وزیراعظم شہباز شریف اَتے کرغزستان دے صدر صادر ژپاروف وچال وفداں دی سطح تے ملاقات، ݙو پاسہ تجارت تے سرمایہ کاری ودھاوݨ تے اتفاق

اسلام آباد۔ 4 دسمبر (اے پی پی) پاکستان اَتے کرغزستان آپسی اقتصادی تعاون اچ ودھارے دی لوڑھ کوں اُجّاگر کریندیں ہوئیں ݙو پاسہ تجارت تے سرمایہ کاری کوں ودھاوݨ تے اتفاق کیتے، جݙاں جو پرامن اَتے مستحکم افغانستان اَتے افغان عوام کیتے پائیدار مستقبل دے عزم دا اعادہ کریندیں ہوئیں ایں گالھ تے وی اتفاق کیتا جو افغان طالبان حکومت کوں بین الاقوامی برادری توں کیتے ڳئے وعدے پُورے کرݨے چاہیدن اَتے پاکستان دے جائز سکیورٹی خدشات کوں دور کرݨ کیتے دہشت گرد عنصراں دے خلاف ٹھوس اَتے تصدیق کیتے ونجݨ آلے اقدامات چاوݨے چاہیدن۔ وزیر اعظم آفس دے میڈیا ونگ ولّوں خمیس کوں جاری بیان موجب وزیراعظم محمد شہباز شریف اَتے کرغزستان دے صدر صادر ژپاروف وچال وزیراعظم ہاؤس اچ وفداں دی سطح تے ملاقات تھئی، ݙو پاسہ مذاکرات اچ وزیراعظم دی معاونت نائب وزیراعظم تے وزیر خارجہ محمد اسحاق ڈار، چیف آف آرمی سٹاف فیلڈ مارشل سید عاصم منیر سودھے اہم وفاقی وزرا اَتے سینئر سرکاری حکام کیتی۔ بیان موجب وزیراعظم ایں گالھ تے زور ݙتا جو پاکستان جمہوریہ کرغزستان دے نال آپݨے بھیراواں آلے تعلقات کوں ٻہوں اہمیت نال ݙیکھدے۔ وزیراعظم، وسطی ایشیائی مُلکاں دے نال رابطیاں دے ودھارے کیتے پاکستان دی “وژن سینٹرل ایشیا” پالیسی دے تحت آپݨے عزم دا اعادہ کیتا۔ ݙوہیں رہنماواں پاکستان اَتے کرغزستان دے تعلقات جو تاریخی رابطیاں، سانجھی تہذیب تے اقدار اَتے علاقائی امن تے خوشحالی دے سانجھے وژن تے قائم ہِن، دے ودھارے اَتے توسیع دی اہمیت تے زور ݙتا۔ ݙوہیں راہنماواں جاری آپسی تعاون خاص طور تے واپار، توانائی، مواصلات اَتے عوامی رابطیاں دے شعبیاں اچ شراکت داری کوں ٻیا مضبوط بݨاوݨ دے عزم دا اعادہ کیتا۔ آپسی اقتصادی تعاون اچ ودھارے دی لوڑھ کوں اُجّاگر کریندے ہوئیں ݙوہیں راہنماواں ݙو پاسہ واپار تے سرمایہ کاری کوں ودھاوݨ تے اتفاق کیتا۔ دورہ دے دوران دستخط شدہ معاہدیاں اَتے مفاہمت دیاں یادداشتیں تے موثر عمل درآمد دے ذریعے 2027-2028 تئیں ݙو پاسہ تجارت دا حجم 200 ملین امریکی ڈالر تئیں ودھاوݨ تے اتفاق کیتا ڳیا۔ ݙوہیں راہنماواں ملاقات دے دوران 28-29 جولائی 2025ء کوں اسلام آباد اچ منعقدہ کرغزستان-پاکستان مشترکہ سرکاری کمیشن دے پنجویں اجلاس دے کامیاب انعقاد تے وی اطمینان دا اظہار کیتا۔ ݙوہیں مُلکاں علاقائی استحکام کیتے توانائی دے شعبے اچ تعاون دی اہمیت کوں منیندے ہوئیں کاسا 1000 منصوبے تے صحیح ویلھے تے موثر عملدرآمد دے سانجھے عزم دا اعادہ کیتا۔ اے منصوبہ علاقائی توانائی تعاون اچ اہم سنگ میل اَتے وسطی تے جنوبی ایشیا دے درمیان ہک اہم رابطہ اے۔ ݙوہیں راہنماواں جمہوریہ کرغزستان اَتے پاکستان دے درمیان محفوظ، مستحکم و دیر پا اَتے کثیر الجہتی رابطیاں دی لوڑھ تے وی زور ݙتا۔ ایں تناظر اچ ݙو پاسہ اَتے علاقائی واپار اچ مزید ودھارے کیتے پاکستان اَتے کرغزستان دے درمیان “کواڈریلیٹرل ٹریفک اِن ٹرانزٹ ایگریمنٹ” دے تحت روڈ کوریڈور دے فعال تھیوݨ تے اطمینان دا اظہار کیتا ڳیا۔ مذاکرات دے دوران ݙوہیں مُلکاں دے رہنماء اہم علاقائی اَتے عالمی امور تے وی گالھ مہاڑ کیتی اَتے علاقائی امن تے سلامتی کوں آوݨ آلے ودھدے ہوئیں خطراں تے تشویش دا اظہار کریندیں ہوئیں ݙوہیں رہنماواں ایں گالھ تے اتفاق کیتا جو تنازعیاں کوں بین الاقوامی قانون خاص طور تے اقوام متحدہ دے چارٹر اَتے متعلقہ سلامتی کونسل دی قرارداداں دے مطابق پُرامن طریقے نال حل کیتا ونجݨا چاہیدا۔ ݙوہیں رہنماواں پرامن اَتے مستحکم افغانستان اَتے افغان عوام کیتے پائیدار مستقبل دے عزم دا اعادہ کیتا اَتے اتفاق کیتا جو افغان طالبان حکومت کوں بین الاقوامی برادری توں کیتے ڳئے وعدے پُورے کرݨے چاہیدن اَتے پاکستان دے جائز سکیورٹی خدشات کوں دور کرݨ کیتے دہشت گرد عنصراں دے خلاف ٹھوس اَتے تصدیق کیتے ونجݨ آلے اقدامات چاوݨے چاہیدن۔ ݙوہیں رہنماواں غزہ اچ جاری امن کوششاں تے وی گالھ مہاڑ کیتی اَتے فلسطینی عوام دے حق خودارادیت اَتے ہک خودمختار، قابل عمل، متحد اَتے آزاد فلسطینی ریاست جو جون 1967ء توں پہلے دی سرحداں اَتے القدس الشریف بطور دارالخلافہ تے مشتمل ہووے، دے قیام دی پکی حمایت دا اعادہ کیتا۔ ایں موقع تے ݙوہیں مُلکاں دے درمیان مختلف شعبیاں سودھے توانائی، معدنیات، واپار، تعلیم، قانون و انصاف، ثقافت اَتے سیاحت اچ آپسی دلچسپی دی 15 مفاہمت دیاں یادداشتیں دے تبادلے اَتے معاہدیاں تے دستخط دی تقریب وی تھئی جئیں اچ وزیراعظم پاکستان اَتے جمہوریہ کرغزستان دے صدر شرکت کیتی۔ ایں توں پہلوں وزیراعظم محمد شہباز شریف کرغزستان دے صدر دا وزیراعظم ہاؤس اسلام آباد اچ شاندار استقبال کیتا۔ وزیراعظم ہاؤس پڄݨ تے جمہوریہ کرغزستان دے صدر صادر ژپاروف کوں پاکستان دی مسلح فوجاں دے چاق و چوبند دستے گارڈ آف آنر پیش کیتا۔ سرکاری استقبالیہ تقریب توں بعد ݙوہیں راہنماواں وچال ݙو پاسہ ملاقات تھئی۔ ایں توں علاوہ وزیراعظم کرغزستان دے صدر اَتے انہاں دے وفد دے اعزاز اچ ظہرانہ وی ݙتا۔ بعد اچ ݙوہیں راہنماواں میڈیا توں سانجھی گالھ مہاڑ وی کیتی جئیں اچ ملاقات اچ تھیوݨ آلی گالھ مہاڑ دے نکتیاں تے روشنی پاتی ڳئی۔