پاکستان غزہ اچ پائیدار امن دے قیام کیتے “بورڈ آف پیس” اچ شمولیت دی دعوت قبول کر گھدی

اسلام آباد۔ 21 جنوری (اے پی پی) پاکستان غزہ اچ پائیدار امن دے قیام کیتے بورڈ آف پیس (بی او پی) اچ شمولیت دی دعوت قبول کر گھدی اے۔ امریکہ دے صدر ڈونلڈ جے ٹرمپ ولوں وزیراعظم محمد شہباز شریف کوں بی او پی اچ شامل تھیوݨ دی دعوت ݙتی ڳئی ہئی۔ بدھ دے ݙینہہ دفتر خارجہ توں جاری بیان دے مطابق پاکستان اقوامِ متحدہ دی سلامتی کونسل دی قرارداد 2803 دے فریم ورک دے تحت غزہ امن منصوبے تے عملدرآمد دی حمایت کیتے بورڈ آف پیس اچ شامل تھیوݨ دا اعلان کریندے امید کیتی اے جو ایندے بݨݨ نال غزہ اچ مستقل جنگ بندی دے نفاذ، فلسطینی عوام کیتے انسانی امداد اچ واضح ودھارے اتے علاقے دی ولا تعمیر کیتے عملی اقدامات ممکن تھی سڳسن۔پاکستان اے وی چاہندے جو اے کوششاں فلسطینی عوام دے حقِ خودارادیت دے حصول اچ مددگار ثابت تھیون، جیہڑا جو ہک مقررہ مدت دے سیاسی عمل دے ذریعے ممکن تھیسی۔ بیان اچ آکھیا ڳئے جو ایں عمل دے نتیجے اچ 1967 توں پہلے دی سرحداں دی بنیاد تے القدس الشریف کوں دارالحکومت بݨیندے ہوئیں ہک آزاد، خودمختار اتے جغرافیائی طور تے جڑی ہوئی فلسطینی ریاست قائم تھیسی۔ پاکستان بورڈ آف پیس دے ممبر دی حیثیت نال انھاں مقصد دے حصول تے فلسطینی عوام دیاں تکلیفاں ختم کرݨ کیتے اپݨا تعمیری کردار جاری رکھیسی