پاکستان تے گھانا وچال پہلی ݙوپاسہ سیاسی مشاورت دا انعقاد، ݙو مفاہمتی یادداشتاں تے دستخط

اسلام آباد۔ 27 جنوری (اے پی پی) پاکستان تے گھانا پہلی ݙوپاسہ سیاسی مشاورت گھانا اچ منعقد کیتی اے جیہڑی ݙوہیں ملکاں وچال ݙوپاسہ تعلقات دے فروغ اچ ہک اہم سنگ میل اے ۔ منگل کوں دفترِ خارجہ ولوں جاری بیان دے مطابق پاکستانی وفد دی قیادت ایڈیشنل سیکرٹری خارجہ حامد اصغر خان کیتی جݙاں جو گھانا ولوں وزارتِ خارجہ دی چیف ڈائریکٹر خدیجہ ادریسو وفد دی سربراہی کیتی۔ مشاورت دے دوران ݙو مفاہمتی یادداشتاں تے دستخط کیتے ڳئے۔ ہک مفاہمتی یادداشت ݙوپاسہ سیاسی مشاورت بارے ہئی جݙاں جو ٻئی اسلام آباد دی فارن سروس اکیڈمی تے گھانا فارن سروس انسٹی ٹیوٹ وچال طے پاتی۔ ڳالھ مہاڑ دے دوران ݙوہیں پاسوں آپسی تعلقات کوں ٻیا تگڑا بݨاوݨ دے عزم دا اعادہ کیتا ڳیا تے سیاسی، معاشی، دفاعی، سیاحتی، ثقافتی، صحت، تعلیم، انفارمیشن ٹیکنالوجی تے باہمی مفاد دے ٻئے شعبیاں اچ تعاون ودھاوݨ تے اتفاق کیتا ڳیا۔ ݙوہیں ملکاں ایں ڳالھ تے وی اتفاق کیتے جو ݙوپاسہ سیاسی مشاورت دا اگلا دور آوݨ آلے سال اسلام آباد اچ کیتا ویسے ۔ پاکستان تے گھانا دے درمیان کئی ݙہاکیاں توں دوستانہ تعلقات قائم ہن۔ ادارہ جاتی مکالمے دا اے عمل تعلقات کوں مزید مضبوط بݨاوݨ اچ مددگار تھیسی۔