صدرِ مملکت آصف علی زرداری نال صومالیہ دے وزیرِ داخلہ دی ملاقات، سفارتی پاسپورٹ رکھݨ آلیاں کیتے ویزا ختم کرݨ دے معاہدے تے دستخط

اسلام آباد۔ 24 جنوری (اے پی پی) صدرِ مملکت آصف علی زرداری نال صومالیہ دے وزیرِ داخلہ علی یوسف ایوانِ صدر اچ ملاقات کیتی اے جیندے اچ پاکستان دے ݙوطرفہ تعلقات کوں مضبوط بݨاوݨ دے عزم دا اعادہ کیتا ڳیا ۔ ایں موقع تے پاکستان تے صومالیہ وچال سفارتی پاسپورٹ رکھݨ آلیاں کیتے ویزا دی شرط ختم کرݨ دے معاہدے تے وی دستخط کیتے ڳئے۔ ایوانِ صدر دے میڈیا ونگ ولوں ہفتے دے ݙینہہ جاری بیان دے مطابق، ایں معاہدے تے صومالیہ دی وزارتِ خارجہ تے بین الاقوامی تعاون دے مستقل سیکرٹری حمزہ عدن حادو تے وفاقی وزارتِ داخلہ تے انسدادِ منشیات دے سپیشل سیکرٹری داؤد محمد بڑیچ دستخط کیتے۔ایں موقع تے صدرِ مملکت آصف علی زرداری آکھیے جو افریقہ عالمی جغرافیائی سیاست اچ ہک اہم خطہ اے تے پاکستان صومالیہ سمیت افریقی ملکاں نال آپݨے تعلقات کوں ٻہا تگڑا کرݨ چاہندے ۔ صدرِ مملکت ایں ڳالھ تے زور ݙتے جو پاکستان بین الاقوامی جرائم تے منشیات دی سمگلنگ دے خلاف علاقائی تے بین الاقوامی کوششاں کیتے پرعزم اے۔ ملاقات اچ وسیع تر جغرافیائی سیاسی صورتحال تے ݙوطرفہ تعاون دے موقعیاں تے وی ڳالھ مہاڑ تھئی۔ ایں موقع تے صومالیہ دے وزیرِ داخلہ علی یوسف صومالیہ دے صدر ولوں صدرِ مملکت آصف علی زرداری دے ناں ہک خط وی پیش کیتا جیندے اچ نیک تمناواں تے خیر سگالی دے جذبات دا اظہار کیتا ڳیا اتے ݙوطرفہ تعلقات کوں مزید مضبوط بݨاوݨ دی خواہش دا اعادہ کیتا ڳیا اے۔ملاقات دے دوران ݙوہیں پاسوں قنون نافذ کرݨ آلے اداریاں تے کرمنل جسٹس دے شعبے اچ تعاون ودھاوݨ تے ڳالھ مہاڑ کیتی ڳئی۔ ݙوہیں پاسوں منشیات دے خلاف اقدامات اچ تعاون، منشیات دی سمگلنگ تے منظم جرائم دے خلاف مشترکہ حکمتِ عملی، معلومات تے انٹیلی جنس دے تبادلے تے نال ای اہلکاراں دی تربیت تے وی اتفاقِ رائے دا اظہار کیتا۔  ملاقات اچ وفاقی وزیرِ داخلہ محسن رضا نقوی تے وزیرِ مملکت برائے داخلہ طلال چوہدری وی موجود ہن۔ صومالی وفد اچ پاکستان اچ صومالیہ دے سفیر شیخ نور محمد حسن تے ڈپٹی پولیس چیف عثمان عبداللہی وی شامل ہن۔