پاکستان دا برطانیہ توں شہزاد اکبر اَتے عادل راجہ دی فوری حوالگی دا مطالبہ، وزیر داخلہ دستاویزی ثبوت برطانوی ہائی کمشنر دے حوالے کر ݙتے

اسلام آباد۔ 4 دسمبر (اے پی پی) وفاقی وزیر داخلہ محسن نقوی برطانیہ توں مطلوب ملزماں شہزاد اکبر اَتے عادل راجہ دی فوری حوالگی دا باضابطہ مطالبہ کر ݙتے۔ اے مطالبہ انہاں خمیس کوں اسلام آباد اچ برطانوی ہائی کمشنر جین میریٹ نال تھیوݨ آلی ہک ہنگامی اَتے اہم ملاقات اچ کیتا۔ ملاقات اچ وزیر داخلہ محسن نقوی شہزاد اکبر اَتے عادل راجہ دی حوالگی بارے سرکاری کاغذات اَتے قانونی دستاویزات برطانوی ہائی کمشنر دے حوالے کیتے۔ محسن نقوی ݙوہیں بندیاں ولّوں کیتے ونجݨ آلے پاکستان مخالف پروپیگنڈے دے ٹھوس ثبوت وی پیش کیتے اَتے صاف کیتا جو اے ݙوہیں بندے پاکستان دے قانون کوں مطلوب ہِن، اِیس واسطے انہاں کوں فوری طور تے پاکستان دے حوالے کیتا ونجے۔ محسن نقوی صاف لفظاں اچ آکھیا جو اساں آزادی اظہار تے پُورا یقین رکھدوں، لیکن فیک نیوز اَتے ڈس انفارمیشن ایں ویلھے ہر مُلک کیتے سیکیورٹی دا مسئلہ بݨ ڳئی اے۔ انہاں  آکھیا جو ٻاہرلے مُلک ٻہہ تے ریاست اَتے قومی اداریاں دے خلاف ٻہتان تراشی اَتے بَکواس کرݨ دی موکل دنیا دا کوئی وی مُلک نئی ݙے سڳدا۔ انہاں امید کیتی جو برطانیہ اِنھاں عناصر دی واپسی کیتے پاکستان دے نال تعاون کریسی۔ ملاقات اچ برطانیہ اچ غیر قانونی طور تے مقیم پاکستانیاں دی واپسی اَتے پاک-برطانیہ سیکیورٹی تعاون ودھاوݨ تے وی تفصیلی گالھ مہاڑ تھئی۔ وزیر داخلہ ݙسیا جو وزارتِ داخلہ، وزارتِ خارجہ دے ذریعے وی حوالگی دا عمل شروع کر ݙتے۔ ملاقات اچ وفاقی سیکرٹری داخلہ محمد خرم آغا اَتے وزارت دے ٻئے اعلیٰ افسران وی موجود ہن۔