اسلام آباد۔ 22 جنوری(اے پی پی) پاکستان اتے انڈونیشیا اتفاق کیتے جو معدنیات، ایکسپلوریشن اتے توانائی دے شعبیاں اچ تعاون کوں ودھاوݨ کیتے رابطے جاری رکھیے ویسن اتے عملی موقع ڳولیے ویسن جیندے نال ݙوہیں ملکاں دے مضبوط تعلقات کوں مزید طاقت ملسی۔ اے ڳالھ وفاقی وزیر پٹرولیم علی پرویز ملک اتے انڈونیشیا دے سفیر چندرا وارسینتو سوکوتجو وچال ملاقات اچ آکھی ڳئی۔ وفاقی وزیر سفیر دا پُرتپاک استقبال کیتا …
وفاقی وزیر پٹرولیم علی پرویز ملک اتے انڈونیشیا دے سفیر دی ملاقات
اسلام آباد۔ 22 جنوری(اے پی پی) پاکستان اتے انڈونیشیا اتفاق کیتے جو معدنیات، ایکسپلوریشن اتے توانائی دے شعبیاں اچ تعاون کوں ودھاوݨ کیتے رابطے جاری رکھیے ویسن اتے عملی موقع ڳولیے ویسن جیندے نال ݙوہیں ملکاں دے مضبوط تعلقات کوں مزید طاقت ملسی۔ اے ڳالھ وفاقی وزیر پٹرولیم علی پرویز ملک اتے انڈونیشیا دے سفیر چندرا وارسینتو سوکوتجو وچال ملاقات اچ آکھی ڳئی۔ وفاقی وزیر سفیر دا پُرتپاک استقبال کیتا اتے پاکستان اتے انڈونیشیا دے رشتیاں دی اہمیت تے زور ݙتا۔ انھاں مسلم دنیا اچ انڈونیشیا دے اہم کردار کوں اڳونہا کیتا۔ ملاقات اچ انڈونیشیا دے سفیر پاکستان دے معدنی شعبے اچ ٻہوں دلچسپی ݙکھائی۔ انھاں ݙسایا جو انڈونیشیا دی سرکاری کمپنی “پیٹرٹامینا” کوں ڳولݨ اتے دریافت دے شعبے اچ ٻہوں تجربہ اے اتے ݙوہیں ملک ایں شعبے اچ تعاون کر سڳدن۔ وفاقی وزیر علی پرویز ملک انڈونیشیا دی دلچسپی دا خیر مقدم کیتا اتے حکومتِ پاکستان ولوں مکمل تعاون دی یقین دہانی کرائی۔ انھاں آکھیا جو پاکستان اچ معدنیات دے بے پناہ وسائل موجود ہن جنھاں کوں حالی تئیں استعمال نئیں کیتا ڳیا۔ وفاقی وزیر انڈونیشیا دے وفد کوں “پاکستان منرلز انویسٹمنٹ فورم 2026” اچ شرکت دی دعوت وی ݙتی۔ انھاں آکھیا جو اے ہک ٻہوں وݙا ایونٹ تھیسی اتے اساݙی خواہش اے جو انڈونیشیائی کمپنیاں ایندے اچ بھرپور شرکت کرن۔
