاتی میل جول کوں مضبوط کرݨ کیتے پاکستان دے اقدام دا وی ذکر کیتا جیڑھا دنیا دا ݙوجھا وݙا کثیرالجہتی ادارہ اے۔ نائب وزیر اعظم سینیٹر محمد اسحاق ڈار ایں گالھ تے اطمینان کیتا جو چھین٘ویں مارگلہ ڈائیلاگ انہاں اچوں بہوں سارے اہم مسئلیاں کوں گالھ مہاڑ اچ گھن آیا اتے پاکستان دی تزویراتی جغرافیائی پوزیشن اتے اقتصادی صلاحیت کوں اُجاگر کیتا۔ انہاں آکھیا جو جنوبی ایشیا، وسطی ایشیا اتے مشرق وسطیٰ دے سنگم تے واقع پاکستان وسیع معدنی دولت، انسانی سرمائے اتے رابطے دی صلاحیت نال مالا مال اے۔. انہاں ایں توقع دا اظہار کیتا جو مارگلہ ڈائیلاگ اچ تھیوݨ آلی گالھ مہاڑ ساریاں کیتے ودھ مستحکم، برابر اتے خوشحال مستقبل آلے پاسے تعاون دے نویں راہ طے کرݨ اچ مدد کریسی۔