ملک دا دفاع مضبوط ہتھاں وچ اے، پاکستان کوں سفارتی میدان وچ کامیابیاں ملدیاں پئن، معرکہ حق وچ بھارت اپݨی عبرتناک شکست ہمیشہ یاد رکھیسی، صدرِ مملکت آصف علی زرداری

گڑھی خدابخش۔ 27 دسمبر(اے پی پی) صدرِ مملکت آصف علی زرداری آکھیے جو ملک دا دفاع مضبوط ہتھاں وچ اے، پاکستان کوں سفارتی میدان وچ کامیابیاں ملدیاں پئن ۔ معرکہ حق وچ مسلح افواج بھارت کوں ایجھی عبرتناک شکست ݙتی اے جینکوں او ہمیشہ یاد رکھیسی۔ ساݙے فیلڈ مارشل بھارت کوں منہ بھن جواب ݙتے، مودی کوں پتہ لڳ ڳئے جو پاکستان مذاق کائنی۔ پاکستان پیپلز پارٹی وفاق دی علامت اے، محترمہ بے نظیر بھٹو دی شہادت دے ݙینھ “پاکستان کھپے” دا نعرہ لا تے ملک کوں محفوظ کیتا، پاکستان کوں امن و استحکام دا گہوارہ بݨا تے ترقی تے خوشحالی نال ہمکنارکریسوں۔انہاں اے ڳالھ اتھاں سابق وزیراعظم محترمہ بے نظیر بھٹو شہید دی 18 ویں برسی دے موقع تے جلسہ عام توں خطاب کریندے آکھی ۔ ایں موقع تے پاکستان پیپلز پارٹی دے چیئرمین بلاول بھٹو زرداری، خاتونِ اول آصفہ بھٹو زرداری، وزیر داخلہ محسن نقوی تے پاکستان پیپلز پارٹی دے ٻئے  قائدین وی موجود ہن۔صدر آصف علی زرداری آکھیا جو اڄ اساں شہید محترمہ بے نظیر بھٹو کوں خراجِ عقیدت پیش کرݨ کیتے اتھاں کٹھے تھیوں ۔ اے ݙینھ ملک کوں بچاوݨ دا ݙینھ ہئی، ایں ݙینھ پاکستان پیپلز پارٹی “پاکستان کھپے” دا نعرہ لا تے ملک کوں محفوظ کیتا، پاکستان انشاء اللہ قیامت تئیں قائم و دائم رہسی۔ انہاں آکھیا جو اللہ تعالیٰ اساکوں ملک و قوم دی خدمت دا موقع ݙتے، معرکہ حق وچ ساݙی مسلح افواج تے ساݙے فیلڈ مارشل سید عاصم منیر بھارت کوں ایہو جیہا منہ بھن جواب ݙتے جینکوں او ہمیشہ یاد رکھیسی۔ پاکستان دی بہادر تے نڈر قیادت دشمن کوں شکست ݙتی۔ پاک فوج تے پاک فضائیہ دشمن دے ارادے خاک وچ ملا ݙتے، ملک دا دفاع مضبوط ہتھاں وچ اے، اساں اپݨا دفاع کرݨ جاݨدوں چاہندے تاں بھارت دے سارے جہاز ڈھا سڳدے ہاسے دوبارہ وی جے کہیں ملک پاکستان کنے میلی اکھ نال ݙٹھا  تاں اوکوں منہ بھن جواب ملسی۔صدرِ مملکت آکھیا جو پاکستان پیپلز پارٹی دے کارکن شہید ذوالفقار علی بھٹو تے شہید محترمہ بے نظیر بھٹو دے وارث ہن، او اپݨے وطن تے جان، مال ہر چیز نچھاور کر ݙیسن، ساڈی آوݨ آلی نسلاں وی ملک کیتے لڑسن۔ پیپلز پارٹی عوامی مسائل دے حل تے یقین رکھیندی اے، پیپلز پارٹی صوبیں کوں حقوق ݙیوݨ کیتے اقدامات کیتے، پیپلز پارٹی ہمیشہ توں عوامی خدمت دی سیاست کیتی اے، ہݨ وی ملکی مسائل دے حل کیتے کوششاں جاری ہن۔انہاں آکھیا جو ساڈھے چار سال وچ ہک شخص ساری دنیا توں ملک دے تعلقات خراب کروا ݙتے، ہݨ عالمی سطح تے پاکستان دی ساکھ بہتر تھی ڳئی اے تے پاکستان کوں سفارتی کامیابیاں حاصل تھیندیاں پئن۔ امریکی صدر ٹرمپ وی فیلڈ مارشل دی تعریف کریندے پئن، پاکستان کوں امن و استحکام دا گہوارہ بݨا تے ترقی تے خوشحالی نال ہمکنار کریسوں۔ ملک دی ترقی کیتے اساکوں ساریں کوں آپݨا کردار ادا کرݨاں پوسی۔ جلسہ عام توں پاکستان پیپلز پارٹی دے چیئرمین بلاول بھٹو زرداری تے ٻئے قائدین وی خطاب کیتا۔