حکومت تعلیمی نظام کوں موثر اتے نینگراں کوں بااختیار بݨاوݨ کیتے مختلف پروگراماں تے ودھ توجہ ݙیندی پئی اے، وزیراعظم دا عالمی یومِ تعلیم تے سنیہا

اسلام آباد۔ 23 جنوری(اے پی پی) وزیراعظم محمد شہباز شریف تعلیم و تربیت دے شعبے نال جڑے لوکاں کوں خراجِ تحسین پیش کریندے ہوئیں آکھیے جو پاکستان دے باصلاحیت نینگر اساݙا قیمتی اثاثہ ہین جنھاں کوں تعلیم، تربیت اتے ہنرمندی دے بہترین موقع ݙیوݨ حکومت دی اولین ترجیح اے۔ وزیراعظم آفس دے میڈیا ونگ ولوں جاری بیان دے مطابق، عالمی یومِ تعلیم تے اپݨے سنیہے اچ وزیراعظم آکھیے جو چھݨ چھݨ 24 جنوری کوں عالمی یومِ تعلیم تے پاکستان پوری دنیا دے نال رل تے خاص طور تے پاکستان دے تعلیم و تربیت نال جڑے لوکاں کوں خراجِ تحسین پیش کریندے۔ انھاں آکھیے جو او ذاتی طور تے سارے عوام، طلباء و طالبات، اساتذہ، ماء پیؤ اتے محققین کوں مبارک ݙیندن جیہڑے ملک اچ علم دے ودھارے کیتے کوششاں کریندے پئن۔ وزیراعظم آکھیے جو ایں سال اے عالمی ݙینہہ “تعلیم دی مشترکہ تشکیل اچ نینگراں دی طاقت” دے ٻہوں مناسب عنوان دے تحت منایا ویندا پئے۔ اے عنوان نینگراں کوں نظامِ تعلیم اچ ہک فعال شراکت دار دے طور تے ظاہر کریندے، ہک اینڄھا نظامِ تعلیم جیہڑا اڄ دے دور، جدت اتے مستقبل دے تقاضیاں دے مطابق، جامع اتے اثر رکھݨ والا ہووے۔ انھاں آکھیے جو نینگراں دی تخلیقی صلاحیتیں نظامِ تعلیم کوں درست سمت اچ ٹورݨ دا باعث بݨسن۔ وزیراعظم آکھیے جو پاکستان دے باصلاحیت نینگراں کوں معیاری تعلیم اتے ہنرمندی دے بہترین موقع ݙیوݨ حکومت دی ترجیح اے اتے پاکستان دا آئین (آرٹیکل 25-اے) ایں حوالے نال وفاقی اتے صوبائی حکومتاں دی رہنمائی کریندا رہسی۔ انھاں آکھیے جو اج دی ٹیکنالوجی دی دنیا اچ ڈیجیٹل مہارت اتے اخلاقی اقدار اچ ای قومی ترقی دا راز لکیا ہوئے۔ حکومتِ پاکستان نینگراں کوں بااختیار بݨاوݨ کیتے “وزیراعظم لیپ ٹاپ سکیم”، وظیفے تے میرٹ دی بنیاد تے مالی مدد جھیں پروگراماں تے خصوصی توجہ ݙیندی پئی اے تاں جو طلباء کوں ڈیجیٹل وسائل اتے بین الاقوامی علم تئیں رسائی مل سڳے۔ وزیراعظم آکھیے جو “وزیراعظم یوتھ سکلز ڈویلپمنٹ پروگرام” دے تحت مصنوعی ذہانت (AI)، روبوٹکس اتے جدید ٹیکنالوجی اچ تربیت ݙتی ویندی پئی اے۔ مدارس دے نینگراں کوں وی قومی نظام اچ شامل کیتا ویندا پئے تاں جو او باعزت روزگار کما سڳن، جݙاں جو عورتاں کیتے وی خاص پروگرام بݨائے ڳئن تاں جو او معاشی طور تے خود مختار تھی سڳن۔ وزیراعظم اپیل کیتی جو آؤ رل تے نینگراں کیتے اینجھا تعلیمی ماحول ٻݨاؤں جیہڑا تحقیق، محنت دی عظمت اتے جدید تقاضیاں دے مطابق ہووے تاں جو آوݨ والی نسلاں امن، ترقی اتے خوشحالی دی منزل تئیں پڄ سڳن۔