پاکستان، امریکا، ترکیہ، سعودی عرب، متحدہ عرب امارات، انڈونیشیا سودھے مختلف ملکاں غزہ امن بورڈ دے چارٹر تے دستخط کر ݙتن

ڈیووس۔ 22 جنوری (اے پی پی) پاکستان، امریکا، ترکیہ، سعودی عرب، متحدہ عرب امارات تے انڈونیشیا سودھے مختلف ملکاں غزہ امن بورڈ دے چارٹر تے دستخط کر ݙتن۔ خمیس کوں اتھاں عالمی اقتصادی فورم دے 56 ویں اجلاس دے موقع تے امریکی صدر ڈونلڈ ٹرمپ دی میزبانی اچ غزہ امن بورڈ اچ شامل ملکاں دے اجلاس اچ ایں چارٹر تے دستخط کیتے ڳئے۔ دستخط کرݨ آلے ملکاں اچ پاکستان، امریکا، آرمینیا، ارجنٹائن، آذربائیجان، بلغاریہ، انڈونیشیا، ہنگری، قازقستان، اردن، کوسوو، پیراگوئے، قطر، سعودی عرب، ترکیہ، متحدہ عرب امارات، ازبکستان تے منگولیا شامل ہن۔ وزیراعظم پاکستان محمد شہباز شریف جݙݨ غزہ امن بورڈ دے چارٹر تے دستخط کرݨ کیتے آئے تاں امریکی صدر ڈونلڈ ٹرمپ انھاں دا خاص طور تے شکریہ ادا کیتا۔ ایں موقع تے امریکی صدر تے وزیراعظم محمد شہباز شریف دے درمیان خوشگوار جملیاں دا تبادلہ تھیا تے ݙوہیں رہنما کجھ دیر تئیں ڳالھ مہاڑ کریندے رہیے۔ ایندے توں پہلے تقریب نال خطاب کریندے ہوئیں امریکی صدر ڈونلڈ ٹرمپ آکھیا جو بورڈ آف پیس اچ برطانیہ دے سابق وزیراعظم ٹونی بلیئر دا ٻہوں اہم کردار اے، اساں مشرقِ وسطیٰ اچ پائیدار امن کیتے کوششاں کریندے پئے ہیسے تے ایندی کامیابی کیتے پرامید ہیسے۔ انھاں آکھیا جو غزہ کوں ہک بہترین سیاحتی مرکز بݨایاں ویسے۔ انھاں آکھیا جو میں 10 مہینے اچ اٹھ جنگاں بند کرائیاں، پاکستان تے بھارت جیہے ݙو ایٹمی ملکاں وچال جنگ رکوائی۔ انھاں آکھیا جو وزیراعظم پاکستان میکوں آکھیے جو تساں 10 ملین جاناں بچائن۔ امریکی صدر آکھیا جو اساں ایران نال وی ڳالھ مہاڑ کیتے تیار ہیسے۔ ایں موقع تے امریکی وزیر خارجہ مارکو روبیو آکھیا جو اج دا ݙینہہ ٻہوں اہم اے، صدر ٹرمپ بالکل ٹھیک آکھیے جو اساں کئی ناممکن کم کر ݙکھائے ہن۔ انھاں آکھیا جو ایں امن معاہدے دے ذریعے دنیا دے ٻئے جھیڑیاں کوں وی حل کیتا ونڄ سڳدے۔ غزہ امن بورڈ دا مقصد مستقل جنگ بندی، غزہ دی دوبارہ تعمیر تے فلسطینی عوام کوں انھاں دا حقِ خودارادیت ݙیواوݨ اے تانجوعلاقے اچ امن تے سلامتی دی راہ ہموار تھیوے۔