پاکستان اَتے کرغزستان وچال 15 معاہدیاں اَتے مفاہمت دی یادداشتاں دا تبادلہ، پاکستان اَتے کرغزستان وچال ݙو پاسہ تجارتی حجم 200 ملین ڈالر تئیں ودھاوݨ دا عزم

اسلام آباد۔ 4 دسمبر (اے پی پی) وزیراعظم محمد شہباز شریف پاکستان اَتے کرغزستان وچال ݙو پاسہ تجارتی حجم 200 ملین ڈالر تئیں ودھاوݨ دے عزم دا اعادہ کریندیں ہوئیں آکھیا پاکستان، کرغزستان دے نال تعلقات کوں ٻہوں اہمیت ݙیندَے، سیاست واپار، توانائی، زراعت، تعلیم، دفاع، رابطے اَتے ثقافت دے شعبیاں اچ رابطیاں کوں نویں بلندیاں تے گھن ونڄݨ دے خواہشمند ہیسے ۔ کرغزستان کوں آپنڑی بندرگاہیں دے ذریعے علاقائی اَتے عالمی منڈیاں تئیں پُہنچ ݙیسوں ، پاکستان کرغزستان بزنس فورم توں تعاون دیاں نویں راہواں کھُل ویسن ، جݙاں جو کرغزستان دے صدر صادر ژپاروف آکھیا جو معاشی استحکام اَتے ترقی کیتے کوششاں وزیراعظم پاکستان دے وژن دی عکاسی کریندِن، مختلف علاقائی اَتے بین الاقوامی معاملیاں تے اساݙے خیالات ہکو سویں ہن، پاکستان کرغزستان دا دوست اَتے قابل اعتماد شریک دار اَے، واپار، تعلیم، سائنس اَتے ٻئے شعبیاں اچ تعاون کوں ودھاوݨا پوسی ، توانائی دے شعبے اچ کاسا 1000 منصوبے تے صحیح ویلھے تے عملدرآمد نال آپسی فائدہ تھیسی۔ اے ڳالھیں انہاں خمیس کوں پاکستان اَتے کرغزستان وچال مختلف شعبیاں اچ تعاون دے ودھارے کیتے 15 معاہدیاں اَتے مفاہمت دیاں یادداشتیں دے تبادلے دی تقریب دے موقع تے ڳالھ مہاڑ کریندیں ہوئیں آکھی۔ وزیراعظم آکھیا جو کرغزستان دے صدر کوں اسلام آباد اچ خوش آمدید آکھدوں، پاکستان اَتے کرغزستان دے خوشگوار بھیراواں آلے تعلقات ہِن ، کرغزستان دے صدر ݙو ݙھاکیاں توں بعد پاکستان دا دورہ کریندے پِنن۔ حکومت اَتے پاکستان دے 24 کروڑ عوام ولّوں معزز مہمان دا خیر مقدم کریندوں، پاکستان کرغزستان دے نال تعلقات کوں ٻہوں اہمیت ݙیندَے، ݙو طرفہ تعلقات کوں مضبوط بݨاوݨ کیتے اے دورہ ٻہوں اہمیت دا حامل اَے، ایں دورے نال ݙوہیں ملکاں وچال پہلے توں سارے شعبیاں اچ موجود ݙو پاسہ تعلقات کوں مزید فروغ حاصل تھیسی۔ انہاں آکھیا جو پاکستان اَتے جمہوریہ کرغزستان دے تاریخی دیرینہ تعلقات جغرافیائی اہمیت دے حامل مُلک ہِن ، اساݙے دل ہک نال دھڑکدن۔ انہاں آکھیا جو کرغزستان دے صدر نال مذاکرات اچ مختلف شعبیاں اچ تعاون، علاقائی اَتے عالمی معاملیاں تے گالھ مہاڑ تھئی اَے، اساں عوامی رابطیاں ثقافت اَتے ٻئے شعبیاں اچ تعاون ودھاوݨ تے وی گالھ کیتی اَے، اساں تعلقات کوں نویں بلندیاں تے گھن ونڄݨ دے سانجھے عزم دا اعادہ کیتَے، انہاں آکھیا جو 1992ء اچ ݙوہیں ملکاں وچال سفارتی تعلقات دے قیام توں بعد اساݙے تعلقات آپسی اعتماد دی بُنیاد تے ٻئے ودھین۔ وزیراعظم آکھیا جو پاکستان بحرہند تئیں گیٹ وے دی حیثیّت رکھیندَے اساں کرغزستان کوں علاقائی اَتے عالمی مارکیٹاں تئیں پُہنچ کیتے کراچی دی بن قاسم اَتے گوادر دی بندرگاہیں دے ذریعے رسائی ݙیسوں ۔ انہاں آکھیا جو ثقافتی تبادلیاں، سیاحت اَتے تعلیم دے شعبیاں اچ تعاون دے ذریعے عوامی رابطیاں دے ودھارے تے وی گالھ تھئی اَے۔ ݙو پاسہ تعلقات کوں مضبوط بݨاوݨ کیتے کرغزستان دے صدر دے عزم دے مشکور ہیسے ۔ اساں تعلقات کوں نویں بلندیاں تے گھن ونڄݨ دے سانجھے عزم دا اعادہ کیتَے، توانائی، واپار، رابطیاں دے ودھارے اَتے ٻئے شعبیاں اچ تعاون ودھیسوں، مختلف شعبیاں اچ تعاون دے 15 معاہدے اَتے مفاہمتی یادداشتیں اہم پیش رفت ہے ، ݙوہیں مُلکاں دے عوام دے مفاد اَتے علاقائی استحکام کیتے رَل تے اگّوں ودھسوں۔ ثقافت دے شعبے اچ تعاون کوں ودھاوݨ کیتے ݙوہیں مُلکاں رَل تے مختلف تقریباں دا اہتمام کریسن۔ کرغزستان دے صدر صادر ژپاروف آکھیا جو شاندار استقبال اَتے بھرپور میزبانی تے پاکستان دی حکومت اَتے عوام دے مشکور ہیسے ، 20 سال توں بعد کرغستان دے کہیں صدر دا پاکستان دا اَتے 2021ء اچ منصب سنبھالݨ توں بعد پاکستان دا اے میݙا پہلا دورہ اَے۔ دورے دی دعوت تے وزیراعظم شہباز شریف دا شکر گزار ہاں ، پاکستان جنوبی ایشیا اچ کرغزستان دا اہم شریک دار ۔ اساݙے تاریخی تعلقات ہِن اَے، اساں واپار، سائنس، تعلیم اَتے ٻئے شعبیاں اچ تعاون کوں ودھاوݨ تے گالھ مہاڑ کیتی اَے، انہاں کاسا 1000 منصوبے دی اہمیت تے زور ݙیندیں ہوئیں آکھیا جو ایں منصوبے تے صحیح ویلھے تے عمل درآمد نال آپسی فائدہ تھیسی، اساں مواصلات ٹرانسپورٹ ٻئے شعبیاں اچ تعاون ودھاوݨ دی صلاحیّت تے گالھ کیتی اَے، ایں ویلھے کرغزستان اچ 12 ہزار توں ودھ پاکستانی طالب علم تعلیم حاصل کریندے پِئن، توانائی دی لوڑھ پوری کرݨ کیتے کاسا 1000 منصوبہ اہمیت دا حامل اَے، اساں خطے اچ امن، استحکام اَتے سیکیورٹی کیتے تعاون ودھاوݨ تے اِتفاق کیتَے۔ واپار، تعلیم، سائنس اَتے ٻئے شعبیاں اچ تعاون کوں ودھاوݨا پوسی، کرغزستان دے یوم آزادی دی تقریب اچ شرکت کیتے وزیراعظم شہباز شریف کوں دعوت ݙیتی اَے، ݙوہاں مُلکاں دہشتگردی دے خاتمے کیتے پُرعزم ہِن اَے اَتے مختلف علاقائی اَتے بین الاقوامی معاملیاں تے اساݙے خیالات ہک ہن، 2027ء اچ گلوبل کلائمیٹ سمٹ بشکیک اچ تھیندی پئی اے جئیں اچ وزیراعظم شہباز شریف دی شرکت دا خیر مقدم کریسوں۔