چیئرمین سینیٹ سید یوسف رضا گیلانی گلوبل مسلم بزنس فورم دے اعزازی سرپرست مقرر

اسلام آباد۔ 23 جنوری (اے پی پی) چیئرمین سینیٹ سید یوسف رضا گیلانی کوں انھاں دی خدمات تے کوششاں کوں سامݨے رکھیندیں ہوئیں گلوبل مسلم بزنس فورم (جی ایم بی ایف) دا اعزازی سرپرست مقرر کیتا ڳئے ۔ سینیٹ سیکریٹریٹ توں جاری بیان دے مطابق، اے اعزاز انھاں کوں اوں تاریخی کامیابی دے کجھ مہینے بعد حاصل تھئے جݙݨ انھاں بین الپارلیمانی سپیکرز کانفرنس (آئی ایس سی) دے بانی چیئرمین دی حیثیت نال پاکستان اچ ہک ریکارڈ ساز بین الاقوامی سربراہی اجلاس دی میزبانی کیتی، جیندے اچ دنیا دے 45 ملکاں دی پارلیمان دے سپیکرز تے اعلیٰ سطحی وفود شامل تھئے ہن۔ چیئرمین سینیٹ سید یوسف رضا گیلانی کوں باقاعدہ طور تے ایں فورم دا اعزازی سرپرست بݨݨ دی دعوت ݙتی ڳئی اے۔ اے فورم مسلم دنیا اچ ذمہ دارانہ اقتصادی قیادت، باہمی تعاون تے پائیدار ترقی کیتے سرگرم عمل اے۔ اے نامزدگی سید یوسف رضا گیلانی دی بطور ہک سینئر سیاستدان تے علاقائی تعاون دے حامی دے طور تے ودھدی ہوئی عالمی سنڄاݨ دی عکاسی کریندی اے۔ آپݨی تقرری تے ڳالھ مہاڑ کریندیں ہوئیں چیئرمین سینیٹ سید یوسف رضا گیلانی آکھیے جو انھاں کوں ایں اعزاز تے فخر محسوس تھیندا پئے ۔ انھاں آکھیے جو او او آئی سی ملکاں وچال مضبوط رابطے، آپسی تجارت اتے ٹیکنالوجی دے ذریعے ترقی دے خواہاں ہن۔ انھاں آکھیے جو ایجھے اقدامات نال غربت دے خاتمے تے موسمیاتی تبدیلی جیہے سانجھے چیلنجز نال نبڑݨ اچ مدد مل سڳدی اے۔