پاکستان غزہ اچ امن کیتے بݨائے ڳئے “بورڈ آف پیس” اچ رلݨ دا اعلان کر ݙتے، ڈاکٹر طارق فضل چوہدری

اسلام آباد۔ 21 جنوری(اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو پاکستان ہک مضبوط اتے ذوٹوک سفارتی مؤقف نال غزہ اچ امن قائم کرݨ کیتے بݨائے ڳئے “بورڈ آف پیس” اچ رلݨ دا اعلان کر ݙتے۔ امریکی صدر ڈونلڈ جے ٹرمپ آلآں وزیراعظم محمد شہباز شریف کوں ݙتی ڳئی دعوت دی قبولیت ایں ڳالھ دی نشانی اے جو پاکستان مظلوم قوماں دے حق اچ عالمی سطح تے ہک اثر رکھݨ والی آواز اے۔ اپݨے ایکس (ٹویٹر) تے ہک بیان اچ انھاں آکھیے جو وزارتِ خارجہ دے مطابق اے فیصلہ اقوامِ متحدہ دی سلامتی کونسل دی قرارداد 2803 دے تحت جنگ بندی، انسانی تحفظ اتے غزہ دی بحالی کوں یقینی بݨاوݨ دی عملی کوششاں دا حصہ اے۔ پاکستان واضح طور تے سمجھدے جو عارضی اقدامات نئیں ٻھل مستقل اتے منصفانہ حل ہی ایں علاقے کوں پائیدار امن دے پاسے گھن تے ونڄ سڳدے۔ انھاں آکھیے جو اسلام آباد ہک واری ول اپݨے ایں اصولی مؤقف کوں دہرائے جو فلسطینی عوام کوں انھاں دا حقِ خودارادیت ملݨا چاہیدے اتے 1967 توں پہلے دی سرحداں تے قائم آزاد، خودمختار فلسطینی ریاست جیندا دارالحکومت القدس الشریف ہووے، اوہو ای امن دی واحد ضمانت اے۔