چیئرمین سینیٹ سید یوسف رضا گیلانی دی مراکش دی مجلسِ مشیران دے صدر اُولد اراشید نال ملاقات

اسلام آباد۔11نومبر (اے پی پی) چیئرمین سینیٹ سید یوسف رضا گیلانی دی مراکش دی مجلسِ مشیران دے صدر اُولد اراشید نال سپیکر کانفرنس دے دوران ملاقات تھئی۔ سینیٹ سیکرٹریٹ توں جاری بیان موجب، چیئرمین سینیٹ معزز مہمان اتے انہاں دے وفد دا پرتپاک استقبال کیتا اتے بین الپارلیمانی سپیکرز کانفرنس وچ انہاں دی شرکت تے شکریہ ادا کریندے آکھیا جو مراکش دی بھرپور شرکت کانفرنس دی افادیت وچ ودھارا کیتے جیڑھا بین الپارلیمانی تعاون دے ودھارے کیتے ݙوہیں ملکاں دے عزم دی عکاسی کریندی اے۔چیئرمین سینیٹ آکھیا جو کانفرنس دا عنوان “امن، سلامتی اتے ترقی” پاکستان اتے مراکش دے سانجھے مقاصد دی ترجمانی کریندے۔ انہاں آکھیا جو ݙوہیں ملکاں وچال اخوت، ایمان اتے تاریخی رشتے انہاں سانجھے مقصد دے حصول کیتے ہک مضبوط بنیاد فراہم کریندن۔ انہاں ایں عزم دا اعادہ کیتا جو پاکستان، مراکش دے نال پارلیمانی تعاون کوں مزید مضبوط بݨاوݨ کیتے ہر ممکن کوشش جاری رکھیسی۔ چیئرمین سید یوسف رضا گیلانی یاد ݙیوایا جو پاکستان اتے مراکش دے تعلقات 1952 توں قائم ہِن جݙاں پاکستان مراکش دی آزادی اتے حقِ خودارادیت دی جدوجہد وچ بھرپور حمایت کیتی ہئی۔انہاں ݙوہیں ملکاں وچال پارلیمانی دوستی گروپس اتے پارلیمانی کمیٹیاں دی سطح تے میل جول ودھاوݨ دی لوڑھ تے زور ݙِتا تاں جو سانجھے تعاون کیتے ہک مضبوط اتے پائیدار فریم ورک بݨایا ونڄ سڳے۔ انہاں ترقی پذیر ملکاں وچال جنوب-جنوب تعاون دی اہمیت تے وی روشنی پاتی جئیں دے ذریعے موسمیاتی تبدیلی، معاشی غیر مساوات، غذائی تحفظ اتے پائیدار امن جھیں چیلنجز دا رَل تے مقابلہ کیتا ونڄ سڳدے۔ انہاں مراکش دی میزبانی وچ منعقدہ تریجھے جنوبی-جنوب پارلیمانی مکالمہ فورم وچ پاکستان دی سرگرم شرکت دی تعریف کیتی تے آکھیا جو ایجھے فورمز پارلیمانی سفارتکاری کوں نویاں اُچائیاں تئیں پُڄیندے پئن۔چیئرمین سینیٹ آکھیا جو بین الپارلیمانی سپیکرز کانفرنس (آئی ایس سی) ہک جامع اتے پرے توں ݙیکھݨ آلا پلیٹ فارم اے جیڑھا علاقائی اتے عالمی سطح تے پارلیمانی تعاون کوں ودھیندے اتے امن، انصاف اتے ترقی دے ایجنڈے کوں اڳوں ودھاوݨ وچ مددگار ثابت ہوندے۔ انہاں آکھیا جو مراکش دے تعمیری کردار اتے ایں دے افریقی و علاقائی سفارتی تجربے ایں مکالمے کوں مزید نتیجہ خیز بݨائے۔ انہاں کوں یقین اے جو آئی ایس سی جیھے پلیٹ فارمز پاکستان اتے مراکش وچال پارلیمانی تعلقات کوں مزید گھاٹا کرݨ اتے سانجھی ترقی و خوشحالی کوں ودھاوݨ وچ بنیادی کردار ادا کریسن۔ݙو طرفہ تجارت تے ڳالھ کریندے چیئرمین سینیٹ ݙسایا جو مالی سال 2024 وچ پاکستان دیاں مراکش کوں برآمدات تقریباً $0.028 ارب امریکی ڈالر ہن جݙاں جو درآمدات $0.604 ارب ڈالر رہیاں۔ انہاں آکھیا جو ایں تجارتی غیر مساوات کوں دور کرݨ کیتے ݙوہیں ملکاں دے تعاون دے وسیع موقع موجود ہن۔ چیئرمین سینیٹ جوائنٹ بزنس کونسل دے قیام، ترجیحی تجارتی معاہدے (پی ٹی اے) دی شروعات اتے تجارتی وفداں دے تبادلے دی تجویز ݙتی تاں جو ٹیکسٹائل، زراعت، دواسازی، انفارمیشن ٹیکنالوجی، چمڑے اتے کھیݙاں دے سامان دے شعبیں وچ نویں رستے لبھئے ونڄ سڳن۔ انہاں زراعت، قابلِ تجدید توانائی، فوڈ پراسیسنگ اتے معدنیات دے شعبیں وچ سرمایہ کاری اتے منصوبیں دے امکانات دی وی تعریف کیتی۔چیئرمین سینیٹ “Look Africa Policy” (افریقہ دی ول ݙیکھ) دے تحت 2017 وچ متعارف کرائی ڳئی پاکستان دی پالیسی دا حوالہ ݙیندے آکھیا جو ایں پالیسی پاکستان دے افریقہ، جئیں وچ مراکش وی شامل اے، دے نال سیاسی و معاشی میل جول کوں کھنڈائے۔ انہاں آکھیا جو مراکش دا جغرافیائی محلِ وقوع اتے افریقی یونین وچ فعال کردار پاکستان کیتے افریقی منڈیاں تئیں رسائی دا اہم ذریعہ بݨ سڳدے۔انہاں سیاحت اتے عوامی میل جول دے ودھارے تے زور ݙیندے آکھیا جو پاکستان، مراکش دے پائیدار سیاحت دے ماڈل توں سکھݨ دا خواہشمند اے۔ چیئرمین سینیٹ ثقافتی تبادلے، سیاحتی مہم، ماہراں دیاں نشتاں اتے کلچرل وِیکس دے انعقاد دیاں تجویزاں ݙِتیاں۔ انہاں طلبہ اتے نینگراں دے تبادلے دے پروگرام شروع کرݨ اتے ویزا سہولتاں وچ سوکھ پیدا کرݨ تے زور ݙتا۔ملاقات دے انت تے چیئرمین سینیٹ آکھیا جو پاکستان اتے مراکش دے تعلقات سانجھے احترام، سانجھی اقداراتے اسلامی اخوت تے مبنی ہِن۔ پاکستان انہاں تعلقات کوں تجارت، تعلیم، سرمایہ کاری اتے ثقافت دے شعبیں وچ مزید کھنڈاوݨ چاہندے۔ انہاں ایں امید دا اظہار کیتا جو ݙوہیں ملک، ٻئے جنوبی ملکاں دے نال رَل تے، امن، رواداری اتے پُرامن بقائے باہمی دے عالمی بیانیے کوں ودھیندے رہسن۔