پاکستان روس نال تجارت، سرمایہ کاری، توانائی اتے پارلیمانی تعاون دے شعبیں وچ رَل تے کم مزید ودھاوݨ چاہندے، سپیکر قومی اسمبلی

اسلام آباد۔11نومبر (اے پی پی) سپیکر قومی اسمبلی سردار ایاز صادق نال بین الپارلیمانی سپیکرز کانفرنس وچ شرکت کیتے آوݨ آلے روسی اسٹیٹ ڈوما دے ڈپٹی چیئرمین الیگزینڈر باباکوف منگل کوں پارلیمنٹ ہاؤس اسلام آباد وچ ملاقات کیتی۔ ملاقات وچ پاک–روس تعلقات، پارلیمانی تعاون، علاقائی استحکام اتے اقتصادی شراکت داری دے ودھارے تے تفصیلی ڳالھ مہاڑ کیتی ڳئی۔قومی اسمبلی سیکرٹریٹ موجب سپیکر سردار ایاز صادق ودھدے پاک–روس تعلقات تے اطمینان دا اظہار کریندے آکھیا جو پاکستان روس نال سانجھے احترام، اعتماد اتے سانجھی دلچسپی تے مبنی تعلقات دے ودھارے دا خواہشمند اے۔ انہاں آکھیا جو 2014 وچ روسی قیادت نال تھیوݨ آلی ملاقات پاک–روس تعلقات وچ مثبت پیشرفت دا شروعات دا نقطہ ثابت تھئی۔ سپیکر سردار ایاز صادق امید ظاہر کیتی جو روس–یوکرین جھیڑے دا پُرامن اتے پائیدار حل کڈھیا ویسی تاں جو خطے وچ امن و استحکام کوں ودھارا مِل سڳے۔ انہاں آکھیا جو پاکستان ہمیشہ امن، سانجھے تعاون اتے جھیڑیں دے مذاکراتی حل دی لوڑھ تے زور ݙِتے۔بھارتی جارحیت دے حوالے نال ڳالھ کریندے سپیکر سردار ایاز صادق آکھیا جو پاکستان دے موقف کوں عالمی سطح تے پذیرائی ملی اے۔ انہاں ݙسایا جو پاکستان بھارتی جارحیت دا منہ بھن جواب ݙیندے بھارتی فضائیہ دے7 جہاز مار سٹیے جئیں نال پاکستان دی دفاعی صلاحیت اتے عزم دا اظہار تھیندے۔سپیکر قومی اسمبلی آکھیا جو پاکستان روس دے نال تجارت، سرمایہ کاری، توانائی اتے پارلیمانی تعاون دے شعبیں وچ رَل تے کم کوں مزید ودھاوݨ چاہندے۔ انہاں 2024 وچ اپݨے روسی دورے کوں یادگار اتے خوشگوار قرار ݙیندے آکھیا جو ایں دورے ݙوطرفہ تعلقات وچ نویاں جہتاں متعارف کروائن۔روسی اسٹیٹ ڈوما دے ڈپٹی چیئرمین الیگزینڈر باباکوف پاکستان دے نال تعلقات مزید تکڑے بݨاوݨ دے عزم دا اظہار کیتا۔ انہاں پاکستان دے متوازن، حقیقت پسندانہ اتے ذمہ دارانہ موقف دی تعریف کریندے آکھیے پاکستان اتے روس وچال تجارت اتے سرمایہ کاری دے وسیع موقع موجود ہن جنہاں توں بھرپور فیدہ چاتا ونڄݨا چاہیدے۔ الیگزینڈر باباکوف آکھیا کثیر الجہتی عالمی نظام ایں ویلھے خطرات نال ݙوچار اے اتے دنیا کوں توازن، انصاف اتے تعاون تے مبنی رویہ اپناوݨا ہوسی۔ انہاں ݙسایا جو اڳلی بین الپارلیمانی سپیکرز کانفرنس دی میزبانی روس کریسی۔ ݙوہیں رہنماواں پارلیمانی میل جول دے ودھارے، اقتصادی تعاون وچ ودھارے اتے علاقائی امن و استحکام کیتے سانجھیاں کوششاں جاری رکھݨ تے اتفاق کیتا۔